ވ. ފެލިދޫގައި ކައިރީ އޮންނަ ފަޅެއް ކަމަށްވާ، ކަށަވަރު ފަޅު ތެރެއިން ބޭރުގެ ޑިންގީއެއް ފުލުހުން ހޮވައިފި އެވެ.
ފުލުހުން ބުނީ، ކަށަވަރު ފަޅު ތެރެއިން ޑިންގީއެއް ފެނިގެން އޭގެ މައުލޫމާތު ފުލުހުންނަށް ލިބިފައިވަނީ އިއްޔެ މެންދުރު ކަމަށާއި ފެނުނުއިރު ޑިންގީގައި އެއްވެސް މީހަކު ނެތް ކަމަށެވެ. އަދި ޑިންގީ ހޮވައިގެން ގެންގޮސްފައިވަނީ އެއަތޮޅު ފެލިދޫއަށް ކަމަށާއި މިހާރު ކުރަމުންދާ މަސައްކަތަކީ އެ ޑިންގީ އަކީ ކޮން ގައުމެއްގެ އެއްޗެއްކަން ބެލުމުގެ މަސައްކަތް ކަމަށް ފުލުހުން ބުންޏެވެ.
ފެލިދޫ ކައުންސިލްގެ ނައިބް ރައީސް އަލީ ރަޝީދު ވިދާޅުވީ، އިއްޔެ ހަވީރު އެރަށަށް ފުލުހުން ޑިންގީއެއް ގެނެސްފައިވާ ކަމަށާއި އެކަމުގެ މައުލޫމާތު ފުލުހުންނަށް ދީފައިވަނީ އެރަށު ލައުންޗަކަށް އެ ޑިންގީ ފެނިގެން ކަމަށެވެ. އަދި އެ ޑިންގީ ބޮޑަށް ވައްތަރީ ލަންކާގެ ޑިންގީއަކާ ކަމަށާއި ނަމަވެސް އެކަމާގުޅޭ އެއްވެސް މައުލޫމާތެއް ފުލުހުން ކައުންސިލަށް ދީފައިނުވާ ކަމަށް ރަޝީދު ވިދާޅުވި އެވެ.
"އިއްޔެ ހަވީރު ގެނެސްފައިވަނީ، އޭގައި ގާތްގަނޑަކަށް ދިގު މިނުގަ 21 ނުވަތަ 22 ފޫޓް ހުންނާނެ، ފުޅާމިނުގައި ގާތްގަނޑަކަށް ހަ ފޫތް ވަރު ހުންނާނެ، އޭގެ ނެތް އިންޖީނެތްވެސް، އޭތި ފެނިފަވަނީ މިިރަށު ލޯންޗަކަށް، އެކަން ފުލުހުންނަށް އެންގުމުން ވަނީ މިރަށަށް އެ ޑިންގީ ކަފު ޖަހައިގެން ގެނެސްފައި، ނަމަވެސް އޭގެ އެއްވެސް މައުލޫމާތެއް ފުލުހުން ދީފައެއް ނުވޭ،" ރަޝީދު ވިދާޅުވި އެވެ.
އެމްއެންޑީއެފުން އިއްޔެ ވަނީ ހަ މީހުންނާއެކު ދަތުރު ކުރަނިކޮށް އިންޖީނު ހުއްޓިގެން ހާލުގައި ޖެހުނު ސްރީލަންކާގެ މަސް ބޯޓެއްވެސް ހޯދާފަ އެވެ.