އިދިކޮޅު އެމްޑީޕީގެ ޕާލިމެންޓަރީ ގްރޫޕްގައި ހިމެނިވަޑައިގަންނަވާ ތިން މެންބަރަކާއި ޖޭޕީއަށް ނިސްބަތްވާ ކެންދޫ ދާއިރާގެ މެންބަރު އަލީ ހުސެއިން ފުލުހަށް ހާޒިރުވުމަށް އަންގައިފި އެވެ. ފުލުސް އޮފީހަށް ހާޒިރުވާން އަންގާފައި ވަނީ ހިތަދޫ މެދު ދާއިރާގެ އިބްރާހިމް މުހައްމަދު ދީދީ (ޑީޑީ)އާ ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު އަދި ހިތަދޫ އުތުރު ދާއިރާގެ މުހައްމަދު އަސްލަމް އެވެ.
އަސްލަމް ފުލުހަށް ހާޒިރުވުމަށް އަންގާފައި ވަނީ މިއަދު ހަވީރު 5:00 ހާއިރަށެވެ. އަދި ޝާހިދު މިރޭ 8:00 ހާއިރު ފުލުހަށް ހާޒިރުވާން އަންގާފައިވާ އިރު ޑީޑީ ހާޒިރުވާން އަންގާފައި ވަނީ މާދަމާ ރޭ 8:00 ހާއިރު އެވެ. ހުސެން ހާޒިރު ކުރަން އެންގީ މާދަމާ 3:30 އަށެވެ.
މީގެ ކުރިން ވަނީ އިދިކޮޅު އެ ޕާޓީގެ ޕީޖީ ގްރޫޕް ލީޑަރު އަދި ހިންނަވަރު ދާއިރާގެ އިބްރާހީމް މުހައްމަދު ސޯލިހު (އިބޫ)އާ ކިނބިދޫ ދާއިރާގެ މެމްބަރު އަބްދުﷲ ރިޔާޒް އަދި މާފަންނު ހުޅަނގު ދާއިރާގެ މުހައްމަދު ފަލާހު ވެސް ފުލުސް އޮފީހަށް ހާޒިރުކޮށްފަ އެވެ. އެ ތިން މެންބަރުންނާ ވެސް ސުވާލުކޮށްފައި ވަނީ މިދިޔަ މަހު 24 ވަނަ ދުވަހު ކުރި މުޒާހަރާގައި ފުލުހުންގެ ސަފުތައް ފަޅާލައި މަޖިލީހަށް ވަތް މައްސަލާގަ އެވެ.
އެގޮތުން ހަތަރު ތުހުމަތެއް އެ މެންބަރުންނަށް ފުލުހުން ވަނީކޮށްފަ އެވެ. އެއީ ފުލުހުންގެ ސަފުތައް ފަޅާލުމާއި މާރަމާރީ ހިންގާ ގޮތަށް އަމަލުތައް ހުރުމާއި ފުލުހުންގެ ވާޖިބަށް ހުރަސް އެޅުން އަދި މަނާ ތަންތަނުގައި އެއްވެ އުޅުން ކަމުގެ ތުހުމަތެވެ. ނަމަވެސް އެ މެންބަރުން ވަނީ ތުހުމަތުތައް އިންކާރުކޮށް ބަޔާން ދީފަ އެވެ.
ފުލުހުން ކުރިން ބުނެފައިވަނީ ސަފުތައް ފަޅާލާ މަޖިލީހަށް ވަނުމަށް މަސައްކަތް ކުރި މައްސަލަ ބަލާ އެ ފަރާތްތަކާ މެދު ފިޔަވަޅު އަޅާނެ ކަމަށެވެ.