ޖޫރިމަނާ ފައިސާގެ ގޮތުގައި އެންވަޔަރަމަންޓް ޕްރޮޓެކްޝަން އޭޖެންސީ (އީޕީއޭ) އިން ލިބެންޖެހޭ 19 މިލިއަނަށްވުރެ ގިނަ ފައިސާ ލިބިފައި ދައުލަތަށް ލިބިފައިނުވާ ކަމަށް އެންވަޔަރަމަންޓް މިނިސްޓްރީގެ 2015 ވަނަ އަހަރުގެ އޮޑިޓް ރިޕޯޓުން ހާމަކޮށްފި އެވެ.
ޖޫރިމަނާގެ ގޮތުގައި އީޕީއޭއިން މައިގަނޑުގޮތެއްގައި ހޯދާ ފައިސާއަކީ އިމާވެއްޓަށް ލިބޭ ގެއްލުންތަކާ ގުޅިގެން އެކި ފަރާތްތަކަށް ކަނޑައަޅާ ޖޫރިމަނާތަކެވެ. އޭގެ ތެރޭގައި ބޯޓުފަހަރު ފަރަށް އެރުމުން ލިބޭ ގެއްލުންތަކުންނާއި އެނޫންވެސް ތިމާވެއްޓަށް ގެއްލުން ލިބޭ ގޮތަށް ކުރާ އަމަލުތަކަށް ކުރާ ޖޫރިމަނާ ހިމެނެ އެވެ.
އޮޑިޓް އޮފީހުން މިދިއަ ހަފުތާގައި އާންމުކުރި އެ ރިޕޯޓުގައި ބުނެފައިވަނީ، ގިނަ ދުވަސްވީ ޖޫރިމަނާ ފައިސާ 2015 ވަނަ އަހަރު ނިމުނު އިރުވެސް އީޕީއޭ އަށް ލިބިފައި ނުވާ ކަމަށެވެ. އަދި އެ ފައިސާ ލިބެންޖެހޭ މުއްދަތުގައި ނުލިބިއްޖެނަމަ ކޯޓު މެދުވެރިކޮށްގެން ނަމަވެސް ދައުލަތަށް ލިބެންޖެހޭ ފައިސާ ހޯދުމަކީ އެ އިދާރާގެ ޒިންމާއަކަށް ވާއިރު، ފައިސާ ހޯދަން އެ އޭޖެންސީން އެއްވެސް މަސައްކަތެއް ކޮށްފައި ނުވާކަން ވަނީ ފާހަގަކޮށްފަ އެވެ.
"2015 ވަނަ އަހަރުގެ ނިޔަލަށް އީޕީއޭއަށް ލިބެންޖެހޭކަމަށް ލިޔެކިޔުންތަކުން ދައްކާ 19075760ރ. މިހާތަނަށް ލިބިފައިނުވާކަމާއި، މީގެ ތެރޭގައި 2009 ވަނަ އަހަރާއި 2011 ވަނަ އަހަރު ކޮށްފައިވާ ޖޫރިމަނާ ވެސް ހިމެނޭކަން ފާހަގަކުރެވުނެވެ،" ރިޕޯޓުގައި ބުނެފައިވެ އެވެ.
އެހާ ގިނަ ދުވަސްވީ ފައިސާ ނުލިބި ވަނީ ޖޫރިމަނާ ކުރާ ވަގުތުން ފެށިގެން ޖޫރިމަނާ ދައްކަންޖެހޭ ފަރާތަށް ގަވާއިދުން ލިބޭ އިސްތިއުނާފު ފުރުސަތަށް އެފަރާތުން އެދުމުން، ފައިސާ ހޯދަން އީޕީއޭއަށް ގާނޫނުން ލިބޭ ފުރުސަތު ހަނިވާތީ ކަމަށް މިމައްސަލާގައި އީޕީއޭ އިން ވަނީ ބުނެފަ އެވެ. ނަމަވެސް މި ފަދަ މައްސަލަތަކުގައި އީޕީއޭއިން ރިކޯޑު ބަލަހައްޓަންޖެހޭ ގޮތަށް އެކަންކަން ކޮށްފައި ނުވާތީ، ދައުލަތުގެ ފައިސާ ހޯދަން ފިޔަވަޅު އަޅާނަމަ އެކަން އެނގޭނެ ފުރިހަމަ ރިކޯޑު ބަލަހައްޓައި، ފިޔަވަޅު އެޅުމަށްފަހު ވެސް ފައިސާ ނުލިބޭނަމަ މައްސަލަތައް ޝަރީއަތަށް ހުށަހަޅަން އޮޑިޓާ ޖެނަރަލް ވަނީ އީޕީއޭއަށް ލަފާދެއްވާފަ އެވެ.