ކުުވައިތުގެ އާންމު އިންތިހާބުގައި އިދިކޮޅު އިއްތިހާދުން ގާނޫނު ހަދާ މަޖިލީހުގެ ގާތްގަނޑަކަށް ދެބައިކުޅަ އެއްބައި ނަގާފައި ވަނިކޮށް އެގައުމުގެ ސަރުކާރު ކުއްލިގޮތަކަށް އިސްތިއުފާ ދީފި އެވެ.
ރަސްމީ ނަތީޖާ އިއުލާނުކޮށްފައިވާއިރު އެގައުމުގެ އިދިކޮޅު އިއްތިހާދުން މި ވަނީ ސިލްސިލާ މުޒާހަރާތަކަކަށް ފަހު ސަރުކާރަށް ވަރުގަދަ ރައްދެއް ދީފަ އެވެ. މަޖިލީހުގެ 50 ގޮނޑީގެ ތެރެއިން އިދިކޮޅު ޕާޓީތަކުން ވަނީ 24 ގޮނޑި ކާމިޔާބުކޮށްފަ އެވެ. ސަރުކާރުން ކުރިން ކޮންޓްރޯލްކުރި ވަރަށް ގިނަ ގޮނޑިތައް ވަނީ ގެއްލިފަ އެވެ.
މި އިންތިހާބަކީ ކުވައިތުގެ އަމީރު ގާނޫނު ހަދާ މަޖިލިސް އުވާލެއްވުމުން ނެގި ވޯޓެކެވެ.
އިންތިހާބުގެ ނަތީޖާއާ ގުޅިގެން ސަރުކާރު އިސްތިއުފާ ދީފައިވާއިރު އާ ބޮޑުވަޒީރަކު އައްޔަންކުރާނީ ވެރިކަމުގެ ބާރުތައް ކޮންޓްރޯލްކުރާ ޝާހީ އާއިލާއިންނެވެ.
އިދިކޮޅު ފަރާތްތަކުން އާންމު އިންތިހާބުގައި ބައިވެރިވެފައި މި ވަނީ ހަތަރު އަހަރު ވަންދެން އިންތިހާބު ބޮއިކޮޓްކޮށް ސިލްސިލާ މުޒާހަރާތަކެއް ސަރުކާރާ ދެކޮޅަށް ކުރިއަށް ގެންދިއުމަށް ފަހު އެވެ. މަޖިލީހުގެ ގާތްގަނޑަކަށް ދެ ބައިކުޅަ އެއްބައި އިދިކޮޅު ޕާޓީތަކަށް ލިބިގެން ދިއުމަކީ ކުވައިތުގެ ސަރުކާރަށް ފިއްތުންތަކެއް ކުރިމަތިވެ ގައުމުގެ މަސްރަހް ހޫނުވެގެންދާނޭ ކަމެއް ކަމަށް ލަފާކުރެވެ އެވެ.
ގޮނޑިތައް ކާމިޔާބުކުރި އިދިކޮޅު ފަރާތްތަކަށް ބަލާއިރު ގިނައީ ދީނީ ގޮތުން ހަރުކަށި ހިޔާލުގެ ފަރާތްތަކެވެ. އެގޮތުން ކުވައިތުގެ މުސްލިބް ބްރަދަހުޑާ ގުޅިފައިވާ ފަރާތްތަކާއި ހަރުކަށި ސަލަފީ މުސްލިމުން ގޮނޑިތައް ގެންދިޔަކަން ފާހަގަކޮށްލެވެ އެވެ.
މަޖިލީހުގައި މިހާރު ޝިއައީންނަށް ލިބެނީ ހަ ގޮނޑި އެވެ. އަދި މިފަހަރުގެ އިންތިހާބުގައި މަޖިލީހަށް އިންތިހާބުވެފައި ވަނީ އެންމެ އަންހެން މެމްބަރެކެވެ. ގާތްގަނޑަކަށް 15 ވަރަކަށް އަންހެނުން ގޮނޑިތަކަށް ވާދަކުރި އެވެ.
ކުވައިތުގެ މި އިންތިހާބުގައި ވޯޓްލުމުގެ ހައްގު ލިބިފައިވާ މީހުންގެ 70 ޕަސެންޓް ވޯޓަށް ނުކުތެވެ.