މަޑުއްވަރީ ދާއިރާގެ މެންބަރު ކަމުން ވަކިވެފައިވާ ކަމަށް އިލެކްޝަން ކޮމިޝަނުން ނިންމާފައިވާ މުހައްމަދު އަމީތު ހައްޔަރުކޮށް ބަންދުކުރި މައްސަލާގެ އިސްތިއުނާފު އަޑުއެހުންތައް މިއަދު ފަށައި، ނިންމާލައިފި އެވެ.
ސިއްރުން ކުރިއަށް ގެންދިޔަ އެ އަޑުއެހުމާ ގުޅޭ ގޮތުން "އަވަސް"އަށް މައުލޫމާތު ދެއްވަމުން އަމީތުގެ ވަކީލް އަލީ ޒާހިރު ވިދާޅުވީ، އަމީތަކީ ހައްޔަރުކޮށްފައިވަނީ މަޖިލީހުގެ މެންބަރެއް ނޫން މީހަކު މަޖިލީހުގެ ތެރެއަށް ވަތް ކަމަށް ބުނެ ކަމަށާއި ނަމަވެސް އަމީތަކީ މަޖިލީހުގެ މެންބަރެއް ކަމަށެވެ. އަމީތުގެ މެންބަރުކަމުގެ މަސްއޫލިއްޔަތު ގެއްލިފައިވާ ކަމެއް އޭނާއަށް އެއްވެސް އިދާރާއަކުން އަންގާފައެއް ނުވެ އެވެ.
ގޮނޑިއާ ގުޅޭ ގޮތުން މިހާތަނަށް ސުޕްރީމް ކޯޓުން ގޮތެއް ނިންމާފައެއް ނުވެ. އެ މައްސަލާގެ އަޑުއެހުންތައް އިއްޔެ ވަނީ ފަށާފަ އެވެ. އަދި އަމީތުގެ ފަރާތުން އޭނާގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ބުނެފައިވަނީ އުސޫލުތަކާ ހިލާފަށް ކަމަށް ބުނެ ގިނަ ނުކުތާތަކެއް ފާހަގަކޮށްފައިވެ އެވެ.
މިއަދުގެ ޝަރީއަތުގައި އަމީތުގެ ފަރާތުން އިތުރަށް ފާހަގަކުރި ނުކުތާއަކީ އަމީތު ބަންދުގައި ބަހައްޓަންޖެހޭ ސަބަބެއް ނެތް ކަމެވެ. އެކަމާ ގުޅިގެން ފަނޑިޔާރުން ވަނީ ދައުލަތާ ގިނަ ސުވާލުތަކެއް ކުރިމަތިކޮށްފަ ކަމަށް އަލީ ޒާހިރު ވިދާޅުވި އެވެ. އެގޮތުން އަމީތުގެ ތަހުގީގު ނިމިފައިވޭތޯ އަދި އޭނާ ބަންދުގައި ބަހައްޓަން ދައުލަތަށް ފެންނަނީ ކީއްވެތޯ ފަނޑިޔާރުން އައްސަވާފައިވެ އެވެ.
އަލީ ޒާހިރު ވިދާޅުވި ގޮތުގައި، އެ ސުވާލުތަކަށް ދައުލަތުން މާބޮޑު ޖަވާބެއް ދީފައެއް ނުވެ އެވެ. ދައުލަތު ބުނެފައިވަނީ އަމީތުގެ މައްސަލާގެ ތަހުގީގު ނިމިފައިނުވާ ކަމާއި އަދި އިތުރު ތިން މީހެއްގެ ބަޔާން ނެގުން އެބަ އޮތް ކަމަށެވެ. އަމީތު ބަންދުގައި ބަހައްޓަންޖެހެނީ އޭނާއަކީ ފުލުހުންގެ ސަފުތައް ފަޅާލައި، ހުއްދަ ނޫން ތަނަކަށް ވަދެފައިވާ މީހަކަށްވާތީ އޭނާއަކީ މުޖުތަމައުއަށް ނުރައްކާވާފަދަ މީހެއް ކަމަށް ފެންނާތީ ކަމަށް ދައުލަތުން ބުނެފައިވެ އެވެ.
އަމީތު ވަނީ އޭނާގެ ގޮޅީގެ ހާލަތް ވެސް މިއަދު ހައިކޯޓަށް ކިޔައިދެއްވާފަ އެވެ. އެ ވާހަކަތައް އިއްޔެ އަމީތުގެ ގޮނޑި މައްސަލާގައި ހުޅުވާލައިގެން ބޭއްވި އަޑުއެހުމުގައި ވެސް އަމީތު ކިޔައިދެއްވި އެވެ.
"އިތުރު އަދަބެއް އަޅުގަނޑަށް ދެވިގެން ނުވާނެ، އަސާސީ ހިދުމަތްތަކެއް އަޅުގަނޑަށް ގޮޅީގައި ނުލިބޭ، ސާފު ބޯފެން އަޅުގަނޑަށް ލިބުނީ ފަސް ދުވަސް ފަހުން، އޭގެ ކުރިން ފެން ބުއީ ފަހާނާގެ އިސްކުރުން، ގޮޅިއަށް އަލިކަން ލިބުނީ ވަކީލުންގެ މަސައްކަތްތަކުން ހަތް ދުވަސް ފަހުން، އަޅުގަނޑުގެ ގައިން ބިހިތަކެއް ނަގައިގެން ޑޮކްޓަރަކަށް ދެއްކުމުން ވައި ދައުރުވާ ފަދަ ތަނެއްގައި ބެހެއްޓުމަށް ވަނީ ލަފާ ދީފަ، އެކަމަކު އަޅުގަނޑު ގޮޅީގައި ފަންކަލެއް އަދި ވެސް ނުހުރޭ،" އަމީތު ވިދާޅުވެފައިވެ އެވެ.
އަލީ ޒާހިރު ވިދާޅުވީ، މިއަދު އަޑުއެހުން ފަނޑިޔާރުން ނިންމަވާލެއްވީ، އިތުރު ކަމެއް ސާފުކުރަން ނެތް ނަމަ ދެން އޮންނާނީ މައްސަލާގެ ހުކުމް އިއްވުންކަން އިއުލާންކުރެއްވުމަށްފަހު ކަމަށެވެ. އަމީތުގެ ބަންދު މުއްދަތު ދެ ދުވަހުގެ ތެރޭގައި ހަމަވާނެތީ، ހުކުމް އިއްވުން އަވަސްކޮށްދިނުމަށް އަލީ ޒާހިރު ވަނީ އެދިވަޑައިގެންފަ އެވެ.