ސްނޯކަލިންއަށް ގޮސްގެން އުޅެނިކޮށް އިއްޔެ ގެއްލުނު ޗައިނާގެ ޑައިވް އިންސްޓްރަކްޓަރު އަދިވެސް ނުފެންނަ ކަމަށް އެމްއެންޑީއެފުން ބުނެފި އެވެ.
އެމްއެންޑީއެފުން ބުނީ، އިއްޔެ ސްނޯކްލިންއަށް ގޮސްގެން އުޅެނިކޮށް ގެއްލުނު ޗައިނާ މީހާ އަދިވެސް ނުފެންނަ ކަމަށެވެ. އަދި އެމީހާ ހޯދުމުގެ މަސައްކަތް އެމްއެންޑީއެފް ކޯސްޓްގާޑްގެ ޑައިވަރުން ކުރަމުންދާ ކަމަށާއި އެމީހާ ހޯދުމަށް ކަނޑުގެ ސަރަހައްދު ބަލަމުންދާ ކަމަށްވެސް އެމްއެންޑީއެފުން ބުންޏެވެ.
އިއްޔެ ސްނޯކްލިންއަށް ގޮސް އުޅެނިކޮށް ގެއްލިގެން ހޯދަމުން ދާ މީހާ އަކީ އދ އަތޮޅުގެ ރިސޯޓެއްގައި މަސައްކަތް ކުރާ މީހެއް ކަމަށް ފުލުހުން ބުންޏެވެ. އަދި އެ މީހާ އަކީ އެ ރަށުގައި މަސައްކަތް ކުރާ 25 އަހަރުގެ ޗައިނާ މީހެއް ކަމަށް ވެސް ފުލުހުން ބުންޏެވެ. އެނގިފައިވާ ގޮތުގައި ގެއްލުނު ޗައިނާ މީހާ އަކީ އދ. އަތޮޅުގައި ހިންގާ ސެންޓާރާ ގްރޭންޑް ރިސޯޓްގެ ޑައިވިން ސެންޓަރުގައި މަސައްކަތް ކުރާ މުވައްޒަފެކެވެ.
އެ މީހާ ހޯދުމުގެ މަސައްކަތް ކުރާ ކޯސްޓްގާާޑްގެ މެރިޓައިމް ރެސްކިއު ކޯޑިނޭޝަން ސެންޓަރުން ބުނީ، އެ މީހާ ފްރީ ޑައިވިންއަށް ފައިބާފައި ވަނީ އދ. މައްޗަފުށީ އުތުރު ފަރާތަށް ކަމަށެވެ. އޭނާ އޭރު ލައިގެން ހުރީ، ގަދަ ނޫ ކުލައިގެ ސްކޫބާ ޕްރޯ ޑައިވް ޝޯޓީ ސޫޓެކެވެ. އަދި އެ މީހާ އަކީ އިސްކޮޅުގައި ފަސް ފޫޓް ހުރި ދޮން މީހެއް ކަމަށް ވެސް ބުންޏެވެ.
އެ މީހާ ހޯދުމުގައި ފުލުހުންގެ އެހީތެރިކަމަށް އެދުނީ އިއްޔެ ހަވީރު ކަމަށް ވެސް ފުލުހުން ބުންޏެވެ. އަދި އެ ވަގުތުން ފެށިގެން އޭނާ ހޯދުމުގައި ފުލުހުން ހަރަކާތްތެރިވަމުން އަންނަ ކަމަށް ވެސް ފުލުހުން ބުންޏެވެ.