ރައްޔިތުންގެ މަޖިލީހުގެ ދެބައިކުޅަ އެއްބައި މެންބަރުންނަށްވުރެ ގިނަ މެންބަރުން މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ބުނެ ގަރާރެއްގައި ސޮއިކޮށް ހުށަހަޅާފައިވާތީ މަސީހުގެ ގާނޫނީ ހައިސިއްޔަތު ގެއްލިފައިވާ ކަމަށް ގާނޫނީ ބޭފުޅެއް ކަމަށްވާ މައްޗަންގޮޅި އުތުރު ދާއިރާގެ މެމްބަރު މާރިޔާ އަހުމަދު ދީދީ ވިދާޅުވެއްޖެ އެވެ.
"އަވަސް"އަށް ދެއްވި އިންޓަވިއުއެއްގައި މާރިޔާ ވިދާޅުވީ، މާރިޔާ ވިދާޅުވީ، މަޖިލީހުގެ ރައީސްގެ ހައިސިއްޔަތުން މަސީހު މިހާރު ކަންކަން ކުރެއްވި ނަމަވެސް 45 މެންބަރުން އޭނާގެ އިތުބާރު ނެތް ކަމަށް ސޮއިކުރައްވާފައިވާތީ މަޖިލީހުގައި އޭނާގެ އިތުބާރު ނެތްކަން އެނގިގެންދާ ކަމަށެވެ. ރައީސްގެ ހައިސިއްޔަތުން މަސައްކަތްތައް ކުރެއްވި ނަމަވެސް މަޖިލީހެއްގެ ރައީސެއްގައި ހުންނަންޖެހޭނެ ލެޖިޓިމެސީއެއް ނެތް ކަމަށެވެ.
"އޭނާގެ އިތުބާރު ނެތް ކަމަށް 45 މެންބަރުން އެވަނީ ސޮއިކުރައްވާފަ، އޭނާގެ ލެޖިޓިމެސީ ވަނީ ގެއްލިފަ، ގަދަބާރުން އެކި ގޮތްގޮތަށް ހުންނެވިއެކޭ ކިޔާފަ މިއަދު މަޖިލީހުގެ ރައީސެއްގެ އެ ހުންނަންޖެހޭ ލެޖިޓިމެސީއެއްގަ ނޫން އެ ކަންތައްތައް ކުރެވެނީއެއް،" މާރިޔާ ވިދާޅުވި އެވެ.
ފުރަތަމަ އޮތް ގޮތުން 15 މެންބަރުންގެ ސޮޔާއެކު މަޖިލީހުގެ ރައީސްގެ އިތުބާރު ނެތް ކަމަށް ހުށަހެޅޭނެ އެވެ. އޭރަކުން އަދި މަޖިލީހުގެ މެޖޯރިޓީ ރައީސްއާ ދޭތެރޭ ދެކޭ ގޮތެއް ނޭނގެ އެވެ. ނަމަވެސް ސަރުކާރުން ވަނީ މަޖިލީހުގެ ގަވައިދަށް ބަދަލު ގެނެސް 42 މެންބަރުންގެ ސޮޔާއެކު ނޫނީ އިތުބާރު ނެތް މައްސަލަ ހުށަނޭޅޭނެ ކަމަށް ކަނޑައަޅާފަ އެވެ. ފަހުން މަސީހާ ދެކޮޅަށް 45 މެންބަރުން ސޮޔާއެކު އިތުބާރު ނެތް ކަމުގެ މައްސަލަ ވެއްދި އެވެ. އެއް މެންބަރަކު ސޮއި ގެންގޮސްފައިވާތީ 44 މެންބަރުންނެވެ. އެއީ މަސީހު ރައީސް ކަމަށް ގެނައި އަދަދަށް ވެސް އިތުރު އަދަދެކެވެ. މަޖިލީގެ މެޖޯރިޓީ އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތިބާރު ނެތް ކަމަށް މައްސަލައެއް ހުށަހަޅާފައިވަނިކޮށް މެންބަރުންތަކެއް ގޮނޑި ގެއްލިއްޖެ ކަމަށް އިލެކްޝަން ކޮމިޝަނާއި މަޖިލީހުން ނިންމާފައިވަނީ، ލިބިފައިނުވާ ބާރެއް ބޭނުންކޮށްގެން ގާނޫނު އަސާސީއާ ހިލާފަށް ކަމަށް މާރިޔާ ވިދާޅުވި އެވެ.
"އެ ގަރާރު ލާފަ އޮތްވަ މަޖިލިސް މެންބަރުންތަކެއް ހައްޔަރުކޮށް އެތައް މެންބަރުންގެ ގޮނޑި ގެއްލުނު ކަމަށް އެމީހުން އަމިއްލައަށް ނެތް ބާރެއް ބޭނުންކޮށްގެން އެވަނީ ނިންމާފަ، އިލެކްޝަން ކޮމިޝަންގެ ވެސް ރައްޔިތުންގެ މަޖިލީހުގައި ވެސް ނެތް ބާރެއް ބޭނުންކޮށްގެން އެގޮތަށް އެމީހުން ނިންމައިގެން މިއީ މެންބަރުން ނޫން ކަމަށް ވިދާޅުވެ ކަން ކުރައްވާ ކަމަށްވާނަމަ އެ ކަން ކުރެއްވެނީ ގާނޫނު އަސާސީއާ އެއްގޮތަކަށް ނޫން،" މާރިޔާ ވިދާޅުވި އެވެ.
