ފާއިތުވި ތިން އަހަރު ތެރޭގައި މަޝްރޫއުތަކަށް، އެއް ބިލިއަން ޑޮލަރު ހަރަދު ކޮށްފައިވާނެ ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ. އަދި ރާއްޖެއަށް އަންނަ އިންވެސްޓްމަންޓްތަކުގެ އަދަދު އެތައް ގުނައެއް މިހާރު އިތުރުވެފައިވާކަން ވެސް ރައީސް ފާހަގަ ކޮށްފަ އެވެ.
ވިޔަފާރިތަކަށް ފަހި މާހައުލެއް ތަނަވަސްކުރުމަށް އެހީތެރިވުމަށް އިކޮނޮމިކް މިނިސްޓްރީ އާއި ޝަރުއީ ދާއިރާއިން މިއަދު ފެށި މަސައްކަތު ބައްދަލުވުން ފެށުމަށް ހޮޓެލް ޖެންގައި މިއަދު ބޭއްވި ރަސްމިއްޔާތެއްގައި ރައީސް ވިދާޅުވީ، ކުޑަ އިގްތިސޯދެއް އޮތް ގައުމެއްގެ ގޮތުއި ފާއިތުވި ތިން އަހަރު ވެސް ރާއްޖެ އޮތް ނަމަވެސް ތަރައްގީގެ މަޝްރޫއުތަކަށް ކުރާ ހޭދަ އެތައް ތަނެއް މައްޗަށް ޖެހިފައިވާ ކަމަށެވެ. އެގޮތުން ސަރުކާރުން ހިންގި، މަޝްރޫއުތަކަށް 1000 މިލިއަން ޑޮލަރު، (އެއް ބިލިއަން ޑޮލަރު) ހަރަދުކޮށްފައިވާ ކަމަށެވެ. އެހާވަރަށް ބޭރުގެ އިންވެސްޓްމަންޓްތައް ވެސް ރާއްޖެއަށް އަމާޒުވެފައިވާ ކަމަށް ރައީސް ވިދާޅުވި އެވެ.
ރާއްޖެއަށް އެތެރެވަމުން އަންނަ ބޭރުގެ ބޮޑެތި އިންވެސްޓްމަންޓް ތަކަށް ބަލާއިރު މުޅި ދެކުނު އޭޝިއާ ސަރަހައްދުގައި ވެސް ނިސްބަތުން އެންމެ ބޮޑު އިންވެސްޓްމަންޓެއް އަމާޒުވެފައި އޮތީ ރާއްޖެއަށް ކަމަށް ރައީސް ވިދާޅުވި އެވެ. ރައީސް ވިދާޅުވި ގޮތުގައި ބޭރުން އަންނަ އެ ހުރިހާ އިންވެސްޓްމަންޓްތަކެއް ނިމޭ އިރު، 3000 މިލިއަން ޑޮލަރަށް (ތިން ބިލިއަން ޑޮލަރަށް) ވުރެ ފައިދާ އިތުރުވާނެ އެވެ.
"ރާއްޖޭގައި، މިކުރާ ބޮޑެތި މަސައްކަތްތަކަށް ބަލާނަމަ އެތައް ބިލިއަން އިންވެސްޓްމަންޓް ތަކެއް މި ހުރީ. އެހެންވީމަ ކުރު ތިން އަހަރެއްގެ ތެރޭގައި އަދި 35000 މިލިއަން ރުފިޔާގެ ދައުލަތުގެ ޑެފިސިޓެއް ހިފައިގެން ތެދުވާ ބަޔަކު ރާއްޖޭގެ އިގްތިސޯދު މުޅިން ބަދަލުކޮށްލަން މަސައްކަތްކުރާ ކަމާ ދޭތެރޭ އެއްވެސް ޝައްކެއް ނެތް،" ރައީސް ވިދާޅުވި އެވެ.
ރައީސް ވިދާޅުވީ ސިޔާސީ މީހުންނާއި އެނޫންވެސް އެކި ފަރާތްތަކުން ބައިނަލްއަގުވާމީ މުޖުތަމައުތަކުގައި ރާއްޖެއާ މެދު ތަފާތު ގޮތްގޮތަށް ގޯސް ވާހަކަތައް ފަތުރަން މަސައްކަތް ކުރި ނަމަވެސް، ބޭރުގެ އިންވެސްޓަރުން ރާއްޖޭގައި އިންވެސްޓުކުރުމަށް ކެތްމަދުވެފައި ތިބި ކަމަށެވެ.
ރައީސް ވިދާޅުވި ގޮތުގައި ރާއްޖެއަކީ ކުޑަ ގައުމަކަށް ވުމުން ރާއްޖެއަކީ އެހާ ނުފޫޒު ގަދަ ގައުމަކަށް ނުވާތީ، ރާއްޖޭގެ ހާލަތު ބޭރުގައި ސިފަކޮށް ދީފައި އޮންނަނީ މުޅިން ނުބައިކޮށެވެ.
"އެހެން ނަމަވެސް ރާއްޖެއާ މެދު އުފެދޭ އެ ގޯސް ތަސައްވުރު ނެތިކޮށްލުމަށް މުއައްސަސާތަކުންނާއި ފަރުދުން މަސައްކަތްކުރަންޖެހޭ. އެކަން އެގޮތަށް ކުރަންޖެހެނީ އަމިއްލަ ރައްކާތެރިކަމާއި އަމިއްލަ ގައުމުގެ ކުރިމަގަށްޓަކައި،" ރައީސް ޔާމީން ވިދާޅުވި އެވެ.