ސްކޫލު ޗުއްޓީގެ ބޮޑު ބަންދުގައި ދަތުރުފަތުރާއި އެއް ގައުމުން އަނެއް ގައުމަށް ޒިޔާރަތް ކުރުން ގިނަ ވާނެތީ އެ ކަންކަމުގައި އާއްމު ސިއްހަތަށް ސަމާލުވާން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.
ބަންދުގަައި ސަމާލުވާންވީ ގިނަ ކަންތައްތެކެއް އެޗްޕީއޭއިން މިއަދު ނެރުނު ބަޔާނެއްގައި ވަނީ ފާހަގަކޮށްފަ އެވެ.
ސަމާލުވާންވީ މިކަންކަމަށް
* އަރިދަފުސް ރޯގާ ޖެހިއްޖެނަމަ ކެއްސާ، ކިނބިހި އަޅާއިރު އަނގަޔާއި ނޭފަތް ނިވާ ކުރުން
* ރޯގާޖެހި ކެއްސާނަމަ، މީހުން އެއްވެއުޅޭ ތަންތަނަށް ދިއުން މަދުކުރުމާއި، ހާއްސަކޮށް އެފަދަ ތަންތަނަށް ކުޑަކުދިން ނުގެންދިއުން
* ރޯގާ ޖެހިފައިވާނަމަ ކުޑަކުދިން ކައިރިއަށް ނުދިއުމާއި އެކުދިން އުރާ ނުހެދުން
* އާންމު ދާފުތާހިރުކަމަށް، ހާއްސަކޮށް ކާބޯތަކެތި ތައްޔާރުކުރުމުގެ ކުރިން، ފާހަނާކޮށް ނިމިގެން، ނެޕީ ބަދަލުކޮށް ނިމުމަށްފަހު
ސައިބޯނިލައިގެން ރަނގަޅަށް އަތްދޮވުން
* ކުނިވާޒާތުގެ ކާނާ އާއި އެހެނިހެން ތަކެތި ރައްކާތެރި ގޮތުގައި ނައްތާލުން
* ބަލިވެ އުޅޭ ނަމަ ގިނަމީހުން އެއްވެ އުޅޭ ތަންތަންނަށް ނުގޮސް މަޑުކުރުން
* އަތާ ފަޔާ އަނގައިގެ ބައްޔާއި ފާނަބަސަންދު ފަދަ ގައިން ގަޔަށް އަރާ ބައްޔެއް ޖެހިފައިވާނަމަ މީހުން އެއްވެއުޅޭ ތަންތަނަށް ނުދިއުން
* މަދިރި އާލާވުމަށް މަގުފަހިވާ ގޮތަށް ހުސްފުޅިއާއި ދަޅުފަދަ ތަކެތި ނޫކުން
* މަދިރިން ސަލާމަތްވުމަށް ޓަކައި ނިވައިކަން ބޮޑު، ގަޔަށް ދޫ ހެދުން ލުން
* މަދިރި ގިނަވާ ވަގުތުތައް ކަމަށްވާ ފަތިހާއި ހަވީރު ގޭގޭގެ ދޮރުތަކާއި ކުޑަދޮރުތައް ލެއްޕުން
* މަދިރި ދުންދަނޑިއާއި މަދިރި މަރާ އާތްވާއި މަދިރި ލޯޝަން ފަދަ ބާވަތްތައް ބޭނުންކޮށް މަދިރިން ސަލާމަތްވުން
* ސައިހޮޓާ ރެސްޓޯރެންޓް ފަދަ ތަންތަނުން ކާނަމަ ކާތަކެތީގެ ރައްކާތެރިކަމާ މެދު ސަމާލުވުން.
* ގޭގައި ކެއްކުމުގައި ސާފުތާހިރުކަމަށް އިސްކަން ދިނުން
ބޮޑު ޗުއްޓީ ބަންދަކީ އާއްމުކޮށް ގިނަ ބަޔަކު ރާއްޖެއާއި ރާއްޖޭން ބޭރަށް ދަތުރުކުރާ ދުވަސްތަކެކެވެ. އަދި ގިނަ ބަޔަކު މާލެއަށް ވެސް ދަތުރުކުރާ ދުވަސް ވަރެކެވެ. މީގެ އިތުރުން މިދުވަސްވަރަކީ ގިނަ ބަޔަކު އުމްރާ ވުމަށް ގޮސް އެނބުރި އަންނަ ދުވަސްކޮޅެއް ކަމުން އަރިދަފުސް ރޯގާ އާއި އެހެނިހެން ބަލިތައް ފެތުރުން އިތުރުވެގެންވާ ދުވަސްކޮޅެކެވެ. އެހެން ކަމުން އެޗްޕީއޭއިން ވަނީ އެކަންކަމަށް ސަމާލުވާން އަންގާފައި ވެއެވެ.