ރާއްޖެ ޓީވީ ސީއީއޯ ހުސެއިން ފިޔާޒު މޫސާގެ މައްޗަށް ދައުލަތުން އުފުލާފައިވާ ދައުވާގައި ހުކުމް އިއްވުމަށް މިއަދަށް ތާވަލުކުރި އަޑުއެހުން ކެންސަލްކޮށްފި އެވެ. އެ އަޑުއެހުން ތާވަލުކުރީ، މިއަދު މެންދުރުފަހު 2:00 ށެވެ.
މިކަމާ ގުޅިގެން ކުރިމިނަލް ކޯޓުގެ ބަހެއް ނުލިބެ އެވެ. ނަމަވެސް ފިޔާޒުގެ ވަކީލް ސަފާ ޝަރީފް ވިދާޅުވީ، މިއަދުގެ އަޑުއެހުން ކެންސަލްކޮށްފައިވާކަން އަންގާފައިވާ ކަމަށެވެ. އޭގެ ސަބަބެއް ނޭނގެ އެވެ.
ފިޔާޒުގެ މައްޗަށް ދައުލަތުން އުފުލާފައިވަނީ އަތްލުމުގެ ދައުވާ އެވެ. ދައުވާގައި ބުނެފައިވަނީ، މުލިއާގެ ކައިރިން އައިއީޑީއެއް ފެނިގެން އެ ނައްތާލުމަށް ފުލުހުން ހަރަކާތްތެރިވަމުންދަނިކޮށް، ފުލުހުންނަށް ހުރަސް އަޅައި، ފިޔާޒު ފުލުހެއްގެ މޭ މަތީ ޖަހާފައިވާ ކަމަށެވެ.
އެ ދައުވާއިން ދިފާއުވުމަށް ފިޔާޒު ވަނީ ގިނަ ހެކިތަކެއް ވެސް ހުށަހަޅާފަ އެވެ. އެގޮތުން ހަތް ނޫސްވެރިއެއްގެ ދިފާއީ ހެކީގެ ގޮތުގައި ހުށަހެޅި އެވެ. އެ ނޫސްވެރިން ވަނީ ފިޔާޒުގެ ދިފާއުގައި ހެކި ބަސް ދީފަ އެވެ. އޭގެ އިތުރުން ދެން ހެއްކެއްގެ ގޮތުގައި ފިޔާޒު ހުށަހެޅީ، އެ ރޭ ރާއްޖެ ޓީވީން ގެނެސްދިން ލައިވް ކަވަރޭޖެވެ.
ދައުވާ ސާބިތުވެއްޖެ ނަމަ އަދަބު ކަނޑައެޅުމުގެ އަސާސީ މިންގަނޑު ފިޔާޒުގެ މައްޗަށް އެއް މަހާއި ހަ ދުވަހުގެ ޖަލު ހުކުމެެއް އަންނާނެ އެވެ.
މި މައްސަލާގައި ރާއްޖެ ޓީވީގެ ދެ ނޫސްވެރިން ކަމަށްވާ ވިޝާމާއި ލީވާންގެ މައްޗަށް ވެސް ދައުވާކުރެ އެވެ. އެ ދެ ނޫސްވެރިންނަށް ކުރަނީ ގާނޫނު ތަންފީޒު ކުރާ މުވައްޒަފެއްގެ މަސައްކަތަށް ގަސްތުގައި ހުރަސް އެޅުމުގެ ދައުވާ އެވެ.