މިލްކުވެރިކަމުގެ މައްސަލާގައި އިންޑިއާ އާއި ޕާކިސްތާނާ ދެމެދު ހިޔާލުތަފާތުވެފައިވާ ކަޝްމީރުގައި އިއްޔެ އިންޑިއާ ސިފައިންގެ ތިން މީހަކު މަރާލި މައްސަލައިގެ ބަދަލު ހަރުކަށިގޮތަކަށް ހިފާނެ ކަމުގެ އިންޒާރު އިންޑިއާގެ އަސްކަރިއްޔާ އިން ދީފި އެވެ.
ނަމަވެސް ސިފައިންގެ މީހުން މަރާލާފައި ވަނީ ކޮން ބައެއްގެ ހަމަލާއެއްގައި ކަމެއް ނުވަތަ ބަދަލު ހިފާނީ ކޮން ބައެއްގެ ކިބައިން ކަމެއް އިންޑިއާ އިން ނުބުނެ އެވެ. ކަޝްމީރުގައި އިންޑިއާ އާއި ޕާކިސްތާނުގެ ސިފައިން ވެސް މި ފަހުން ކުރިމަތިލުންތައް ހިންގަމުން އަންނައިރު ޕާކިސްތާނުގެ ބާރުގެ ދަށުގައި އޮންނަ ކަޝްމީރުގެ ފަޅިން ހަނގުރާމަވެރިންގެ ނުރައްކާ ވެސް އިންޑިއާގެ ސިފައިންނަށް ވަނީ ބޮޑުވެފަ އެވެ.
އިންޑިއާ ސިފައިންނަށް ޕާކިސްތާނު ސިފައިން ހަމަލާ ދޭ ކަމަށް ކުރެވޭ ތުހުމަތާ ގުޅިގެން ޕާކިސްތާނުން ތަކުރާރުކޮށް ބުނަމުން ދަނީ އިސްވެ އެމީހުން އެއްވެސް ހަމަލާއެއް ދީފައި ނުވާނެ ކަމަށާއި އެކަމަކު ރައްދު ހަމަލާ ދެމުން ގެންދާނެ ކަމަށެވެ.
ކަޝްމީރުގެ މައްސަލާގައި ހަމަލާ ބަދަލުކުރުން ހުއްޓާލުމަށް އިންޑިއާ އާއި ޕާކިސްތާނާ ދެމެދު 2003 ވަނަ އަހަރު ގާއިމުކުރި އެއްބަސްވުމަށް ދެ ފަރާތުންކުރެ އެއްވެސް ގައުމަކުން އިހްތިރާމްނުކުރެ އެވެ.
ކަޝްމީރުގައި އިންޑިއާ އާއި ޕާކިސްތާނު ސިފައިންނާ ދެމެދު މިފަހުން ވަރުގަދަ ކުރިމަތިލުމެއް ފެށިފައި މި ވަނީ މި އަހަރުގެ ސެޕްޓެމްބަރު މަހުގެ 18 ވަނަ ދުވަހު އިންޑިއާގެ ސިފައިންގެ މަރުކަޒަކަށް ދިން ހަމަލާއަކާ ގުޅިގެންނެވެ.
ނިއުކްލިއާ ހަތިޔާރުގެ ގާބިލުކަން ލިބިފައިވާ ދެ ގައުމުން މީގެ ކުރިން ކަޝްމީރުގެ މައްސަލާގައި ދެ ފަހަރެއްގެ މަތިން ހަނގުރާމަކޮށްފައިވެ އެވެ. --ބީބީސީ