މިއަދަށް ތާވަލުކުރި ދިއްގަރު ދާއިރާގެ މެންބަރު އަހުމަދު ފާރިސް މައުމޫންގެ ޝަރީއަތުގެ އަޑުއެހުން ކެންސަލްކޮށްފި އެވެ. މިއަދަށް ތާވަލުކުރި އަޑުއެހުމަކީ ޝަރީއަތް ފެށުމުގެ ކުރިން ހުށަހަޅާ ލިޔެކިޔުންތައް ބަދަލުކުރުމަށް ތާވަލުކުރި އަޑުއެހުމެކެވެ.
ދެން މި އަޑުއެހުން އޮންނާނީ އަންނަ ހަފުތާގެ ބުރާސްފަތި ދުވަހު އެވެ. ފާރިސްގެ ވަކީލް މައުމޫން ހަމީދު ވިދާޅުވީ، މިއަދުގެ އަޑުއެހުން ކެންސަލްކޮށްފައިވަނީ ފާރިސްގެ ފަރާތުން ހުށަހެޅި ލިޔެކިޔުންތައް ރިވިއުކުރުމަށް ދައުލަތަށް ފުރުސަތު ދިނުމުގެ ގޮތުން ކަމަށެވެ.
ފާރިސްގެ މައްޗަށް ދައުލަތުން އުފުލާފައިވާ ޝަހުސު އޮޅުވާލުމުގެ ދައުވާ އެވެ. އެއީ ޕީޕީއެމްގެ ދިދަ އާއި ލޯގޯ ބޭނުންކުރި ކަމަށް ބުނެ އެވެ.
އެންމެ ފަހުން ބޭއްވި އަޑުއެހުމުގައި ފާރިސްގެ ފަރާތުން ގިނަ ޝަކުވާތަކެއް ހުށަހަޅާފައިވަނިކޮށް މައްސަލަ ބައްލަވާ ގާޒީ އިބްރާހިމް އަލީ ވަނީ ޖިނާއީ އިޖުރާއަތުގެ ގާނޫނުގެ 115 ވަނަ މާއްދާގެ (ބ)ގެ ދަށުން ފާރިސްގެ މައްސަލައަކީ ޝަރީއަތް ކުރިއަށް ގެންދެވޭނެ މައްސަލައެއް ކަމަށް ކަނޑައަޅާފަ އެވެ.
މި ދައުވާ ފާރިސްގެ މައްޗަށްކޮށް ޝަރީއަތް ފަށާފައިވާއިރު އޭނާ މިހާރު ހުންނެވީ އެހެން ތުހުމަތެއްގައި ޝަރީއަތް ނިމެންދެން ބަންދުކޮށްފަ އެވެ. އެއީ ރިޝްވަތު ހުށަހަޅަން އުޅުމުގެ ތުހުމަތުގަ އެވެ. އެ މައްސަލާގެ ތަހުގީގު ނިމި، ފާރިސްގެ މައްޗަށް މިހާތަނަށް ދައުވާ އުފުލާފައެއް ނުވެ އެވެ.