މިއަދު ފާހަގަ ކުރަމުންދާ ދުނިޔޭގެ ކެންސަރު ބަލީގެ ދުވަހާ ގުޅުވައިގެން ހުޅުމާލޭ ހޮސްޕިޓަލުން އިންތިޒާމްކޮށްގެން ގާޒީ ސްކޫލުގައި ކެންސަރަށް ސްކްރީންކޮށްދޭ ހާއްސަ ކޭމްޕެއް ފަށައިފި އެވެ.
ހުޅުމާލޭ ހޮސްޕިޓަލަކީ މީގެ ކުރިންވެސް ކެންސަރަށް ސްކްރީން ކޮށްދޭ ހޮސްޕިޓަލެކެވެ. ނަމަވެސް މިއަދު ކުރިއަށްދާ ޕްރޮގްރާމުގައި އެތަނަށް ޒިޔާރަތްކޮށް، ޓެސްޓު ހަދަން ބޭނުންވާ ހުރިހާ ފަރާތްތަކަށް މުޅިން ހިލޭ ސްކްރީން ކުރުމުގެ ފުރުސަތު އޮންނާނެ އެވެ.
މި ޕްރޮގްރާމުގައި ކެންސަރު ޖެހެން މެދުވެރިވާ ސަބަބުތަކާއި ރައްކާތެރިވުމަށް ކުރެވިދާނެ ކަންކަމާ ގުޅޭގޮތުން އާންމުންނަށް މައުލޫމާތު ދޭނެ ކަމަށް ހުޅުމާލެ ހޮސްޕިޓަލުން ބުންޏެވެ. އަދި މިމަހުގެ 11 ވަނަ ދުވަހު އެ ހޮސްޕިޓަލްގައި ބާއްވަން ހަމަޖެހިފައިވާ އަންހެނުންގެ ރަހިމަށް ޖެހޭ ކެންސަރަށް ސްކްރީން ކުރުމުގެ ހާއްސަ ޕްރޮގްރާމަށް ނަން ނޯޓުކޮށްދިނުން ވެސް މިއަދު ކުރިއަށްދެ އެވެ.
ކެންސަރު ބައްޔަކީ ގައިން ގަޔަށް ނާރާ ނުރައްކާތެރި ބަލިތަކުގެ ތެރޭން ރާއްޖޭގައި އެންމެ ގިނައިން މީހުން މަރުވާ އެއްބަޔެވެ. ދުވަހެއް ދުވަހަކަށް ބަލި ޖެހޭ ނިސްބަތް ދިވެހިންގެ ތެރޭގައި އިތުރުވަމުންދާއިރު، ކެންސަރު ޖެހޭ މީހުންގެ 22 ޕަސެންޓް މީހުންނަކީ ދުންފަތުގެ އިސްތިއުމާލުކުރުމުގެ ސަބަބުން ބަލި ޖެހޭ މީހުންނެވެ.