އުރަމަތީގެ ބަލިތަކަށް ހިދުމަތްދޭ ކްލިނިކެއް އައިޖީއެމްއެޗްގައި ގާއިމްކުރުމަށް، އުރަމަތީގެ ކެންސަރަށް ނަންބަރު ނެގުމަކާ ނުލައި ހިލޭ ސްކްރީންކޮށްދިނުމުގެ ހިދުމަތް އައިޖީއެމްއެޗްގައި މިއަދު ފަށައިފި އެވެ.
އުރަމަތީގެ ބަލިތަކަށް ހާއްސަ ކްލިނިކްގެ ހިދުމަތް ފެށުމަށް އައިޖީއެމްއެޗްގައި މިއަދު ބޭއްވި ރަސްމިއްޔާތެއްގައި ހިދުމަތް އިފްތިތާހުކޮށްދެއްވީ ފަސްޓްލޭޑީ މެޑަމް ފާތިމަތު އިބްރާހިމް އެވެ.
މެމޮގްރަފީ ބޭނުންކޮށްގެން އައިޖީއެމްއެޗްގައި އުރަމަތީގެ ކެންސަރަށް ސްކްރީންކުރުމުގެ ހިދުމަތް ފަށާފައިވީ ނަމަވެސް އެކަމަށް ވަކިން ހާއްސަ ސެންޓަރެއް އަދި ގާއިމްކޮށްފައެއްނުވެ އެވެ. ނަމަވެސް އުރަމަތީގެ ބަލިތަކަށް ހާއްސަ ވަކި ކްލިނިކެއް އައިޖީއެމްއެޗްގައި ވަރަށް އަވަހަށް ގާއިމްކުރަން ވަނީ ނިންމާފަ އެވެ.
މިއަދު ތައާރަފްކުރި ކެންސަރަށް ސްކްރީން ކުރުމުގެ ހިދުމަތްދޭން ހަމަޖެހިފައިވަނީ ކޮންމެ އަންގާރަ ދުވަހެއްގެ ހެނދުނު 8:00 އިން މެންދުރު 12:00 އަށެވެ. ސްކްރީން ކުރަން ބޭނުންވާ ފަރާތްތަކުން ނަންބަރު ނަގާކަށް ނުޖެހޭނެ އެވެ. އާސަންދައިގެ ދަށުން ސްކްރީން ކުރެވޭއިރު، އެއްވެސް ކަހަލަ މައްސަލައެއް ދިމާވެގެން ސާޖަންއެއްގެ އެހީ ހޯދަންޖެހޭ ހާލަތެއްގައި އެ ހިދުމަތްވެސް ހިލޭ ދިނުމަށް ވަނީ ނިންމާފަ އެވެ.
"އައިޖީއެމްއެޗުން އުރަމަތީގެ ކެންސަރަށް ސްކްރީން ކުރާ ފަރާތްތަކަށް ނަންބަރު ނެގުމަކާ ނުލައި ކޮންމެ ބުރާސްފަތި ދުވަހެއްގެ ހެނދުނު 8:00 އިން 12:00 އަށް މެމޯއެއް ހެއްދުމަށްފަހު ޑޮކްޓަރަށް ދައްކުމުގެ ހިދުމަތް ވެސް ދޭނެ، އޭރުން ނުޖެހޭނެ ނަން ނޯޓުކޮށް ކަންތައްތައް ކުރަން،" އައިޖީއެމްއެޗްއިން ބުންޏެވެ.
އުރަމަތީގެ ކެންސަރާއި އުރަމައްޗަށް ދިމާވާ އެކި މައްސަލަތަކަކީ ރާއްޖޭގައިވެސް އަންހެނުންނަށް ގިނައިން ދިމާވާ މައްސަލަތަކެކެވެ. އުރަމަތީގެ ކެންސަރު ޖެހުމުގެ ފުރުސަތު އެންމެ ބޮޑު ވަނީ 40 އިން މަތީގެ އަންހެނުންނަށެވެ.