ސުލޫކީ ކޮމެޓީއިން އަޅާ ފިޔަވަޅެއްގެ ސަބަބުން ރައްޔިތުންގެ މަޖިލީހުގެ މެންބަރުންގެ ގޮނޑި ނުގެއްލޭނެ ކަމަށް އެޓާނީ ޖަނަރަލް މުހައްމަދު އަނިލް ގަބޫލުކުރެއްވިކަން މިއަދު ދައުލަތުގެ އަމަލުތަކުގެ ސަބަބުން ހާމަވެފައިވާ ކަމަށް މަޝްހޫރު ގާނޫނީ ވަކީލް މައުމޫން ހަމީދު ވިދާޅުވެއްޖެ އެވެ.
މައުމޫން ހަމީދު މިހެން ވިދާޅުވީ، ސިޔާސީ ޕާޓީތަކުގެ ގާނޫނުގެ 16 ވަނަ މާއްދާގެ (ބ) ބާތިލުކުރުމަށް މިއަދު ސުޕްރީމް ކޯޓުގައި އެދިފައިވާތީ އެވެ. އެ މާއްދާގައި ބުނެފައި ވަނީ، ސިޔާސީ ޕާޓީއެއްގެ ޓިކެޓްގައި އިންތިހާބުވެފައިވާ މީހަކު ޕާޓީގެ ސުލޫކީ މިންގަނޑާ ހިލާފުވެގެން ޕާޓީން ވަކިކުރި ކަމުގައި ވިޔަސް އެ މީހަކު އިންތިހާބުވެފައިވާ މަގާމު ނުގެއްލޭނެ ކަމަށެވެ.
އެކަމާ ގުޅިގެން މައުމޫން ހަމީދު ކުރެއްވި ޓްވީޓެއްގައި ވިދާޅުވީ، އެ މާއްދާ ބާތިލުކުރަން ދައުލަތުގެ ފަރާތުން އެދުނީ، ޕާޓީ ބަދަލުކުރި ނަމަވެސް ރައްޔިތުންގެ މަޖިލީހުގެ މެންބަރުންގެ ގޮނޑި ނުގެއްލޭނެކަން އޭޖީ ގަބޫލުކުރައްވާތީ ކަމަށެވެ. އެ ނޫން ސަބަބެއް އެކަމުގައި ނެތް ކަމަށެވެ.
ބަންޑާރަ ނައިބުގެ އޮފީހުގެ ފަރާތުން އެ މާއްދާ ބާތިލުކުރުމަށް އެދެމުން މިއަދު ޝަރީއަތުގެ މަޖިލީހުގައި ސީނިއާ ސްޓޭޓް އެޓާނީ މާޝާ ލުތުފީ ވިދާޅުވީ، އެ މާއްދާއަކީ ޕާޓީ ބަދަލު ކުރާ މެންބަރުން ގޮނޑި ގެއްލޭނެ ކަމަށް ސުޕްރީމް ކޯޓުން ދާދި ފަހުން އިއްވި ހުކުމާ ފުށުއަރާ މާއްދާއެއް ކަމަށެވެ. އެހެންވެ، އެ މާއްދާ ބާތިލް ކަމަށް ކަނޑައަޅައި ދިނުމަށް ވަކީލް އެދިވަޑައިގެންނެވި އެވެ. ވަކީލް މާޝާ ވިދާޅުވީ، މެންބަރުންގެ ގޮނޑިއާ މެދު ސުވާލު އުފެދިގެން ހުށަހަޅާފައިވާ ދުސްތޫރީ މައްސަލާގެ ހުކުމުގައި އެ މާއްދާ ބާތިލު ކަމަށް ކަނޑައެޅިދާނެ ކަމަށް ގަބޫލުކުރައްވާ ކަމަށެވެ.
