މަރާލާފައިވާ ކަމަށް ތުހުމަތު ކުރެވޭ ފިލިޕީންސްގެ ނަރުސް މޭރީ ގްރޭސްގެ ލޭގެ ސާމްޕަލުން، ސަކްސިނައިލްކޮލިންގެ އަސަރު ފެނިފައިވާކަން ތަހުގީގަށް ހާމަވެއްޖެ އެވެ.
ސަކްސިނައިލްކޮލިން އަކީ، އާއްމުކޮށް ހޮސްޕިޓަލްތަކުގައި ނޫނީ ގެންގުޅުން މަނާ ބޭހެކެވެ. މިއީ މީހަކު މަރާލަން ބޭނުންކުރެވިދާނެ އިންޖެކްޝަނެކެވެ. އަދި މޭރީގެ ޕޯސްޓްމޯޓަމް ހެދިއިރު ސަކްސިނައިލްކޮލިންގެ އަސަރު ފެނުނުކަން ކުރިން ވަނީ ހާމަވެފަ އެވެ.
އައިޖީއެމްއެޗްގައި މަސައްކަތް ކުރަމުންދިޔަ ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރުވި މައްސަލާގައި އިންޑިއާގެ މެޑިކަލް ޕްރޮފެސަރަކު މިއަދު ވަނީ ޝަރީއަތުގައި ހެކިބަސް ދީފަ އެވެ. އެއީ ފޮރެންސިކް ސައިންސް އިން ޕީއެޗްޑީ ހާސިލްކޮށްފައިވާ އިންޑިއާގެ ގުޖުރާތުގެ ޔުނިވާސިޓީއެއްގެ ޕްރޮފެސަރެކެވެ. ބާވީސް އަހަރު މި ދާއިރާގައި މަސައްކަތް ކުރައްވާފައިވާ އެ ޕްރޮފެސަރު ހެކިބަސް ދެއްވީ، ނިއުދިއްލީގައި ހުންނަ ރާއްޖޭގެ ހައިކޮމިޝަން މެދުވެރިކޮށެވެ.
ޕްރޮފެސަރު ވިދާޅުވީ މޭރީގެ ލޭގެ ސާމްޕަލުން ލީތަލް އިންޖެކްޝަނެއް ކަމަށްވާ ސަކްސިނައިލްކޮލިންގެ އަސަރު ފެނިފައިވާ ކަމަށެވެ. އެ ނަތީޖާ އަންނާނީ އެ މާއްދާ ނުވަތަ އެ ބޭސް މީހަކަށް ދިނުމުން ކަމަށްވެސް ވިދާޅުވި އެވެ.
އޮކްޓޫބަރު 2021 ގައި އައިޖީއެމްއެޗްގައި މަސައްކަތްކުރި މޭރީ މަރާލި މައްސަލާގައި ދައުލަތުން ދައުވާކުރަނީ މޭރީގެ ފިރިމީހާ މާވިން އެސްވައިގެ މައްޗަށެވެ. ދެން ދައުވާ ކުރަނީ މާވިންގެ ލޯބިވެރިޔާ ކަމަށް ބުނާ ހައްވާ ލަމްހާގެ މައްޗަށެވެ. ލަމްހާއަށް ކުރަނީ އެކަމުގައި ބައިވެރިވުމުގެ ދައުވާ އެވެ.
ލަމްހާގެ ކޮޓަރިން ޕޮޓޭސިއަމް ކްލޮރައިޑް، ޕްރޮޕޮފޯލް އަދި ސަކްސިނައިލްކޮލިން ނަމަކަށް ކިޔާ އިންޖެކްޝަންތަކެއް ފެނުނެވެ. އެއީ ހޮސްޕިޓަލްތަކުގައި ނޫނީ ގެންގުޅުން މަނާ ބޭސްތަކެކެވެ. ދައުލަތުން ތުހުމަތު ކުރާ ގޮތުގައި އެ ތަކެއްޗަކީ ލަމްހާ ހުއްދަ ނެތި އައިޖީއެމްއެޗް އިން ގެއަށް ގެންދިޔަ ތަކެއްޗެވެ.