އަރަބިއްޔާ އަދި ގާކޮށީގައި އިންޑިއާގެ ޓާޓާއިން އަޅާފައިވާ ފްލެޓްތައް ލިބުނު މީހުންގެ ތެރޭން މޯލްޑިވްސް އިސްލާމިކް ބޭންކް (އެމްއައިބީ) އިން ލޯނަށް އެދުނު ފަރާތްތަކުގެ ތެރޭން 47 މީހަކަށް ލޯނު ހަމަޖެހިފައިވާ ކަމަށް އެ ބޭންކުން މިއަދު ބުނެފި އެވެ.
ޓާޓާ ފްލެޓް ލިބުނު ފަރާތްތަކުން ފްލެޓަށް ދައްކަންޖެހޭ ދެ މިލިއަން ރުފިޔާގެ ލޯނު ބެންކުތަކުން ހަމަޖެހުނުކަން އަންގާ ލިޔުން އެޗްޑީސީއާ ހަވާލުކުރަން ދީފައިވާ މުއްދަތު ހަމަވީ މިދިޔަ ބުރާސްފަތި ދުވަހު އެވެ.
"އަވަސް" އަށް މައުލޫމާތު ދެއްވަމުން އިސްލާމިކް ބެންކުގެ މާކެޓިން އެންޑް ކޯޕަރޭޓް އެފެއާޒް މެނޭޖާ މުހައްމަދު ޝަފާއު ހަސަން ވިދާޅުވީ، ޓާޓާ ފްލެޓް ލިބިފައިވާ ފަރާތްތަކުގެ ތެރޭން 99 މީހުން އެ ބެންކަށް ލޯނު ހޯދަން އެޕްލިކޭޝަން ހުށަހެޅި ކަމަށެވެ. ލޯނު ހަމަޖެހުނު ކަމުގެ ލިޔުން ހޯދަން އެފަރާތްތަކަށް އެޗްޑީސީ އިން ދިން މުއްދަތު މިދިޔަ ބުރާސްފަތި ދުވަހު ހަމަވިއިރު، އެ ދުވަހާ ހަމަޔަށް އެ ބެންކުން 47 ފަރާތްތަކަށް ލޯނު ހަމަޖެހުނު ކަމަށް ޝަފާއު ވިދާޅުވި އެވެ.
ޝަފާއު ވިދާޅުވީ، ލޯނަށް އެދުނު 99 މީހުންގެ ތެރޭން 47 މީހުން ފިޔަވައި ބާކީ ތިބި މީހުންނަކީ ޝަރުތު ހަމަނުވާތީ ލޯނު ހަމަނުޖެހުނު މީހުން ކަމަށެވެ. ޝަރުތު ހަމަނުވެގެން 52 މީހަކަށް ލޯނު ހަމަޖެހިފައި ނުވާއިރު، އެޗްޑީސީން މީގެ ކުރިން ބުނެފައިވަނީ، ދީފައިވާ މުއްދަތުގައި ފައިސާ ހަމަނުޖެހޭ ފަރާތްތަކަށް ފައިސާ ދެއްކުމަށް އެހީތެރިވެދޭނެ ކަމަށެވެ.
ޓާޓާ ފްލެޓް ލިބެނީ ޖުމްލަ 266 މީހުނަށެވެ.
"ލޯނަށް އެދި ހުށަހެޅި 26 ފަރާތަކަށް މިހާރު ވާނީ ލޯނު ހަމަޖެހިއްޖެކަން ރަސްމީކޮށް އަންގާ އޮފާ ލެޓާ ހަވާލުކޮށްފައި، އިތުރު 26 މީހަކަށް ވެސް މިހާރު ވާނީ ލޯނު ހަމަޖެހޭނެކަން ސިޓީއަކުން އަންގާފައި، މި ހަފުތާ ތެރޭގައި އެ ފަރާތްތަކަށް ވެސް އޮފާ ލެޓާ ހަވާލުކުރާނެ،" ޝަފާއު ވިދާޅުވި އެވެ.
ޓާޓާ ފްލެޓްތަކަށް ފައިސާ ހަމަޖެއްސުމުގެ އުސޫލު އޮންނަ ގޮތުން، ބެންކުތަކުން ލޯނަށްވާ ފައިސާ އެޗްޑީސީއާ ހަވާލުކުރާނެ އެވެ. ލޯނު ހަމަޖެހޭ ފަރާތްތަކަށް ފްލެޓް ހަވާލުކުރާނީ ލޯނަށް ދައްކަން ޖެހޭ ޑައުންޕޭމަންޓް ހަލާސްކުރުމަށް ފަހު، އެޗްޑީސީ އާއި ލޯނު ދޭ ފަރާތް އަދި ފްލެޓްގެ ވެރިފަރާތާ ދެމެދު ހަދާ އެއްބަސްވުމަކަށް ފަހު ކަމަށް އެޗްޑީސީން މީގެ ކުރިން ވަނީ ބުނެފަ އެވެ. ޑައުން ޕޭމަންޓްގެ ގޮތުގައި ދައްކަންޖެހެނީ ހަތަރު ލައްކަ ރުފިޔާ އެވެ.
އިސްލާމިކް ބެންކުން ޕްރޮފިޓް ރޭޓުގެ ގޮތުގައި ނަގަނީ 9 ޕަސެންޓެވެ. ފްލެޓަށް ފައިސާ ދައްކަން ލޯނު ނަގާ ފަރާތަށް ގިނަވެގެން 20 އަހަރުގެ މުއަދަތެއް ދެއެވެ. އެހެންކަމުން އެމްއައިބީގެ ރޭޓުގައި ޓާޓާ ފްލެޓަކަށް 20 އަހަރުގެ ތެރޭގައި 3،454.939ރ. ދައްކަން ޖެހެ އެވެ. ބީއެމްއެލް، އެޗްޑީއެފްސީ ފަދަ ބޭންކުތަކުން ނަމަ 10-12 ދެމެދުގެ އިންޓްރެސްޓެއް ނަގަ އެވެ. އެ އަގުތައް ބޮޑުކަމަށް ބުނެ ފްލެޓް ލިބުނު ބައެއް މީހުން ވަނީ މީގެ ޝަކުވާ ކޮށްފަ އެވެ.
އެ މައްސަލައިގައި އެޗްޑީސީގެ ބަހެއް ނުލިބުނެވެ.