މި ސަރުކާރުން ގާނޫނާއި ގަވާއިދާއި ހިލާފަށް ހިފާ، ހައްޔަރު ކޮށްފައިވާ ބޭފުޅަކު ދެއްކެވުމަށް ރައީސް އަބުދުﷲ ޔާމީން އަބުދުުލްގައްޔޫމް އިދިކޮޅު ފަރާތްތަކަށް ގޮވާލައިފި އެވެ.
ބ. ކެންދޫ އަށް ވަޑައިގެން ރައްޔިތުންނާއި ބައްދަލު ކުރައްވައި ރައީސް ޔާމީން ވިދާޅުވީ، މި ސަރުކާރަށް އަމާޒުވާ އެންމެ ބޮޑު އެއް ކަމަކީ ހުރިހާ ސިޔާސީ ލީޑަރުން ހިފާ ހައްޔަރު ކުރާ ވާހަކަ ކަމަށާއި މި ސަރުކާރަކީ އަނިޔާވެރި ސަރުކާރެއް ކަމަށެވެ.
އެކަމަށް ރައްދު ދެއްވައި ރައީސް ވިދާޅުވީ، މީހުން ހިފާ ހައްޔަރުކޮށް އަނިޔާވެރިވެފައިވަނީ މި ސަރުކާރުން ނޫން ކަމަށެވެ. އަދި ވިދާޅުވީ، އެކަމަކީ ގަދީމީ ޒަމާނުއްސުރެ ކުރަމުން އަންނަ ކަމެއް ކަމަށާއި އަނިޔާ އަކަށް ވަނީ ގާނޫނާއި ނިޒާމުގެ ބޭރުން މީހުން ހައްޔަރު ކުރުމުން ކަމަށް ރައީސް ވިދާޅުވި އެވެ.
"އަޅުގަނޑުމެން އަމާޒުވާ ކަންކަމުގެ ތެރޭގައި އެންމެ ބޮޑު އެއް ކަމަކީ، ހުރިހާ ސިޔާސީ ލީޑަރުން ހިފާ ހައްޔަރު ކުރާ ވާހަކަ، އަނިޔާވެރި ސަރުކާރެއްގެ ވާހަކަ، އަަނިޔާވެރި ސަރުކާރެއްގެ ވާހަކަ އިވޭއިރު އަޅުގަނޑުމެން ގަބޫލުކުރަންވާނެ އަނިޔާ އަކީ ކޮންއެއްޗެއްތޯ، މި ސަރުކާރަކުން ނޫން އަނިޔާވެރިވެފަ އޮތީކީ، މި ސަރުކާރަކުން ނޫން މީހުން ހިފާ ހައްޔަރު ކުރަނީކީ، ހިފާ ހައްޔަރު ކުރުމަކީ ދެވޭ އަދަބެއް ކަމަށްވަންޔާ، މިއީ ގަދީމީ ޒަމާނުއްސުރެ ކުރާ ކަމެއް،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، މިސަރުކާރުން ގާނޫނާއި ގަވާއިދާ ހިލާފަށް ހައްޔަރުކޮށް ބަންދު ކޮށްފައިވާ އެއްވެސް ބޭފުޅަކު ނުހުންނާނެ ކަމަށެވެ. އަދި އިދިކޮޅު ސިޔާސީ ބޭފުޅުން އަދި ސަރުކާރަށް ނިސްބަތްކޮށް އަނިޔާވެރި ސަރުކާރެއް ކަމަށް ވިދާޅުވާ ބޭފުޅުން އެއްސެވިކަމުގައިވީ ނަމަވެސް އެބޭފުޅުންނަށް ނުދެއްކެނެ ކަމަށް ރައީސް ވިދާޅުވި އެވެ.
