ހަ މީހުންނާއެކު ދަތުރު ކުރަނިކޮށް އިންޖީނު ހުއްޓިގެން ހާލުގައި ޖެހުނު ސްރީލަންކާގެ މަސް ބޯޓު ރާއްޖޭގެ އެމްއެންޑީއެފުން ހޯދައިފި އެވެ.
އެމްއެންޑީއެފްގެ އިންފޮމޭޝަން އޮފިސަރު ކެޕްޓަން އިބްރާހިމް އާޒިމް ވިދާޅުވީ، ހާލުގައި ޖެހުނު ލަންކާ ބޯޓު ފެނިފައިވަނީ ނ. މަނަދޫ ކައިރިން މިއަދު ހެނދުނު 9:45 އެހާކަންހާއިރު ކަމަށެވެ. އަދި ބުނީ އޭގައި ދަތުރުކުރި ހަ މީހުންގެ ވެސް ހާލު ރަނގަޅު ކަމަށެވެ.
ސްރީލަންކާގެ އެ މަސް ބޯޓުގެ އިންޖީނު ހުއްޓިގެން ރާއްޖޭ ކަނޑުގެ ސަރަހައްދަށް އޮޔާ ދަމުންދާ ކަމަށް ސްރީލަންކާގެ ވެރިރަށް ކޮލޮމްބޯގެ މެރިޓައިމް ކޯޑިނޭޝަން ރެސްކިއު ސެންޓާ (އެމްއާރްސީސީ) އިން އެމްއެންޑީއެފްއަށް ރިޕޯޓް ކޮށްފައިވަނީ އިއްޔެ ހަވީރު 5:30 ގައި އެވެ.