ހައުސިން މިނިސްޓްރީގެ ލޭންޑް އެންޑް ބިލްޑިން ޑިޕާޓްމަންޓުގެ މިލިއަނެއްހާ ލިޔެކިޔުން ޑިޖިޓަލައިޒް ކުރަން ބަޔަކާ ހަވާލުކޮށްފި އެވެ. ހައުސިން މިނިސްޓްރީގެ ލޭންޑް އެންޑް ބިލްޑިން ޑިޕާޓްމަންޓަކީ ގޯތި ރެޖިސްޓްރީ ކުރުމާއި ކުރެހުން އެޕްރޫވް ކުރުމުގެ މަސައްކަތް ކުރަމުން އަންނަ ޑިޕާޓްމަންޓެވެ. --
ލޭންޑް އެންޑް ބިލްޑިން ޑިޕާޓްމަންޓުގެ ލިޔުކިޔުންތައް އިންފޮމޭޝަން ސިސްޓަމެއްގެ ތެރެއިން ޑިޖިޓަލައިޒް ކުރަން "ޖަވާބު" ކުންފުންޏާއި ހަވާލު ކުރުމަށް މިއަދު ހުރަވީ ބިލްޑިންގައި ބޭއްވި ކުޑަ ހަފްލާއެއްގައި ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ އެ މިނިސްޓްރީގައި މީގެ ސާޅީހަކަށް އަހަރު ކުރިން ފެށިގެން ގޭގޭގެ ކުރެހުންތަކާއި ރެޖިސްޓްރީތައް ފައިލްތަކުގައި ރައްކާ ކުރެވިފައިވާ ކަމަށެވެ. އެގޮތުން މިލިއަނެއްހާ ފައިލް ރައްކާ ކުރެވިފައި އެބަހުރި ކަމަށާއި އޭގެ ސަބަބުން ހިދުމަތް ދިނުމުގައި ލަސްތަކެއްވެ ބޮޑު ޖާގައެއް ގެއްލިގެންދާ ކަމަށެވެ.
އެގޮތުން އެ ލިޔެކިޔުންތައް އިލެކްޓްރޯނިކަލީ ޑިޖިޓަލައިޒް ކުރުމަށް ބަޔަކާ ހަވާލު ކުރުމުން ހިދުމަތްތައް ވަރަށް ފަސޭހަވާނެ ކަމަށް މުއިއްޒު ވިދާޅުވި އެވެ.
"އެއްވެސް ކުރެހުމެއް ނަގައިގެން ކުރެހުމެއް ބަދަލު ކުރަން ޖެހުނަސް ފައިލްތައް ނަގައިގެން ހޯދަން މި ޖެހެނީ. އެހެންވެ ވަރަށް ދުވަސް ނަގާ ހިދުމަތް ދޭން. އެހެންވެ އިލެކްޓްރޯނިކަލީ ހުރިހާ ލިޔެކިޔުމެއް ސްކޭންކޮށްފައި ސިސްޓަމެއްގެ ތެރެއިން ހުރިހާ ލިޔުމެއް ސްޓޯ ކުރެވޭނެ ގޮތެއް ހެދުމަށްޓަކައި ހަވާލު ކުރެވުނީ. އޭރުން ހިދުމަތްތައް އެތަށް ގުނައެއް އަވަސްވާނެ،" މިނިސްޓަރު ވިދާޅުވި އެވެ.
ލޭންޑް އެންޑް ބިލްޑިންގެ ހިދުމަތް އަވަސް ކުރުމަށް ކޮށްފައި ހުރި އިތުރު މަސައްކަތްތައް ފާހަގަކޮށް މިނިސްޓަރު ވިދާޅުވީ މީގެ ކުރިން ކުރެހުމެއް ފާސް ކުރުމަކީ އެތަށް މަހެއް ހޭދަވާ ކަމެއް ކަމަށެވެ. ނަމަވެސް މިހާރު ހުރިހާ ތަތްގަނޑުތަކެއް ހަމަވެފައި ހުރި ނަމަ ތިން ދުވަސް ތެރޭގައި ފާސްވާ ގޮތަށް އިންތިޒާމްތައް ބަދަލުކޮށްފައިވާ ކަމަށާއި ތަތްގަނޑުތައް ހަމަ ނޫންނަމަ މަދުވެގެން 14 ދުވަސް ތެރޭގައި ފާސް ކުރެވޭނެ ކަމަށް މިނިސްޓަރު ވިދާޅުވި އެވެ.
މިއަދު ބޭއްވި ހަފްލާފައި ވަނީ ކިއުގައި ޖެހޭ މީހުންނަށް ފަސޭހަ ކުރުމަށް އިލެކްޓްރޯނިކް ކިއު ސިސްޓަމްއެއްވެސް ވަނީ އިފްތިތާހުކޮށްފަ އެވެ.