ރައްޔިތުންގެ މަޖިލީހުގެ މެންބަރު ކަމުން ވަކިވެފައިވާ ކަމަށް އިލެކްޝަން ކޮމިޝަނުން ބުނެފައިވާ ތިން މެންބަރެއްގެ ފަރާތުން ހުށަހެޅި ދުސްތޫރީ މައްސަލާގެ އަޑުއެހުމެއް މާދަމާ ސުޕްރީމް ކޯޓުގައި ތާވަލުކޮށްފި އެވެ.
މާދަމާއަށް ތާވަލުކޮށްފައިވަނީ މަޑުއްވަރީ ދާއިރާގެ މެންބަރު މުހައްމަދު އަމީތާއި ދިއްދޫ ދާއިރާގެ މެންބަރު އަބްދުއް ލަތީފާއި ވިލިނގިލީ ދާއިރާގެ މެންބަރު ސައުދު ހުސެއިންގެ މައްސަލަ އެވެ. ތުލުސްދޫ ދާއިރާގެ މެންބަރު މުހައްމަދު ވަހީދުގެ މައްސަލަ އަދި ތާވަލުކޮށްފައިނުވީ ނަމަވެސް މާދަމާ މައްސަލަ އޮންނާނެ ކަމަށް ބުނެ އޭނާއަށް ވަނީ ޗިޓް ފޮނުވާފަ އެވެ.
ސުޕްރީމް ކޯޓަށް ހުށަހެޅި މައްސަލާގައި ވަހީދާއި އަމީތާއި ސައުދު ވަނީ އެ ތިން މެންބަރުންގެ ސުލޫކީ މައްސަލައެއް ބަލައި ޕާޓީ ބަދަލުކުރުމުން ގޮނޑި ގެއްލޭނެ ކަމަށް ބުނެ ސުޕްރީމް ކޯޓުން ނެރުނު ހުކުމުގެ މާކުރިން ޕީޕީއެމްއިން އެ މެންބަރުން ވަކިކޮށްފައިވާ ކަމަށް ބުނެފަ އެވެ. އަލުން ސުލޫކީ މައްސަލައެއް ބަލައި، ޕާޓީން ވަކިކޮށްދޭން ޕީޕީއެމް އެދުނު ނަމަވެސް ދެވަނަ ފަހަރެއް ޕާޓީން ވަކިކުރެވޭނެ އެއްވެސް އުސޫލެއް ނޯންނާނެކަން އެ މެންބަރުން ފާހަގަކުރެއްވި އެވެ.
މެންބަރު ލަތީފްގެ ސުލޫކީ މައްސަލައެއް ބަލައި، އޭނާ ޕާޓީން ވަކިކޮށްފައިވަނީ ޕީޕީއެމްއިން ވަކިވުމަށް ލަތީފް އަމިއްލައަށް އެ ޕާޓީއަށާއި އިލެކްޝަން ކޮމިޝަނަށް ހުށަހަޅާފައިވަނިކޮށެވެ. އަމިއްލަ ޕާޓީން ވަކިވާން އެދޭ ހިސާބުން ޕާޓީން ވަކިވާނެ ކަމަށް ޕީޕީއެމްގެ އަސާސީ ގަވައިދުގައި ބުނެފައިވެ އެވެ. އެހެންކަމުން ލަތީފްގެ ސުލޫކީ މައްސަލައެއް ޕީޕީއެމްއަށް ބެލޭނެ އުސޫލެއް ނޯންނާނެ ކަަމަށް އެ މެންބަރު ވެސް ވަނީ ޝަރީއަތުގައި ފާހަގަކުރައްވާފަ އެވެ.
ސައުދުގެ މައްސަލަ މާދަމާ ތާވަލުކޮށްފައިވަނީ 11:00 އަށެވެ. ލަތީފްގެ މައްސަލަ މެންދުރުފަހު 1:30 އަށް ތާވަލުކޮށްފައިވާއިރު، އަމީތުގެ މައްސަލަ ތާވަލުކޮށްފައިވަނީ 2:30 އަށެވެ. މި ތިން މައްސަލާގެ އެންމެފަހުން ބޭއްވި އަޑުއެހުމުގައި އަޑުއެހުން ނިންމާލާފައިވަނީ އިތުރު ވާހަކައެއް ދައްކަން އެއްވެސް ފަރާތަކުން އެދިފައިވާ ކަމަށްވާނަމަ އަޑުއެހުމެއް ބާއްވާނެ ކަމަށް ވިދާޅުވެ އެވެ.
މާދަމާގެ އަޑުއެހުންތަކަށްފަހު ދެން އޮންނާނީ މި ހަތަރު މައްސަލާގެ ހުކުމް އިއްވުން ކަމަށް ބެލެވެ އެވެ.