ކުރީގެ ރައީސް މުހައްމަދު ނަޝީދުގެ ފުރާނައަށް ނުރައްކާވާފަދަ ހަމަލާއެއް ދޭން އުޅުނު ކަމަށްބުނި މައްސަލަ ކުރީގެ ރައީސް މައުމޫން އަބުދުލްގައްޔޫމް ކުއްވެރިކުރައްވައިފި އެވެ.
ރައީސް ނަޝީދު ބައިވެރިވަޑައިގަންނަވާ ގޮތަށް އަވަށްޓެރި ސްރީލަންކާގައި އިންތިޒާމްކޮށް ބާއްވަން އުޅުނު ހަފުލާއެއް އެމަނިކުފާނުގެ ފުރާނަފުޅަށް ނުރައްކާވާފަދަ ހަމަލާއެއް ދޭން އުޅުނު ކަމަށް ބުނެ ކެންސަލްކޮށް، އެ ހަފުލާ ނުބާއްވަން ވަނީ ނިންމާފަ އެވެ.
އެކަމާ ގުޅިގެން ރައީސް މައުމޫން މިރޭ ކުރެއްވި ޓްވީޓެއްގައި ވިދާޅުވީ، ލަންކާގައި ދިރިއުޅޭ ރާއްޖޭގެ ރައްޔިތުުންނާއި ބައްދަލު ކުރައްވަން ނިންމާފައިވަނިކޮށް، ރައީސް ނަޝީދުގެ ފުރާނަފުޅަށް ގެއްލުންވާފަދަ ހަމަލާއެއް ދޭން އުޅުނުކަމުގެ މައްސަލައަކާއި ގުޅިގެން އެކަން ކެންސަލް ކުރަން ޖެހުމުން އެކަމާ ވަރަށް ބޮޑަށް ކަންބޮޑުވާ ކަމަށެވެ. އަދި އެފަދަ އަމަލުތައް ވަރަށް ބޮޑަށް ކުށްވެރިކުރައްވާ ކަމަށް މައުމޫން ވިދާޅުވި އެވެ.
ލަންކާގައި ހުންނަވައިގެން ރާއްޖެ ޓީވީ މެދުވެރިކޮށް ރައީސް ނަޝީދުގެ ސަރުކާރުގެ ފޮރިން މިނިސްޓަރު އަހުމަދު ނަސީމު މިދިޔަ ހުކުރު ދުވަހުގެ ރޭ ވިދާޅުވީ ރައީސް ނަޝީދު ބައިވެރިވަޑައިގަންނަވަން އޮތް ހަފުލާ ނުބާއްވަން ނިންމެވީ އެ ހަފުލާއާ ދިމާކޮށް ދިވެހިންގެ ބަޔަކު ހަމަނުޖެހުމެއް ހިންގަން ރާވާ ކަމަށް ބެލެވިގެން ކަމަށެވެ.
ބައްދަލުވުން ކެންސަލް ކުރަން ނިންމި އަނެއް ސަބަބެއް ކަމަށް އޭނާ ވިދާޅުވީ ހަފުލާއާ ގުޅުގެން އެއްވެސް ހަމަނުޖެހުމެއް ހިނގައިފި ނަމަ ދިވެހިންގެ ބަޔަކު ގާނޫނާ ހިލާފަށް ހިންގި އަމަލަކަށް އެކަން ވާނެކަން ކަމަށެވެ.
ނަޝީދު ބައިވެރިވެވަޑައިގަންނަވާ ހަފުލާއެއް ބާއްވަން ނިންމީ ލަންކާގައި އަލަށް އުފައްދާފައިވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ގޮފިންނެވެ.