މޯލްޑިވްސް އިމިގްރޭޝަން އޮފިސަރުންގެ ނަމުގައި ބިދޭސީއެއްގެ އަތުން ފޭރުނުކަމުގެ ތުހުމަތުގައި މިދިޔަ ސެޕްޓެމްބަރު މަހު ހައްޔަރު ކުރި މީހާ، ފޭރުމުގެ އެހެން މައްސަލައެއްގައި އަނެއްކާވެސް ހައްޔަރުކޮށްފި އެވެ.
އެ ދެ މައްސަލައިގައިވެސް ހައްޔަރުކުރީ ގ. ބެރުގެ މުހައްމަދު ނަވީން (44އ) އެވެ.
މޯލްޑިވްސް އިމިގްރޭޝަން އޮފިސަރުންގެ ނަމުގައި ބިދޭސީއެއްގެ އަތުން ފޭރުނުކަމުގެ ތުހުމަތުގައި ނަވީން ހައްޔަރުކުރީ މިދިޔަ ސެޕްޓެމްބަރު މަހު އެވެ.
އެފަހަރު އޭނާ ވަނީ އިތުރު ބަޔަކާ ގުޅިގެން ބަންގްލަދޭޝްގެ މީހެއްގެ އަތުން މޯބައިލް ފޯނަކާއި 9،000 ރުފިޔާ ފޭރިގެންފަ އެވެ.
ފޭރުމުގެ އެހެން މައްސަލައެއްގައި އޭނާ އަލުން ހައްޔަރުކުރީ ނިމިގެން ދިޔަ ހަފްތާ ގައެވެ. މި ފަހަރު އޭނާގެ ބަންދަށް ޖެހީ އެކަމަކު އެންމެ ތިން ދުވަހެވެ. މި ފަހަރު އޭނާއާ ގުޅޭ ގޮތުން ހުށަހަޅާފައިވަނީ ބަލިކަށި ހެކިތަކެއް ކަމަށާއި އިތުރު ހެކި ގެނައުމަށް ބަންދާ މެދު ގޮތެއް ނިންމި ގާޒީ ވަނީ ފުލުހުންނަށް އަންގާފަ އެވެ.
ނަވީންގެ މައްޗަށް ވައްކަމާއި ފޭރުމުގެ ތުހުމަތު ފުލުހުން ކުރެ އެވެ.