މަޖިލީސް މެންބަރުކަން ގެއްލިފައިވާ ކަމަށް އިލެކްޝަން ކޮމިޝަން (އީސީ) އިން ކަނޑައަޅާފައިވާ އެ މަޖިލީހުގެ ތުލުސްދޫ ދާއިރާގެ މެންބަރު ކަން ކުރެއްވި މުހައްމަދު ވަހީދު އިބްރާހިމް (ވައްޑޭ) ގެ ބަންދަށް ކުރިމިނަލް ކޯޓުން 15 ދުވަސް ޖަހައިފި އެވެ.
ކޯޓު އަމުރެއްގެ ދަށުން ރޭ ވައްޑޭ ހައްޔަރު ކޮށްފައިވަނީ މ. ކުނޫޒް ކައިރިންނެވެ. ވައްޑޭ ހައްޔަރު ކޮށްފައިވަނީ ރައްޔިތުން މަޖިލީހުގެ މެންބަރުން ނޫން ކަމަށް ކަނޑައަޅާފައިވާ ބަޔަކު، ފުލުހުންގެ ސަފުތައް ފަޅާލައި ރައްޔިތުން މަޖިލީހުގެ އިދާރާއަށް ވަދެފައިވާ ކަމަށް ތުހުމަތުކޮށެވެ. އިއްޔެ މެންދުރުފަހު މަޖިލީހުގެ އިދާރާގެ ތެރެއަށް ވަދެ ވަޑައިގެންނެވުމުގެ ސަބަބުން ވެސް ވައްޑޭ ހައްޔަރު ކޮށްފަ އެވެ. ނަމަވެސް އިއްޔެ އިރުއޮއްސުނު އިރު ވައްޑެ ވަނީ ދޫކޮށްލާފަ އެވެ
ވައްޑޭ ރޭ ހައްޔަރުކޮށްފައިވާއިރު، މަޖިލީހުގެ ގޮނޑި ގެއްލުނު ކަމަށް އިލެކްޝަން ކޮމިޝަނުން ނިންމުމުން އެ މައްސަލަ އޭނާ ވަނީ ސުޕްރީމް ކޯޓަށް ހުށަހަޅާފަ އެވެ. އަދި އިއްޔެ ވަނީ އެ މައްސަލަ ސުޕްރީމް ކޯޓުން ބަލައިވެސް ގަނެފަ އެވެ. އަދި ތިން ދުވަސް ތެރޭގައި މައްސަލަ ކޯޓުގައި ރަޖިސްޓްރީކުރުމަށް ވެސް ވަނީ އަންގާފަ އެވެ.
ވައްޑެ ކޯޓުގެ އަމުރެއްގެ ދަށުން ހައްޔަރުކޮށްފައިވާއިރު، މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫން ވެސް މިހާރު ހުންނެވީ ހައްޔަރުގަ އެވެ. އޭނާ ހައްޔަރުކޮށްފައިވަނީ މަޖިލިސް މެންބަރުންނަށް ރިޝްވަތު ދެއްވަން އުޅުމުގެ ތުހުމަތުގަ އެވެ.