ރާއްޖޭގައި އޮތް ނިޒާމްތަކަކީ އެންމެ ފުރިހަމަ ނިޒާމްތަކެއް ނޫން ކަމަށާއި އެ ނިޒާމްތައް ފުރިހަމަ ނުވަނީ ހަމައެކަނި ބައްޓަން ކޮށްފައިވާ ގޮތުން އެކަނި ނޫން ކަމަށް ރައީސް އަބްދުﷲ ޔާމީން ރޭ ވިދާޅުވެއްޖެ އެވެ. ރައީސް ވިދާޅުވީ، އިންސާނުން ނިޒާމްތައް ހިންގުމުގެ ޒިންމާ ނަގައިގެން ތިބޭއިރު ގޯސްތައް ހެދޭނެ ކަމަށެވެ.
ހުޅުމާލޭގައި ޕާކަކާއި އިޖުތިމާއީ މަރުކަޒެއް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ނިޒާމްތައް ފުރިހަމަ ނުވަނީ އެ ލިޔެފައިހުރި ގޮތުން އެކަނި ނޫން ކަމަށާއި ނިޒާމްތައް ފުރިހަަމަ ނުވަނީ އެ ތަންފީޒުކުރަން ތިބޭ މީހުންނަކީ އިންސާނުން ކަމަށްވާތީ ކަމަށެވެ.
"އިންސާނުންނަކީ އިންސާނުންގެ ހުރި އުނި ސިފަތަކާއެކު މަސައްކަތް ކުރާ ބައެއް، އެ އުނި ސިފަތައް ހުންނާނެ ހުރިހާ އިންސާނުންގެ ވެސް، އެ އުނި ސިފަތައް ހުންނާނެ އިންސާނުން ކޮންމެ މަތިވެރި ދަރަޖައަކާ ހަމައަށް ދިޔަ ނަމަވެސް، އެ އުނި ސިފަތައް އެ މީހުން ހަވާލުވާ ޒިންމާތަކުން ފެނިގެންދާނެ، މި އުޅެނީކީ ހަމައެކަނި ގާނޫނުގަ ހުރި މައްސަލަތަކެއް ނޫން،" ރައީސް ވިދާޅުވި އެވެ.
ރައީސް ޔާމީން ވިދާޅުވީ، ޑިމޮކްރަސީއަކީ ގިނަ ބަޔަކު އެއްބަސްވާ ގޮތުގެ މައްޗަށް ބިނާކޮށް އެކުލަވާލެވޭ ހިންގުމުގެ ނިޒާމެއް ކަމަށާއި އެ ހިންގަން ތިބެނީ އިންސާނުން ކަމަށެވެ. ކޮންމެ ޒިންމާއަކާ ހަވާލުވި ނަމަވެސް އުނިކަން ފެނިގެންދާނެ ކަމަށެވެ. ޒިންމާތައް އުފުލާއިރު ކަންކަން ގޯސްވެގެން ދަނީ ވަކި ބަޔަކު ވަކި ދުވަސްވަރަކު އެ ޒިންމާތަކާ ހަވާލުވެ ތިބުމުން ނޫން ކަމަށް ވެސް ރައީސް ވިދާޅުވި އެވެ.
"މިހާރު މި އޮތް ސަރުކާރުން މަސައްކަތް ކުރާނީ ނިޒާމްގެ ތެރެއިން ކަންކަން ކުރަން، އަޅުގަނޑުމެން އިދިކޮޅު ތިބި ފަރާތްތަކަށް ވެސް މި ދަންނަވަނީ ސަރުކާރު ޖަވާބުދާރީކުރުވުމަކީ ކުރަން ޖެހޭ ކަމެކޭ، ސަރުކާރު ޖަވާބުދާރީކުރުވަން ޖެހޭނެ، އެކަމަކު ސަރުކާރު ޖަވާބުދާރީކުރުވަން ޖެހޭނީ އޭގެން ނުކުންނަ ރަނގަޅު ނަތީޖާ ހިއްސާކުރަން ތިބި ބަޔަކީ ދިވެހި ރައްޔިތުން ކަމަށްވާއިރު އެމީހުންގެ މޫނު ތަކަށް ހިނިތުންވުން ގެނެސްދެވޭ ކަހަލަ ގޮތަކަށް،" ރައީސް ވިދާޅުވި އެވެ.
ރައީސް ވިދާޅުވީ، އިސްލާމް ދީނާއި ގާނޫނާ ހިލާފު ކަންތައްތަކެއް އެމަނިކުފާނު ކުރައްވައިގެން އިދިކޮޅު ފަރާތްތަކުން އެއްވެ އަޑުއެފުލާކަށް ނުޖެހޭނެ ކަމަށެވެ. އެ ފުރުސަތެއް ނުލިބޭނެ ކަމަށާއި އެއީ އެމަނިކުފާނުގެ ސަރުކާރުން ވެސް ގަބޫލުކުރާ ކަންތައްތަކެއް ނޫން ކަމަށެވެ. ރައީސް ވިދާޅުވީ، މި ސަރުކާރުގެ އަމާޒަކީ ދިވެހި ރައްޔިތުންނަށް ހިތްހަމަޖެހިލައިގެން ނޭވާލައި ދިރިއުޅޭވޭނެ ގޮތް ހަދައިދިނުން ކަމަށެވެ.