މޯލްޑިވިއަން އިން އަލަށް ގެންނަ ބޯޓަށް މުވައްޒަފުން ނަގައިފި

މޯލްޑިވިއަން އިން އެ އެއާލައިންގެ ފްލީޓަށް މުޅިން އަލަށް އިތުރުކުރާ ވައިޑް ބޮޑީ އެއާކްރާފްޓަށް ބޭނުންވާ ގިނަ މުވައްޒަފުން ނަގައިފި އެވެ.

މޯލްޑިވިއަން ހިންގާ އައިލެންޑް އޭވިއޭޝަން ސާވިސް (އައިއޭއެސް)ގެ އޮފިޝަލަކު މިއަދު އަވަސްއަސް ވިދާޅުވީ އެ ކުންފުނިން އަލަށް ގެންނަ ބޯޓު -- އެއާބަސް އޭ-330 އަށް 21 މުވައްޒަފުން ނަގާފައިވާ ކަމަށެވެ.

މީގެތެރޭގައި ކެޕްޓަން ޓްރެއިނީއަކާއި އެ ރޭޓިންގެ ދެ ކެޕްޓަނުންނާއި ދެ ފަސްޓް އޮފިސަރުންނާއި 14 ކެބިން ކްރޫ އަދި ދެ އިންޖީނިއަރުން ހިމެނެ އެވެ.

ދުރު މަންޒިލްތަކުން ރާއްޖެއަށް އިތުރު ފަތުރުވެރިން ގެނައުމުގެ މަގުސަދުގައި ގެންނަ ބޯޓަކީ 264 މީހުންގެ ޖާގައިގެ ބޯޓެކެވެ. އެގޮތުން ޗައިނާ އާއި ޔޫރަޕްގެ ގައުމުތަކަށް ސީދާ ދަތުރުތައް ފެށުމަށް ނިންމާފައިވެ އެވެ.

މޯލްޑިވިއަންގެ ފްލީޓުގައި މިވަގުތު 24 ބޯޓެވެ. އެއީ އެއާބަސް އޭ320 މަރުކާގެ އެއް ބޯޓާއި އޭޓީއާރްގެ ހަތަރު ބޯޓާއި ޑޭޝް މަރުކާގެ ހަ ބޯޓާއި ޑޭޝް ޓުވިން އޮޓާގެ 11 ބޯޓެވެ.