ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ރައީސް އަބްދުﷲ ޔާމީން ނުސީދާ ގޮތެއްގައި ވަރަށް ބޮޑަށް ފާޑުވިދާޅުވެއްޖެ އެވެ. ރައީސް ވަނީ ދައުލަތަށް ދައްކަންޖެހޭ ފައިސާ ވީއެންމެ އަވަހަކަށް ދެއްކުމަށް ގޮވާލާފަ އެވެ.
ގާސިމްގެ ތިން ކުންފުންޏަކުން 1.9 ބިލިއަން ރުފިޔާ ހޯދުމަށް މީރާއިން ގާސިމްގެ ތިން ކުންފުންޏާ ދެކޮޅަށް ދައުވާކޮށްފައިވާކަން މިއަދު ހާމަކޮށްފައިވަނިކޮށް ރައީސް ވިދާޅުވީ، ދައުލަތަށް ދައްކަންޖެހޭ ފައިސާ ހޯދުމަކީ މި ސަރުކާރުގެ ވަރަށް ބޮޑު އަމާޒެއް ކަމަށެވެ. ދައުލަތަށް ދައްކަންޖެހޭ ފައިސާތައް ނުދައްކާ ޕޯޑިއަމްތަކަށް އަރައި، ރައްޔިތުންނަށް އުފާވެރި ހަބަރުތައް ދިނުމުގެ ބޭނުމެއް ނެތް ކަމަށެވެ.
"އިދިކޮޅު ލީޑަރުންނަށް ވެސް އަޅުގަނޑު ގޮވާލަން ދައުލަތަށް ދައްކަންޖެހޭ ފައިސާތައް ދައްކަން، އެއްގޮތަކަށް ވެސް ދައުލަތަށް ދައްކަންޖެހޭ ފައިސާއެއް ނުދައްކާ ދައުލަތުގެ ކަންކަމާ ހަވާލުވެގެން ރައްޔިތުންނަށް މަސްލަހަތާއި ރައްޔިތުންނަށް ހައްގު ގޮތުގައި ޖީލެއް ބިނާ ކުރާނެ ކަމުގެ އުފާވެރި ހަބަރުތައް ދެއްވުމުގެ ބޭނުމެއް ނެތް، ކޮންމެ ބޭފުޅަކު ވޯޓު ހޯދަން ޕޯޑިއަމަށް ވަޑައިގެން ދައްކަވާ ކޮންމެ ބޭފުޅެއްގެ މާޒީއަށް ބަލާނެ އުޅުއްވުމަށް ބަލާނެ، މި ވާހަކަ ދެއްކީމަ އެއީ މި ވަގުތު އަލާސްކަންފުޅާ އުޅޭ ބޭފުޅެއްތޯ ވެސް ބައްލަވާނެ،" ރައީސް ވިދާޅުވި އެވެ.
ރައީސް ވިދާޅުވީ، ރައްޔިތުންނަށް ހިދުމަތް ކުރައްވާނެ ކަމަށް ވިދާޅުވާ ބޭފުޅުން ދައުލަތަށް ދަރާފައިވާ ފައިސާތައް ދައްކައިފިނަމަ އެއީ ރަށްރަށުގައި ތަރައްގީގެ ގިނަ މަޝްރޫއުތަކެއް ހިންގާނެ ފައިސާ ކަމަށެވެ.
"އެހެންވީމަ އަޅުގަނޑު ދަންނަވާލަން ބޭނުން ވަނީ ދައުލަތަށް ދައްކަންޖެހޭ ފައިސާތައް ދައްކަވާށޭ، މި ފައިސާ ދައުލަތަށް ލިބިއްޖެޔާ މިއީ ކިތައް ހޮސްޕިޓަލްތޯ ކިތައް ނަރުދަމާތޯ، ކިތައް ރަށުގަތޯ މަގު ނުހެދިފައިވަނީ، ބަނދަރު ނުހެދި، ސާދފު ބޯފެން ނުލިބިފަ، އެކަމަކު އަޅުގަނޑުމެންގެ ތެރެއިން ވަކި ބަޔަކަށް އެބަ އޮވޭ އިމްތިޔާޒުތަކެއް ދައުލަތަށް ފައިސާ ނުދައްކާ ތިބުމުގެ، އެ ބޭފުޅުން ދައުލަތަށް ދައްކަންޖެހޭ ފައިސާ ނުދައްކާ ތިބުމުގަ ހިތްވަރުދޭ ސިޔާސީ ލީޑަރުން ވެސް އެބަ އުޅޭ،" ރައީސް ވިދާޅުވި އެވެ.
ރައީސް ވިދާޅުވީ، އެފަދަ އެއްވެސް މައްސަލައެއް މި ސަރުކާރުން ނުބަލައި ދޫނުކޮށްލާނެ ކަމަށެވެ. ދެން ވެރިކަމަށް އަންނަ ބަޔަކަށް ވެސް ކުރިން ހިނގާފައިވާ ކޮރަޕްޝަންތަކާ ގުޅިގެން ދައުލަތަށް ގެއްލިފައިވާ ފައިސާތައް ހޯދަން އުޅެން ނުޖެހޭ ވަރަށް އެ މަސައްކަތް މި ސަރުކާރުން ކުރާނެ ކަމުގެ ޔަގީންކަން ރައީސް ދެއްވި އެވެ.
ގާސިމްގެ ކުންފުނިތަކަކާ ދެކޮޅަށް މީރާއިން ދައުވާކޮށްފައިވާއިރު އެ ކުންފުނިތަކުން ބުނެފައިވަނީ ދައުލަތަށް އެ ކުންފުނިތަކުން ދައްކަންޖެހޭ އެއްވެސް ފައިސާއެއް ނޯންނާނެ ކަމަށެވެ.