ޗައިނާއިން ރާއްޖެއަށް ކަނޑައަޅުއްވަވާފައި ހުންނަވާ ސަފީރު ވަންގް ފުކާންގް، ރާއްޖެ ދޫކޮށް ވަޑައިގަންނަވާކަން ފޮރިން މިނިސްޓްރީން ހާމަކޮށްފި އެވެ.
ވަންގް ފުކާންގްއަށް އަލްވަދާއު ކިޔުމަށް މިއަދު ފޮރިން މިނިސްޓަރު މުހައްމަދު އާސިމް ވަނީ ސަފީރަށް ހާއްސަ ކެއުމަށްދީ، ރާއްޖެ އާއި ޗައިނާގެ ގުޅުން ބަދަހިކުރުމަށް ސަފީރު ކުރެއްވި މަސައްކަތަށް ޝުކުރު އަދާކުރައްވާފަ އެވެ.
ޗައިނާ ސަފީރު ވަންގް ފުކާންގް ރާއްޖެ ވަޑައިގަތީ މިހާރުގެ ސަރުކާރުގެ ފުރަތަމަ ދުވަސްވަރެވެ. އެއީ 2013 ވަނަ އަހަރުގެ ޑިސެމްބަރު މަހު އެވެ. ވަންގް ފުކާންގް، އޭނާގެ ސަފީރު ކަމުގެ ފަތްކޮޅު ރައީސްއަށް އެރުވީ، ޑިސެމްބަރު މަހުގެ 30 ވަނަ ދުވަހު އެވެ.
ސަފީރު ރާއްޖެއިން ވަޑައިގަންނަވަނީ ސަފީރު ކަމުގެ ދައުރު ހަމަވުމުން ކަމަށް ބެލެވެ އެވެ. ވަންގް ފުކާންގް ސަފީރު ކަމުގައި ހުންނެވި ދުވަސްވަރު ރާއްޖެ އާއި ޗައިނާގެ ގުޅުން ވަނީ ވަރަށް ބޮޑަށް ބަދަހިވެފަ އެވެ. ވަންގް ފުކާންގް ވަނީ ޗައިނާ އާއި ރާއްޖޭގެ ގުޅުން ވަރުގަދަ ކުރުމަށް ވެސް ގިނަ މަސައްކަތްތަކެއް ކުރައްވާފަ އެވެ.