މާރިޔާ ވިދާޅުވީ، މަޖިލީހަކީ ވަކި ބާރެއް ކަމަށެވެ. ގާނޫނު އަސާސީ އާއި ގާނޫނުތަކުން އެކަން ވަރަށް ސާފު ކަމަށެވެ. އެހެންކަމުން އެހެން ބާރުތަކުން އެ ބާރަށް އިހްތިރާމް ކުރަންޖެހޭނެ ކަމަށެވެ. ނަމަވެސް މިހާރު ލީކްވެފައިވާ ޑިފެންސް މިނިސްޓަރު އާދަމް ޝަރީފް ކަމަށް ބުނާ ބޭފުޅާގެ އޯޑިއޯގައި އެ ބޭފުޅާ ދެއްކެވި ވާހަކައިން ގާނޫނު ހަދާ ބާރަށް އެ ބޭފުޅާ އިހްތިރާމް ނުކުރައްވާކަން ދޭހަވާ ކަމަށެވެ.
"އިވިގެން ދިޔަ ޓޭޕްގަ އެ ވާހަކަ ދައްކަވަނީ ޑިފެންސް މިނިސްޓަރު ކަމަށްވާނަމަ އެ ދެއްކެވީ ވަރަށް ދަށު ދަރަޖައެއްގެ ވާހަކައެއް، ތިމަންނަ އެތަނަށް ދިޔަނަމަ މެންބަރުންގެ ދަތްދޮޅި ދުއްވާލާނަމޭ، މިއީ ދެން އެއް ބާރު އަނެއް ބާރާ ވަކިވެފައި އޮންނައިރު އެއް ބާރުން އަނެއް ބާރަށް ދޭންޖެހޭ އިހްތިރާމް ނުދެވި ރަސްމީ ހައިސިއްޔަތެއްގައި ވަޑައިގެން ރަސްމީ ބައްދަލުވުމެއްގައި ދައްކަވާ ކަހަލަ ވާހަކައެއް ނޫން،" މާރިޔާ ވިދާޅުވި އެވެ.
އެ އޯޑިއޯގައި ޑިފެންސް މިނިސްޓަރު ޕްރޮސިކިއުޓާ ޖެނަރަލްގެ ލަފާ ހޯދާ ކަމަށް ވިދާޅުވާ ކަމަށާއި އެއީ އެކަން ކުރެވިގެންވާނެ ގޮތް ނޫން ކަމަށް މާރިޔާ ވިދާޅުވި އެވެ. ޕީޖީއަކީ މިނިވަން ބޭފުޅަކަށްވާއިރު ސަރުކާރުގެ ޑިފެންސް މިނިސްޓަރަށް ލަފާ ނުދެވޭނެ ކަމަށެވެ.
"ޕްރޮސިކިއުޓާ ޖެނަރަލްގެ ލަފާ ނަގަމޭ ވެސް ވިދާޅުވި، ހަގީގަތު ޕީޖީއަކީ މިނިވަން ބޭފުޅެއް، އެ ބޭފުޅާގެ ލަފާ ނަންގަވައިގެން އެ ބޭފުޅުން ތަހުގީގު ހިންގަވާ ކަމަށްވާނަމަ އެ ބޭފުޅާގެ މިނިވަންކަން ވެސް ގެއްލިގެންދޭ، އެއީ ޑިފެންސް މިނިސްޓަރު ދެއްކެވި ވާހަކައަކަށްވާނަމަ ބަންޑާރަ ނައިބާއި ޕީޖީއާ މި ހުރިހާ ބޭފުޅުން ގޭންގްއަޕް ކުރައްވައިގެން މެންބަރުންނާމެދު ދެކެވަޑައިގަންނަވާހެން މި ވާހަކައެއް މި ދައްކަވަނީ،" މާރިޔާ ވިދާޅުވި އެވެ.
މާރިޔާ ވިދާޅުވީ، ތިން ބާރު ވަކިވެގެން އޮންނައިރު މަޖިލީހުގެ ތަޅުމުގެ ތެރޭގައި ހިންގާ ކަންކަމުގައި މެންބަރުންނަށް އިމްތިޔާޒުތައް ލިބިގެންވާ ކަމަށެވެ. އަދި އެއީ ލިބެން ވެސް ޖެހޭ އިމްތިޔާޒުތަކެއް ކަމަށާއި މެންބަރުން ކުރާ މަސައްކަތްތަކަކީ އެ ބާވަތެއްގެ މަސައްކަތެއް ކަމަށް މާރިޔާ ވިދާޅުވި އެވެ.
މާރިޔާ މިހެން ވިދާޅުވިއިރު މަޖިލީހުގެ ތެރޭގައި މެންބަރުން ސިފައިންނާމެދު މާރާމާރީ ހިންގި ކަމަށް ބުނެ ޑިފެންސް މިނިސްޓަރު އިސްވެ ހުށަހަޅާފައިވާ މައްސަލައެއްގެ ޖިނާއީ ތަހުގީގު ފުލުހުން ވަނީ ފަށާފަ އެވެ. އަދި އެ މައްސަލާގައި ބައެއް މެންބަރުންގެ ޕާސްޕޯޓް ވަނީ ހިފަހައްޓާފަ އެވެ.