ޖަޕާނުގެ އިރުއުތުރު ބިތުގައި އޮންނަ ފުކްޝީމާ އަށް މިއަދު އައި ބާރުގަދަ ބިންހެލުމަކަށް ފަހު ސުނާމީއެއް އުފެދި އެކި ވަރުގެ ގެއްލުމާއި އަނިޔާތަކާ ކުރިމަތިލާން ޖެހިއްޖެ އެވެ.
ފުކްޝީމާ އަކީ 2011 ވަނަ އަހަރު ވެސް ބާރުގަދަ ބިންހެލުމެއް އައިސްގެން ސުނާމީއެއް އެރި ސަރަހައްދެކެވެ. އެފަހަރުގެ ހާދިސާގައި 18،000 މީހުން މަރުވި އެވެ.
މިފަހަރުގެ ބިންހެލުން ރިކޯޑްކުރެވިފައި ވަނީ މެގްނެޓިއުޑް 7.4 ގެ ބާރުމިނުގަ އެވެ. ބިންހެލުން އައީ ބިމުގެ އަޑިން 30 ކިލޯމީޓަރު އަޑިއަށެވެ. މި ބިންހެލުމަށް ފަހު ޖަޕާނުގެ ވެރިރަށް ޓޯކިޔޯ އަށް ވެސް އޭގެ އަސަރުކޮށްފައިވެ އެވެ. ފުކްޝީމާއާ 100 މޭލު ދުރުގައި އޮތް ޓޯކިޔޯގެ އުސް އިމާރާތްތައް 30 ސިކުންތުވަންދެން "ހެލިލަހެލިލަ" ހުރިކަމުގެ ރިޕޯޓްތައް ލިބެ އެވެ.
ފުކްޝީމާ އަށް ކުރިން އައި ބިންހެލުމާ ގުޅިގެން، އެ ސަރަހައްދުގެ ނިއުކްލިއާ ރިއެކްޓަރުތަކެއް ހަލާކުވެ ނުރައްކާތެރި ރޭޑިއޭޝަން ވެސް ބޭރުވެފައިވެ އެވެ. ނަމަވެސް އޮފިޝަލުން ވިދާޅުވެފައި ވަނީ މިފަހަރުގެ ބިންހެލުމާ ގުޅިގެން އެފަދަ ނުރައްކަލެއް އަދި ނެތް ކަމަށެވެ.
އެހެން ނަމަވެސް ސުނާމީގެ އިންޒާރު ދީފައި ވަނިކޮށް ފުކްޝީމާ ސަރަހައްދަށް ވަނީ އެއް މީޓަރާއި ތިން މީޓަރާ ދެމެދުގެ އުސް މިނުގައި ރާޅުތައް އަރައިފަ އެވެ. ރާޅުތައް އަރާނެ ކަމުގެ އިންޒާރު ދިނުމަށް ފަހު ސަލާމަތީ ބާރުތަކުން ވަނީ އާންމުން ރައްކާތެރި ހިސާބުތަކަށް ބަދަލުކޮށްފަ އެވެ.