މާލޭގެ ސަހަރާތައް ފުރި، އިތުރަށް މީހުން ވަޅުލާނެ ޖާގަ ނެތުމާއެކު، މާލެއާއި ވިލިމާލޭގައި މަރުވާ މީހުން ހުޅުމާލޭގައި ވަޅުލުމަށް ނިންމައި އިސްލާމިކް މިނިސްޓްރީން އިއުލާންކުރީ މިދިއަ އަންގާރަ ދުވަހު އެވެ. އެ ނިންމުމާ އެއްގޮތަށް މާލެއަށް މަރުވި މައްޔިތަކު ފުރަތަމަ ފަހަރަށް ހުޅުމާލެއަށް ގެންގޮސް ހުޅުމާލޭގެ ސަހަރާގައި މިރޭ ވަނީ ވަޅުލާފަ އެވެ.
މިއަދު މާލޭގައި މަރުވި އެ މައްޔިތާގެ ވަޅުލުމުގެ ކަންކަން ފުރިހަމަ ކުރުމަށް ހުޅުމާލެއަށް ގެންދަން ފެރީއަށް އަރުވާފައިވަނީ މިއަދު އިރުއޮއްސި 6:30 ހާއިރު އެވެ. ހުޅުމާލޭ ފެރީއިން އެމްބިއުލާންސަށް މައްޔިތާ އަރުވައި ހިނަވާގެއާ ހަމައަށް ގެންދިއުމަށް ރެޑްކްރެސެންޓްގެ ދަރުމަވެރިން ވަނީ ހަރަކާތްތެރިވެފަ އެވެ. މައްޔިތާ ވަޅުލާފައިވަނީ މިރޭ ދިހައެއް ޖެހި އިރު އެވެ.
މާލެ-ވިލިމާލޭގައި މަރުވާ މީހުން ހުޅުމާލޭގައި ވަޅުލަން ފަށާފައިވާއިރު، މައްޔިތުން ހިނަވާ ކަފުން ކުރަން ހަމަޖެހިފައިވަނީ ވެސް ހުޅުމާލެ ސަހަރާގަ އެވެ. އަދި މައްޔިތާއާއެކު މައްޔިތާ އުފުލާ ފެރީގައި ގެންދަން ހަމަޖެހިފައިވަނީ ގިނަވެގެން އާއިލާގެ ތިން މީހުންނެވެ.
ހުޅުމާލޭގައި މާލެ ވިލިމާލޭގައި މަރުވާ މީހުން ވަޅުލަން ފެށުން އިއުލާންކުރުމަށްފަހު އިސްލާމިކް މިނިސްޓްރީން ބުނެފައިވަނީ، މައްޔިތުން އުފުލުމުގައި ހަރަކާތްތެރިވާނީ އެކަމަށް ތަމްރީން ލިބިފައި ތިބި ރެޑްކްރެސެންޓުގެ މީހުން ކަމަށެވެ. އަދި މައްޔިތާ ހުޅުމާލެއަށް ގެންދާ އުޅަނދުގައި އެއްފަހަރާ ދެ މައްޔިތުން ގެންދެވޭނެ ކަމަށާއި، ފެރީ ނޯންނަ ވަގުތެއްގައި މައްޔިތާގެ އާއިލާގެ މީހުން ހުޅުމާލެއަށް ދާން ޖެހިއްޖެ ހާލަތެއްގައި އެމްޓީސީސީން ފެރީގެ ހިދުމަތް ހަމަޖައްސައިދޭނެ ކަމަށެވެ.
ހުޅުމާލެ ސަހަރާއަކީ 21،000 އަކަފޫޓޫގެ ބޮޑު ސަހަރާ އެކެވެ. ވިލިމާލެ އާއި މާލެއިން މަރުވާ މީހުން ވަޅުލުން ހުޅުމާލެއަށް ބަދަލު ކުރީ މާފަންނު އާ ސަހަރާ ފުރިގެނެވެ.