ގއ. ވިލިނގިއްޔާއި ކޮލަމާފުށިން 300 އެއްހާ މީހުން ޕީޕީއެމް އާއި ގުޅިއްޖެ އެވެ. ޕީޕީއެމްއާ އަލަށް ގުޅުނު ފަރާތްތަކުން ވަނީ މިރޭ ދަރުބާރު ގޭގައި ބޭއްވި ރަސްމިއްޔާތެއްގައި މެންބަޝިޕް ފޯމްތައް ޕީޕީއެމްއާ ހަވާލުކޮށްފަ އެވެ.
މިރޭގެ ރަސްމިއްޔާތުގައި ގއ. ކޮލަމާފުށީގެ ފަރާތުން ސޮއިކޮށް ހަވާލުކޮށްފައިވަނީ 158 ފޯމެވެ. އަދި ވިލިނގިލިން 138 ފޯމެވެ.
ވިލިނގިލީ ދާއިރާއިން އަލަށް ޕީޕީއެމާ ގުޅުނު ފަރާތްތަކުގެ ފޯމް ބަލައިގަނެ، އެ ފަރާތްތަކަށް މަރުހަބާކިއުމަށް ޕީޕީއެމުން މިރޭ ބޭއްވި ރަސްމިއްޔާތުގައި ޕީޕީއެމްގެ ނައިބު ރައީސް އަދި ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވިދާޅުވީ، ރައީސް ޔާމީން ޕީޕީއެމް ހިންގުމާ ހަވާލުވެވަޑައިގެންނެވި ފަހުން ޕާޓީގެ ދުވެލި އެތައް ގުނައަކަށް ހަލުވިވެގެން ގޮސްފައިވާ ކަމަށެވެ. އެ ޕާޓީގެ މަސައްކަތްތައް މިވަގުތު އަމާޒުކޮށްފައިވަނީ، ކުރިއަށް އޮތް ލޯކަލް އިންތިހާބު ކާމިޔާބު ކުރުމަށް ކަމަށާއި، ލޯކަލް އިންތިހާބުގެ ބޮޑު އިންސައްތައެއް ޕީޕީއެމް ހޯދައިފި ނަމަ 2018 ގެ އިންތިހާބު ކާމިޔާބުކުރުމަކީ ދަތި ކަމަކަށް ނުވާނެ ކަމަށެވެ.
"އަޅުގަނޑުމެންގެ އަޒުމަކީ އިރާދަކުރެއްވިއްޔާ ކުރިއަށް އޮތް އިންތިހާބުގެ 80 ޕަސެންޓް ކާމިޔާބުކުރުން، އެކަން ކާޟިޔާބު ވެއްޖެ ނަމަ 2018 ގެ އިންތިހާބު ކާމިޔާބު ކުރުމަކީވަރަށް ބޮޑު ހިއްވަރެއް ލިބިގެންދާނެ،" އަބްދުއްރަހީމް ވިދާޅުވި އެވެ.
އަބްދުއްރަހީމް ވަނީ މިރޭ އެ ޕާޓީއާ އަލަށް ގުޅުނު ފަރާތްތަކަށް މަރުހަބާ ކިޔާފަ އެވެ. އަދި ކުރިއަށް އޮތް ލޯކަލް ކައުންސިލް އިންތިހާބުގައި ޕީޕީއެމްގެ ޓިކެޓުގައި ވާދަކުރަން ބޭނުންވާ ފަރާތްތަކަށް ފޯމް ހުށަހެޅުމުގެ ފުރުސަތު މާދަމާގެ ނިޔަލަށް ހަމަ ވާތީ، ފޯމް ފުރަން ބޭނުންވާ ފަރާތެއް އަދިވެސް ހުރެއްޖެ ނަމަ ވީ އެންމެ އަވަހަކަށް ފޯމް ފުރުމަށްފަހު ޕީޕީއެމްގެ އޮފީހާ ހަވާލުކުރުމަށް ވެސް އެދިފަ އެވެ.