ށ. މިލަންދޫއަށް ބޯކޮށް ވާރޭވެހި ފެން ބޮޑުވުމުގެ ސަބަބުން އެ ރަށަށް ގެއްލުންތަކެއް ވެއްޖެ އެވެ.
މިލަންދޫ ކައުންސިލުން ބުނީ މިއަދު ފަތިހުން ފެށިގެން އެރަށަށް ބޯކޮށް ވާރޭވެހި ފެން ބޮޑު ވެފައިވާ ކަމަށާއި ބައެއް ގޭގެއަށް ފެންވަދެ ގޭޭގޭގައި ދޮރު ކުރިމަތީގައި ވެލި ބަސްތާވެސް ޖަހަމުންދާ ކަމަށެވެ. އަދި މަގުތަކުގައި ފެން ބޮޑުވެފައި ވުމުން ދުއްވާ އެއްޗެއްސަށް ދުއްވަންވެސް އުނދަގޫ ވެފައިވާ ކަމަށާއި ސައިލުގެ ބޮޑު ބައެއް އޮންނަނީ ފެންގަނޑުގެ ތެރޭގައި ކަމަށް ކައުންސިލުން ބުންޏެވެ.
ކައުންސިލުން ބުނީ ރަށަށް ލިބިފައިވާ ގެއްލުން އަދި މާ ބޮޑަށް ސާފު ނުވާ ކަމަށާއި ކައުންސިލުން ވަނީ ޓީމެއް ހަދައި ލިބިފައިވާ ގެއްލުންތައް ބެލުމަށް މަސައްކަތް ފަށާފައި ކަމަށެވެ.
"ވިއްސާރަ ތުނި ކޮށްލީ ދެންމެ، މިއަދު ފަތިހުން ފެށިގެން ވެހެމުންދާނީ، ރަށަށް ލިބިފަ ހުރި ގެއްލުން ބެލުމަށް ކައުންސިލުން ޓީމެއް ހަދައި މިހާރު ބަލަން ފަށާފައި މިވަނީ، ބަލައި ރިޕޯޓެއް ތައްޔާރު ކުރުމަށްޓަކައި،" ކައުންސިލުން ބުންޏެވެ.
މިދިޔަ މަހުވެސް ރާއްޖެއަށް ކުރި ވިއްސާރާގައި ވަނީ ގިނަ ރަށްތަކަކަށް ގެއްލުން ވެފަ އެވެ. މިދިޔަ މަހު ގއ. ވިލިނގިއްޔަށް ކުރި ވިއްސާރާގައި އެރަށަށް ވަނީ ވަރަށް ބޮޑެތި ގެއްލުންތަކެއް ވެފަ އެވެ.