މިކަމާ ގުޅިގެން ގޮނޑި ގެއްލިއްޖެ ކަމަށް ކަނޑައަޅާފައިވާ ތިން މެންބަރެއްގެ ގާނޫނީ ވަކީލް ހިސާން ހުސެއިން ވިދާޅުވީ، ސުޕްރީމް ކޯޓުގެ ހުކުމާ ތައާރަޒުވާ ކަމަށް ބުނެ އެ މާއްދާ އުވާލަން ދައުލަތު އެދުނު ނަމަވެސް އެއީ ހުކުމާ ތައާރަޒުވާ މާއްދާއެއް ނޫން ކަމަށެވެ. ސުޕްރީމް ކޯޓުގެ ހުކުމް ތަފްސީލްކޮށްދީ ނެރުނު އަމުރުގައި ސިޔާސީ ޕާޓީތަކުގެ ގާނޫނަށް އަމަލުކުރުން އިސްތިސްނާ ނުވާ ކަމަށް ބަޔާންކޮށްފައިވާ ކަމަށެވެ.
"ހަގީގަތުގައި ސުޕްރީމް ކޯޓުގެ ނިންމުމާއި އެ ގާނޫނަކީ އެކީގަ ކިޔަން ޖެހޭނެ ދޭތި، އެހެން ކިޔާ ކަމަށްވާނަމަ ސިޔާސީ ޕާޓީ ގާނޫނުގެ 16 ވަނަ މާއްދާގެ (ބ) މި ކިޔަން ޖެހެނީ ސުޕްރީމް ކޯޓުން ކަނޑައަޅާފައިވާ ކަންކަމުގެ އިސްތިސްނާއެއްގެ ގޮތުގަ، އެ ނޫން ގޮތަކަށް އެ މާއްދާ ކިޔައި މާނަ ކުރެވިގެން ނުވާނެ،" ހިސާން ވިދާޅުވި އެވެ.
ހިސާން ވިދާޅުވީ، ސުލޫކީ ކޮމެޓީއެއްގެ ހަތަރު މެންބަރުން އެކުވެގެން ރައްޔިތުން އިންތިހާބުކޮށްފައިވާ މެންބަރެއްގެ ގޮނޑި ގެއްލުވާލެވޭ ގޮތަށް އޮތުމަކީ ހަމަޖެހޭ ކަމެއް ނޫން ކަމަށެވެ. ގަބޫލު ކުރައްވާ ގޮތުގައި ސުޕްރީމް ކޯޓު ވެސް ދެކެނީ އެހެން ކަމަށާއި އަމުރުގައި އެކަން ތަފްސީލްކޮށް ދީފައިއެވަނީ އެ ސަބަބަށްޓަކައި ކަމަށެވެ.
"ސިޔާސީ ޕާޓީތަކުގެ ގާނޫނަށް ތަބާވާން ޖެހޭނެ ކަމަށް އަމުރުގައި ތަކުރާރުކޮށް ބަޔާންކޮށްދީފައިވޭ،" ހިސާން ވިދާޅުވި އެވެ.
ސުޕްރީމް ކޯޓުގެ ހުކުމުގައިވާ ގޮތުން މެންބަރަކު އިންތިހާބުވާ ޕާޓީއިން ވަކިވެއްޖެނަމަ ނުވަތަ ވަކިކޮށްފިނަމަ ނުވަތަ އެހެން ޕާޓީއަކާ ގުޅިއްޖެނަމަ އެ މެންބަރެއްގެ ގޮނޑި ގެއްލޭނެ އެވެ. ޕީޕީއެމްގެ ސުލޫކީ ކޮމެޓީ މައްސަލައެއް ބަލައި އެޅި ފިޔަވަޅެއްގެ ސަބަބުން އެ ޕާޓީގެ ހަ މެންބަރެއްގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ވަނީ ބުނެފަ އެވެ. އޭގެ ތެރެއިން ހަތަރު މެންބަރަކު ވަނީ އެ މައްސަލަ ސުޕްރީމް ކޯޓުގައި އިލްތިމާސްކޮށްފަ އެވެ.