ޓިވެޓުން ޒުވާނުންނަށް ހިންގާ ތަމްރީން ޕްރޮގްރާމްތަކުގެ ފެންވަރު މަތި ކުރުމަށް އާ ޕްލޭންތަކެއް އެކުލަވައިލުމަށް އޮސްޓްރޭލިއާގެ ފަންނީ ބޭފުޅުންނާއެކު ފޯރަމެއް ފަށައިފި އެވެ.
އޮސްޓްރޭލިއާ ސަރުކާރުގެ ހިލޭ އެހީގައި ކްއީންސްލޭންޑް ޔުނިވަސިޓީ އޮފް ޓެކްނޮލޮޖީ އާއި އެޑިއުކޭޝަން މިނިސްޓްރީގެ ޓިވެޓް އޮތޯރިޓީ ގުޅިގެން މިއަދު ފެށި އެ ފޯރަމްގައި ގިނަ އަދަދެއްގެ ބޮޑެތި ކުންފުނިތަކާއި ސްކޫލްތައް އަދި ޒުވާނުންގެ ތެރޭން 37 ފަރާތެއް ބައިވެރިވެ އެވެ. ފޯރަމް ކުރިއަށްދާނީ އެއް ދުވަހަށެވެ.
ފަންނީ ދާއިރާތަކަށް ޒުވާނުން އަހުލުވެރި ކުރަން ޓިވެޓުން ހިންގާ އެކި ކޯސްތަކާއި ޕްރޮގްރާމްތަކުގައި އެއްކޮށް މަސައްކަތްކުރާ ކުންފުނިތަކާއި އެއްތަނަކުން ބައްދަލުކޮށް ޕްރޮގްރާމްތަކުގެ ފެންވަރު މަތިކުރުމާ ގުޅޭ ގޮތުން މިއަދުފެ ފޯރަމްގައި މަޝްވަރާކުރާނެ އެވެ. ބޭނުމަކީ ޓިވެޓުން ހިންގާ ޕްރޮގްރާމްތަކަކީ ރާއްޖޭގެ ކުންފުނިތަކާއި އިންޑަސްޓްރީތަކުގެ ބޭނުންތަކާ އެއްގޮތަށް ކުރިއަށްގެންދާ ތަމްރީން ތަކަކަށް ހެދުމެވެ.
ފޯރަމްގެ ފެށުމުގެ ރަސްމިއްޔާތުގައި އެޑިއުކޭޝަން މިނިސްޓަރު ޑރ. އާއިޝަތު ޝިހާމް ވިދާޅުވީ، ސަރުކާރުން މަސައްކަތްކުރަނީ ރާއްޖޭގެ ވަޒީފާގެ ބާޒާރުގައި ދިވެހި ޒުވާނުން އިތުރުކޮށް، ރާއްޖޭގެ ޒުވާނުންގެ ހުނަރު ތަރައްގީކޮށް ޒުވާނުންނަކީ ގައުމުގެ ތަރައްގީގެ ހިއްސާއަކަށް ހަދަން ކަމަށެވެ.
ޒުވާނުންނަށް ހަމަ އެކަނި ބޭނުންވަނީ މިހާރު ބާޒާރުގައި ހުރި ވަޒީފާތަކަށް ނޫން ކަމަށް އިޝާރާތް ކުރައްވާ މިނިސްޓަރު ވިދާޅުވީ، މީގެ ކުރިން އިސްކަން ދެވިފައި ނެތް ދާއިރާތަކުން ޒުވާނުން ތަރައްގީ ކުރުމަށް މިހާރު ބޮޑު އިސްކަމެއް ދޭ ކަމަށެވެ.