ތިން ހާސް މީހުންގެ އާބާދީއެއް އޮންނަ ރ. އަލިފުށިން އެއްކޮށް ކަރަންޓު ކެނޑިއްޖެ އެވެ. މުޅި އަލިފުށި އަނދިރީގައި އޮތްއިރު ރައްޔިތުން ގެންދަނީ ކައުންސިލް އިދާރާ ކުރި މައްޗަށް އެއްވެ ކަންބޮޑުވުން ފާޅުކުރަމުންނެވެ.
އަލިފުށި ކައުންސިލްގެ ނައިބު ރައީސް އަބްދުލް ރަހްމާން ޔޫސުފް ވިދާޅުވީ، މިއަދު ހެނދުނުން ފެށިގެން އެ ރަށުން ކަރަންޓު ކެނޑެމުން ދިޔަ ކަމަށާއި އިޝާ ނަމާދު ވަގުތު ޖެހުނުތަނާހެން ކަރަންޓު ދިޔަ ގޮތަށް އެއްވެސް ވަރަކަށް ކަރަންޓު ނުލިބޭ ކަމަށެވެ.
"އިންޖީނުގެއާ ހަވާލުވެ ހުންނެވި ފަރާތުން މައުލޫމާތު ދެއްވާ ގޮތުގައި މިހާރު ރަށުގަ ހުރި ޖަނަރޭޓަރުން މި ރަށަށް ކަރަންޓެއް ނުދެވޭނެ، މާނައަކީ އަޅުގަނޑުމެންނަށް ދެން ކަރަންޓެއް ނުލިބޭނެއޭ، އެކަމަށް ހައްލެއް ގެނެވޭތޯ މަސައްކަތް ކުރަމުން މިދަނީ،" އަބްދުލްރަހްމާން ވިދާޅުވި އެވެ.
އޭނާ ވިދާޅުވީ، ރަށުގައި ދެ ޖަނަރޭޓަރު ހުންނަ ކަމަށާއި އެއް ޖަނަރޭޓަރަކީ 400 ކިލޯ ވޯޓްގެ ޖަނަރޭޓަރަކާއި 600 ކިލޯ ވޯޓްގެ ޖަނަރޭޓަރެއް ކަމަށެވެ. އޭގެ ތެރެއިން 600 ކިލޯ ވޯޓްގެ ޖަނަރޭޓަރަށް ބޮޑެތި މައްސަލަތަކެއް ދިމާވެ ކަރަންޓު ނަގައިނުދޭ ކަމަށާއި އެ ޖަނަރޭޓަރުން މިހާރު ނަގައިދެނީ 130 ކިލޯ ވޯޓުގެ ކަރަންޓު ކަމަށެވެ. ދެން ހުރި 400 ކިލޯ ވޯޓު ޖަނަރޭޓަރުން ވެސް ރަށަށް އެއްކޮށް ކަރަންޓު ދެވޭ ވަރަށް ކަރަންޓު ނަގައިނުދޭ ކަމަށާއި އެ ޖަނަރޭޓަރުން ނަގައިދެނީ 300 އެއްހާ ކިލޯ ވޯޓުގެ ކަރަންޓު ކަމަށް އަބްދުލްރަހްމާން ވިދާޅުވި އެވެ.
އަބްދުލްރަހްމާން ވިދާޅުވީ، އެ ޖަނަރޭޓަރުތަކުން އުފައްދާ ކަރަންޓު ފޯރުކޮށްދެވެނީ މަދު ވަގުތުކޮޅަކަށް ކަމަށާއި އެހެންވެ އިރުއިރު ކޮޅާ ކަރަންޓު ދާ ކަމަށެވެ. އެގޮތަށް ކަރަންޓު ދޫކުރަން ރައްޔިތުން ބޭނުންނުވާ ކަމަށާއި އޭގެ ސަބަބުން ބޮޑެތި ގެއްލުންތަކެއްވަމުންދާ ކަމަށް ވެސް ވިދާޅުވި އެވެ.
އަލިފުށީގައި މީހުން ދިރިއުޅޭ 400 އެއްހާ ގޭބިސީ ހުރެ އެވެ.
މިރޭ އެ ރަށަށް ކަރަންޓު ލިބޭނެ ކަމުގެ އެއްވެސް އުއްމީދެއް ނެތްއިރު އެ ރަށުގައި ބޭނުންވާ މިންވަރަށް އުއްބަތި އާއި ސާފުތެޔޮފަދަ ތަކެތި ވެސް ރަށުގައި ނެތް ކަމަށް އަބްދުލްރަހްމާން ވިދާޅުވި އެވެ.
"ރަށް މި އޮތީ އަނދިރީގައި، އަނދިރީގައި ތިބެން ވެސް ޖެހޭނީ، ކަންބޮޑުވުންތައް އެބަހުރި ވަރަށް ބޮޑަށް،" އަބްދުލްރަހްމާން ވިދާޅުވި އެވެ.