ކުޑަކުދިންނަށް ހާއްސަކޮށް "ރަންދޫނި" ގެ ނަމުގައި އޭޑީކޭ ޖެނަރަލް ޓްރޭޑިންއިން ބްރޭންޑެއް ތައާރަފްކޮށްފި އެވެ. މި ބްރޭންޑަކީ ކުޑަކުދިންނަށް ހާއްސަ ހަރަކާތްތަކެއް ހިންގުމަށް ތައާރަފްކުރި ބްރޭންޑެކެވެ. އެގޮތުން ފުރަތަމަ ހަރަކާތުގެ ގޮތުގައި މާދަމާ ހަވީރު ކުޑަކުދިންގެ ހަވީރެއް އޮންނާނެ އެވެ.
އޭޑީކޭގެ މާކެޓިންގެ ފަރާތުން ވާހަކަ ދައްކަވަމުން މަނާލް ނަޝީދު ވިދާޅުވީ، ކުޑަކުދިންގެ ހަވީރު އޮންނާނީ މާދަމާ ހަވީރު 4:00 ން 6:00 އަށް އާޓިފިޝަލް ބީޗްގަ ކަމަށެވެ. އެ ހަވީރުގައި ކުޑަކުދިންނަށް ބައިވެރިވޭ ތަފާތު ކުޅިވަރުތަކާއެކު ސްޓޯލްތައް ހުންނާނެ ކަމަށެވެ. މަޖާ މާހުއުލެއްގައި ކުޑަކުދިންނަށް އުފާކޮށްލުމުގެ ފުރުސަތު ދިނުމުގެ ބާއްވާ މި ހަވީރުގައި ފޭސް ޕެއިންޓިން ބޯލް ދަ ކްލައުން އަދި ބޯލިން ފަދަ ކުޑަކުދިން ގަޔާވާ ތަފާތު ކުޅިވަރުތައް އޮންނާނެ އެވެ.
"ރަންދޫނި ކުޑަކުދިންގެ ހަވީރު" ގައި ބައިވެރިވާ ކުދިންނަށް ތަފާތު ކުޑަކުދިންނާ ގުޅޭ ހަދިޔާތައް ވެސް ދިނުމަށް ނިންމާފައިވާ ކަމަށް މަނާލް ވިދާޅުވި އެވެ.
މަނާލް ވިދާޅުވީ، މަދާމާގެ ހަވީރުގެ އޭޑީކޭއިން ވިއްކާ ބްރޭންޑްތަކުގެ ތަކެތި ގަންނަން ލިބެން ހުންނާނެ ކަމަށެވެ. އަދި ކޮންމެ އެއްޗަކުން ވެސް 20 ޕަސެންޓާއި 60 ޕަސެންޓާ ދެމެދުގެ ޑިސްކައުންޓެއް ލިބޭނެ ކަމަށެވެ.
"ރަންދޫނި" ބްރޭންޑްގެ ދަށުން ފުރަތަމަ ހަރަކާތް މާދަމާ ބާއްވާއިރު ކުރިއަށް ވެސް ގިނަ ހަރަކާތްތަކެއް ބޭއްވުމަށް ދަނީ ވިސްނަމުންނެވެ. އެގޮތުން އެ ބްރޭންޑްގެ ދަށުން އެވޯޑެއް ތައާރަފްކުރުމަށް ވެސް ވަނީ ވިސްނާފަ އެވެ. އޭގެ އިތުރަށް ތަފާތު އިވެންޓްތައް ވެސް ބާއްވާނެ އެވެ.
އޭޑީކޭއިން މިހާރު ވެސް ގެންދަނީ "ޑްރައިޕާސް މެގަޕެކް" ހާއްސަ ޕްރޮމޯޝަނެއް ހިންގަމުންނެވެ. އެ ޕްރޮމޯޝަން އަންނަ ފެބްރުއަރީ މަހުގެ 15 ވަނަ ދުވަހާ ހަމައަށް ކުރިއަށް ދާނެ އެވެ. މި ޕްރޮމޯޝަންގެ ދަށުން ޑްރައިޕާސްގެ މެގަ ޕެކް ނެޕީ ޕެކެޓެއް ގަނެގެން އެއް އަހަރު ދުވަހުގެ މުއްދަތަށް އެޕާޓްމަންޓަކާއި އިތުރު އަގުހުރި އިނާމްތައް ހޯދުމުގެ ފުރުސަތު އޭޑީކޭއިން ވަނީ ހުޅުވާލާފަ އެވެ.
އޭޑީކޭ ޖެނެރަލް ޓްރޭޑިން އަކީ ގިނަ ބްރޭންޑުތަކެއް ރާއްޖެ އެތެރެކޮށް ވިއްކަމުން ގެންދާ ފިހާރަ އެކެވެ. އެގޮތުން ޑްރައިޕާސް ބްރޭންޑުގެ ތަކެއްޗާއި މާސްޓަ ޝެފް ބްރޭންޑުގެ ބާސްމަތީ ހަނޑޫ ފާހަގަކޮށްލެވެ އެވެ. އޭގެ އިތުރަށް އައިމީ ނޫޑުލްސް އާއި ބޭޑް ލެބް ބްރޭންޑްގެ ތަކެއްޗާއި ޓްވިސްޓް ޖޫހާއި ލީގޯ ޗިޕްސް އަކީ އޭޑީކޭއިން ވިއްކާ މަގުބޫލު ތަކެއްޗެވެ.