"ތިބޭފުޅުން ތިބޭފުން އަރިހަށް ވަޑައިގަންނަވާ ސިޔާސީ ބޭފުޅުން އަދި މިސަރުކާރަށް ނިސްބަތްކޮށް އަނިޔާވެރި ސަރުކާރެއް ކަމަށް ވިދާޅުވާ ބޭފުޅުން ކައިރީގައި އައްސަވާބަލަ އެގޮތަަށް ހިފާ ހައްޔަރު ކުރި، ޔާމީންގެ ސަރުކާރުން އެގޮތައް ހިފާ ހައްޔަރު ކުރި އެންމެ މީހަކު ދައްކަބަލާށޭ، އެކަމެއް ނުވާނެ، އެކަމެއް އެބޭފުޅުންނަކަށް ނުވާނެ،" ރައީސް ވިދާޅުވި އެވެ.
އިދިކޮޅު މަޖިލިސް މެންބަރުންނަށް ރައީސް ވިދާޅުވީ، ރައްޔިތުން މަޖިލީހުގެ މެންބަރުންނަކީ ރައްޔިތުންގެ ވަރަށް ބޮޑު އަމާނާތެއް ހަވާލު ކޮށްފައިވާ މަންދޫބުންތަކެއް ކަމަށާއި އެބޭފުޅުން ކަންކަން ކުރައްވާ ގޮތުން ރައްޔިތުން ވިސްނާލަންޖެހޭ ކަމަށެވެ. އަދި ކޮންމެ ރަށަކަށް ކަނޑައެޅިފައިވާ ބަޖެޓަކީ އެރަށަކަށް ފައިދާ ކުރާނެ ބަޖެޓެއް ކަމަށާއި އެ ބަޖެޓަށް ވޯޓް ނުދޭ ކަމަށްވާނަމަ ރައްޔިތުން އެކަމާމެދު މެންބަރުންނާއި ސުވާލު ކުރައްވަން ޖެހޭ ކަމަށް ރައީސް ވިދާޅުވި އެވެ.
"އަޅުގަނޑުމެން ކޮންމެ ޕާޓީއެއްގައި އުޅުނަސް ފިކުރު ކޮންމެ ގޮތަކަށް ހުއްޓަސް ކޮންމެ މީހަކު ސިޔާސީ އިސް މީހެއް ކަމަށް ބަލައިގެން ހުއްޓަސް އެންމެ ފުރަތަމަ ކުރަން ޖެެހޭ ސުވާލަކީ ރައްޔިތުންނަށް ފައިދާހުރި މަޝްރޫއުތަކެއް ބަޖެޓްގެ ސިފައިގައި ހުށަހެޅިގެން ދިޔާމަ، އެ ބަޖެޓަށް ވޯޓް ނުދީ ފައިސާ ހަރަދު ކުރުމުގެ ހުއްދައަށް އެހީމަ ނޫނެކޭ ބުނެފައި، އެއަށް ވޯޓްނުދޭ މީހުން ރައްޔިތުންނަށް އުފުލަނީ ކޮން ޒިންމާއެއްތޯ، ޒިންމާއެއް އުފުލޭތޯ، އެސުވާލު ކުރައްވަން ޖެހޭ،" ރައީސް ވިދާޅުވި އެވެ.
ރައީސް ވިދާޅުވީ، މެންބަރުން މަގާމަށް ހޮވުމުން ރައްޔިތުން ބޭނުންވާ ތަރައްގީ ގެނައުމަށް ސަރުކާރުން ކުރަމުންދާ މަސައްކަތަށް ބައެއް މެންބަރުން ވަނީ ނޫނެކޭ ބުނެ ހުރަސް އަޅަމުން ކަމަށެވެ. އަދި ވިދާޅުވީ، ރައްޔިތުން މަޖިލީހުގެ ބަައެއް މެންބަރުން ރައްޔިތުން ބޭނުންވާ ކަންކަން ފުއްދާދިނުމުގައި ނުކުޅެދިފައިވާ ކަމަށެވެ.