އުމުރުން 65 އަހަރުން މަތީގެ މީހުންނަށް ދޭ 5،000 ރުފިޔާގެ އެލަވަންސަށް ކުރަން ޖެހޭ ހަރަދު މިދިޔަ އަހަރެއްހާ ދުވަހުގެ ތެރޭގައި، 11 ޕަސެންޓް އިތުރުވެފައިވާ ކަމަށް ޕެންޝަން އޮފީހުގެ ތަފާސްހިސާބުތަކުން ދައްކައިފި އެވެ.
އެ ތަފާސް ހިސާބުތަކަށް ބަލާއިރު، ދެވަނައަށް އެންމެ ބޮޑު ހަރަދެއް ހިނގާ އުމުރުން ދުވަސްވީ މީހުންގެ އެލަވަންސަށް މިދިޔަ އަހަރެއްހާ ދުވަހުގެ ތެރޭގައި 524.5 މިލިއަން ރުފިޔާ ވަނީ ހަރަދުވެފަ އެވެ. އެއީ އޭގެ ކުރީގެ އެ މުއްދަތާ އަޅާބަލާއިރު 11 ޕަސެންޓްގެ އިތުރުވުމެއް ކަމަށް ހިސާބުތަކުން ދައްކަ އެވެ. އުމުރުން ދުވަސްވީ އަންހެނުންނަށް އެލަވަންސް ދޭން 259 މިލިއަން ރުފިޔާ ހަރަދުވި އިރު، ފިރިހެނުންނަށް 266 މިލިއަން ރުފިޔާ ހަރަދުވެފައިވާކަން ހިސާބުތަކުން ދައްކަ އެވެ.
ޕެންޝަނަށް ކުރަން ޖެހޭ ހަރަދުގެ 41 ޕަސެންޓް ހިއްސާކުރަނީ އުމުރުން ދުވަސްވީ މީހުންގެ އެލަވަންސެވެ.
ޕެންޝަން ފަންޑުން ދޭ އަސާސީ ޕެންޝަންތަކަށް މިދިޔަ އަހަރު 1.3 ބިލިއަން ރުފިޔާ ހަރަދުކޮށްފައިވެ އެވެ. އެހެން ނަމަވެސް 2014 ވަނަ އަހަރު އަސާސީ ޕެންޝަނަށް 1.2 ބިލިއަން ރުފިޔާ ހަރަދުވި އެވެ.
ރިޓަޔާމަންޓް ޕެންޝަންގެ ގޮތުގައި މިދިޔަ އަހަރު ޕެންޝަން ފަންޑުން 48.8 މިލިއަން ރުފިޔާ ހަރަދުކޮށްފައިވާއިރު، އެހެނިހެން ޕެންޝަންގެ ގޮތުގައި 260 މިލިއަން ރުފިޔާ ހަރަދުވެފައިވެ އެވެ. އެހެނިހެން ޕެންޝަންގެ ގޮތުގައި ހިމެނެނީ ދައުލަތަށް ގިނަ ދުވަހު، 20 ނުވަތަ 40 އަހަރަށް ހިދުމަތްކުރެއްވި ބޭފުޅުންނަށް ދޭ ޕެންޝަނެވެ.