ބޯކޮށް ވާރޭވެހި، ބައެއް ރަށްތަކުގައި ފެންބޮޑުވެ ގެއްލުންތަކެއް

ރާއްޖެއަށް މިހާރު ކުރަމުންދާ ވިއްސާރާގައި ބައެއް ރަށްތަކަށް ބޯކޮށް ވާރޭވެހި، ފެންބޮޑުވުމުގެ ސަބަބުން ގެއްލުންތަކެއް ވެއްޖެ އެވެ.

ފުލުހުން ބުނީ، ބ. މާޅޯހާއި ލ. އިސްދޫ އަދި ގއ. ވިލިނގިއްޔަށް ބޯކޮށް ވާރޭވެހި ފެންބޮޑުވުމުގެ ސަބަބުން އެރަށްތަކަށް އެހީތެރިކަން ފޯރުކޮށްދެމުންދާ ކަމަށެވެ. އެގޮތުން ފެން ހިންދުމުގެ މަސައްކަތާއި ގޭގޭގައި ވެލިބަސްތާތައް ޖެހުމުގެ މަސައްކަތް ކުރަމުންދާ ކަމަށެވެ. އަދި އެ މަސައްކަތުގައި ރަށު ރައްޔިތުންނާއި މުއައްސަސާތަކުން އެހީތެރިވަމުންދާ ކަމަށް ފުލުހުން ބުންޏެވެ.

ގއ. ވިލިނގިލި ކައުންސިލްގެ ރައީސް މުސްތަފާ މުހައްމަދު "އަވަސް" އަށް ވިދާޅުވީ، ބޯކޮށް ވާރޭވެހި ފެންބޮޑުވުމުގެ ސަބަބުން ފަސް ގެއެއްގައި ހިފާ ގެންގުޅޭ ތަކެއްޗަށް ގެއްލުންވެފައިވާ ކަމަށެވެ. އަދި ވިދާޅުވީ، މިހާރު ވާރޭވެހުން ހުއްޓާލާފައިވާ ކަމަށާއި ފެންގަނޑު ވަރަށް ބޮޑަށް ހިންދިފައިވާ ކަމަށެވެ.

މުސްތަފާ ވިދާޅުވީ، ބައެއް ސަރަހައްދު ތަކުގައި ދެ ފޫޓައް ފެޓައް ފެން ބޮޑުވި ކަމަށާއި ރަށުގެ ބޮޑުބައެއްގައި ފެން ބޮޑުވި ކަމަށެވެ. އަދި މިހާރު ދިމާވެފައިވާ އެންމެ ބޮޑު މައްސަލައަކީ ޖަންކްޝަންތަކުން ނަޖިސް ނުކުތުން ކަމަށާއި އެގޮތައް މެދުވެރިވެފައިވަނީ ޕަންޕްތައް ހަލާކުވެފައި ހުރުމުން ކަމަށް މުސްތަފާ ވިދާޅުވި އެވެ.

"ފެން ހިންދުމުގެ މަސައްކަތުގައި ރަށުގެ ރައްޔިތުންނާއި ފުލުހުން ވަނީ ބައިވެރިވެފަ، މިހާރު ފެންގަނޑު ވަނީ ވަރަށް ބޮޑަށް ހިއްކާފަ،" މުސްތަފާ ވިދާޅުވި އެވެ.

ވިއްސާރާގައި ގދ. ގައްދޫ އަށް ވެސް ވަނީ ފެން ބޮޑުވެ، ވަރަށް ބޮޑަށް ގެއްލުންވެފަ އެވެ. އެރަށު ކައުންސިލް މެންބަރު މުހައްމަދު ލަބީބް ވިދާޅުވީ، ވިއްސާރާގައި 10 ވަރަކަށް ގެއަށް އެކިވަރުގެ ގެއްލުންވެފައިވާ ކަމަށެވެ. އަދި އެރަށު ކޯޓަށާއި ކައުންސިލްގެ އިދާރާއަށް ވަރަށް ބޮޑެތި ގެއްލުންތަކެއް ވެފައިވާ ކަމަށެވެ.

ލަބީބް ވިދާޅުވީ، ފެން ހިއްކުމުގެ މަސަައްކަތުގައި ރަށުގެ ޒުވާނުންނާއި އެމްއެންޑީއެފުން ހަރަކާތްތެރިވަމުންދާ ކަމަށެވެ.

ރާއްޖެއަށް މިހާރު ކުރަމުންދާ ވިއްސާރާގައި ރާއްޖޭގެ އެކި ކަންކޮޅުތަކަށް ދަނީ ބޯކޮށް ވާރޭވެހި ފެންބޮޑުވަމުންނެވެ. އެގޮތުން މޫސުން އިތުރަށް ގޯސްވެ މޫސުމާ ބެހޭ އިދާރާއިން ވަނީ މިއަދު މެންދުރުފަހު މެދުރާއްޖެ އާއި އުތުރުގެ އަތޮޅުތަކަށް ވައިޓް އެލާޓް ނެރެފަ އެވެ. އެ ސަރަހައްދުތަކަށް ވައި ގަދަވާނެ ކަމަށް ލަފާ ކޮށްފައިވަނީ ގަޑިއަކު 40 މޭލު ބާރު މިނުގަ އެވެ. ކަނޑު ދަތުރު ނުކުރުމަށް ވަނީ އިލްތިމާސް ކޮށްފަ އެވެ.