ސްޓެލްކޯއަށް ކޮންމެ އަހަރަކުވެސް 60 މިލިއަން ރުފިޔާ ގެއްލުންވާ ކަމަށާއި ނަަމަވެސް ސްޓެލްކޯގެ ހަރަދުތައް ކުޑަކޮށް، އަދި ޓެރިފް ވެސް ބޮޑު ނުކޮށް، ސްޓެލްކޯ އަކީ ފައިދާ ވާ ތަނަކަށް ހަދާނެ ކަމަށް ސްޓެލްކޯގެ މެނޭޖިން ޑިރެކްޓަރު އަހުމަދު ޒުހޫރު ވިދާޅުވެއްޖެ އެވެ.
ޓީވީއެމް އިން އަލަށް ގެނެސްދޭން ފެށި، "ޒިންމާ" ޕްރޮގްރާމް ގައި ޒުހޫރު ވިދާޅުވީ ވޭތުވެފިޔަ ތިން އަހަރުވެސް ސްޓެލްކޯއަށް ވަނީ 60 މިލިއަން ރުފިޔާގެ ގެއްލުން ވެފައި ކަމަށާއި މީގެ ކުރިން ސްޓެލްކޯއިން ކޮށްފައިވާ ހަރަދުތައް ވަނީ ބޮއްސުންލާފައި ކަމަށެވެ. އަދި މެނޭޖްމަންޓްގެ ކަންކަން ރަނގަޅަށް ހަރުދަނާކުރުމަށް ކުރަންޖެހޭ ބައިވަރު ކަންކަން އެބަހުރި ކަމަށާއި އެފަދަކަން ކަންކަން ރެގިއުލޭޓް ކުރުމަކީ އެމްޑީގެ ޒިންމާއެއް ކަމަށް ޒުހޫރު ވިދާޅުވި އެވެ.
"އަހަރަކު 60 މިލިއަން ރުފިޔާ ގެއްލުންވާ ތަނެއް ސްޓެލްކޯއަކީ. ގޮންޖާފަ މިބުނަނީ ސްޓެލްކޯ އަކީ ފައިދާ ވާ ތަނަކަށް ހަދާނަން، ސްޓެލްކޯގެ ހަރަދުތައް ކުޑަކުރާނަން، ޓެރިފް ބޮޑު ނުކޮށްސް ފައިދާހުރި ތަނަކަށް ހަދާނަން،" ޒުހޫރު ވިދާޅުވި އެވެ. "2005 ވަނަ އަހަރުގެ އެވެރެޖް ޓެރިފް މިހާރުވެސް ނަގަނީ، ކުރިން ސްޓެލްކޯގެ މުވައްޒްފުންގެ މުސާރަ އަކީ އެވްރެޖް ކޮށް 3000 ރުފިޔާ، މިހާރު 10000ރ. އާއި 15000ރ. ދެމެދު، ދިރިއުޅުމުގެ ހަރަދުތައް 300 ޕަސަންޓަށް ވަނީ ބޮޑުވެފައި، ސަރުކާރުން މަސައްކަތް ކުރަނީ އިންވެސްޓްތައް ކޮށްދީފައި ހަމައެކަނި ޓެރިފްއިން ލިބޭ އާންމުދަނީ އިން އޮޕަރޭޝަން ހަރަދު ހިފެހެއްޓުން، ސްޓެލްކޯގެ އަމާޒަކީ ކޮންމެ އަހަރަކު އެވާ 60 މިލިއަން ގެއްލުން ނުވެ ދުވަހުން ދުވަހަށް ކުރަން ޖެހޭ މަސައްކަތްތައް ކުރުން."
ޒުހޫރު ވިދާޅުވީ ސްޓެލްކޯއަށް ލިބޭ އާންމުދަނީގެ 70 ޕަސަންޓް ހަރަދުކުރަނީ ތެލަށް ކަމަށާއި އަންދާ ތެލުގެ ތެރެއިން ގާތްގަނޑަކަށް 60 އިންސައްތަ އަކީ ބޭކާރުވާ ހަކަތަ ކަމަށެވެ. އަދި އެ ބޭކާރުވާ ހަކަތަ ބޭނުން ކޮށްގެން ސްޓެލްކޯއިން ފެން އުފެއްދުމަށް ބޭނުން ކުރަމުންދާ ކަމަށާއި އެކަމަކީ އިތުރު އެނާޖީއެއް ބޭނުން ކޮށްގެން ކުރަމުންދާ ކަމެއް ނޫންކަމަށް ޒުހޫރު ވިދާޅުވި އެވެ.
"އަންދާ ތެލުގެ 60 ޕަސެންޓް އަކީ ވޭސްޓް އެނާޖީ، އެ އެނާޖީ ޓެޕް ކުރަނީ، ވޭސްޓް ވާ އެނާޖީ ބޮޑުބައެއް ދަނީ މައްޗަށް. އެ އެނާޖީ ހީޓް ކޮށް އެ ހީޓް ބޭނުން ކޮށްގެން ފެން އުފައްދަނީ، އިތުރު ފިއުލް އެއް ބޭނުމެއް ނުކުރަން، ވޭސްޓެޑް އެނާޖީ ބޭނުން ކޮށްގެން ފެން އުފައްދަނީ، އިތުރު ފައިދާ ހުރި ޕްރޮޑަކްޓަކަށް ހެދުމަށް، ފެން އުފައްދަން ކުރާ މަސައްކަތަކީ ވަރަށް ވައެބަލް ފައިދާ ހުރި ކަމެއް، އެކަމުގެ ސަބަބުން ކަރަންޓްގެ ހިދުމަތަށް ލިބޭނީ ފައިދާ، ގެއްލުން ކުޑަކުރެވި ވޭސްޓެޑް އެނާޖީ އިތުރުވާނެ. އެހެން ކަމަކަށް ބޭނުން ކުރެވިއްޖެ ނަމަ ކަރަންޓް އަގު ކުޑަކުރުމަށް މަގުފަހިވާނީ" ޒުހޫރު ވިދާޅުވި އެވެ.