ލިބިފައިވާ މުއްސަނދިކަމާއި ލިބިފައިވާ ހުރިހާ ފައިސާއަކީ މާތް ﷲ ދެއްވި ރިޒްގްގެ ސަބަބުން ލިބިފައިވާ މުއްސަނދި ކަމެއް ކަމަށް ރައީސް އަބުދުﷲ ޔާމީން އަބުދުލްގައްޔޫމް ވިދާޅުވެއްޖެ އެވެ.
ބ. އޭދަފުށީ ރައްޔިތުންނާ ބައްދަލު ކުރައްވައި ރައީސް ޔާމީން ވިދާޅުވީ، މީގެކުރިން އެމަނިކުފާނަށް އަމާޒުވާ އެންމެ ބޮޑު އެއް ކަމަކީ އެމަނިކުފާނަކީ މި ގައުމުގެ ބޮޑު މުއްސަންޖެއް ކަމަށާއި އެއީ ނާޖާއިޒް ގޮތުގައި ހޯދާފައިވާ ފައިސާ ކަމަށެވެ. ނަމަވެސް މުއްސަނދި ވެފައިވަނީ ﷲ ދެއްވި ރިޒްގުގެ ސަބަބުން ކަމަށް ރައީސް ވިދާޅުވި އެވެ. އެ ފައިސާއަކީ ނާޖާއިޒް ގޮތުގައި ހޯދާފައިވާ ފައިސާ ކަމުގައިވާނަމަ އެ މައްސަލަ ބަލަން އެތައް ސަރުކާރަކަށް ފުރުސަތު ލިބުނު ކަމަށެވެ.
ރައީސް ވިދާޅުވީ، އެ މައްސަލަ ބަލަން ވެސް ބެލި ކަމަށާއި މައްސަލަ ބަލުމަށް ބޭރުގެ ކަންސަލްޓަންޓް ވެސް ގެނައި ކަމަށެވެ. އަދި އެކަމުގައި ލިބިދާނެ ފައިސާއަށްވުރެ ބޮޑަށް އޭރުގެ ސަރުކާރުން އެކަމަށް ހޭދަ ކުރި ކަމަށެވެ.
"މީގެ ކުރިން އަޅުގަނޑަށް އަމާޒުވާ އެއް ކަމަކީ، ރާއްޖޭގައި އަޅުގަނޑު ވަރުގެ މުއްސަންޖެއް ނެތީ، އަޅުގަނޑު މުއްސަނދިއްޔާ އެއީ ﷲ ދެއްވި ރިޒްގް، ދެން އެެއީ ނާޖާއިޒް ގޮތުގައި ހޯދާފައިވާ ފައިސާ ކަމުގައިވާނަމަ އެ މައްސަލަ ބަލަން އެތައް ސަރުކާރަކަށް ފުރުސަތު ދިނިން، މައްސަލަަ ބަލަންވެސް ބެލި، މައްސަލަ ބަލަން ބޭރުގެ ކަންސަލްޓަންޓް ވެސް ހަޔާކުރި، އަދި އެކަމުގައި ލިބިދާނެ ފައިސާ އަކަށްވުރެ ބޮޑަށް ހޭދަވެސް ކުރި، 15 ވަރަކަށް މިލިއަން ޑޮލަރު ހޭދަކުރި، ބަޔަކު ހަޔާކޮށްގެން ސިންގަޕޫރުގައި އަޅުގަނޑުގެ ވިޔަފާރި ހުރިތޯވެސް ބެލި،" ރައީސް ވިދާޅުވި އެވެ.
އިދިކޮޅު ފަރާތްތަކަށް މަޝްވަރާ ކުރުމަށް ދެއްވި ފުރުސަތުތަކަށް އަލި އަޅުވާލައި ރައީސް ވިދާޅުވީ، މިސަރުކާރުން އެންމެ ފުރަތަމަވެސް އިސްކަމެއް ދީގެން ކުރި ކަމަކީ މަޝްވަރާތަކަށް ފުރުސަތު ހުޅުވާލުން ކަމަށެވެ. އަދި ވަރަށް ގިނަ ފަހަރު ސިޔާސީ ބޭފުޅުންނަށް މަޝްވަރާގެ މޭޒު ދޮށަށް ވަޑައިގަތުމަށް ދައުވަތު ދެވުނު ކަމަށާއި ނަމަވެސް އެބޭފުޅުން ދެއްކެވީ ރައްޔިތުންނަށް ގަބޫލު ނުކުރެވޭ ބުހުތާނު ހުއްޖަތުތަކެއް ކަަމަށް ރައީސް ވިދާޅުވި އެވެ.
"މަސައްކަތް ކުރުމަށް އާދެވޭނީ މިވެނި ހުކުމެއް ތަންފީޒު ކުރަމުންދާ މީހަކު ވީއްލުވީމައޭ، އެއީ އަޅުގަނޑަށް ކުރެވޭނެ ކަމެއް ނޫން، ރަހީނުން ދޫކޮށް ނުލާ ކަމަށް ވަންޏާ ދެން މަޝްވަރާ ނުކުރާނެ ކަމަށް ވިދާޅުވާނަމަ ދެން ދައްކާނީ ކޮން ވާހަކައެއްތޯ، އަޅުގަނޑުގެ ހިޔާލާ އަޅުގަނޑުމެން ތަރައްގީ ކުރަން މިކުރާ މަސައްކަތުގައި ބައިވެރިވެ ވަޑައިގެން ރައްޔިތުންނަށް ކުރިމަގު އުޖާލާ ކޮށްދޭން ބޭނުން ހުރިހާ ބޭފުޅުން ވަޑައިގަންނަވާ އަޅުގަނޑާ ވާހަކަ ދައްކަވަން، އެކަމަކު ޝަރުތު ކަނޑަ ނާޅުއްވާ،" ރައީސް ވިދާޅުވި އެވެ.
ރައީސް ވިދާޅުވީ، ސިޔާސީ ލީޑަރުން ދޫކޮށް ނުލަނީސް މަޝްވަރާތަކަށް ނާދެވޭނެ ކަމަށް އިދިކޮޅު ގިނަ ފަރާތްތަކުން ހުއްޖަތެއްގެ ގޮތުގައި ދައްކަމުން ގެންދަވާ ކަމަށާއި ނަމަވެސް ޕާޓީއަކީ އެއް ސިޔާސީ ލީޑަރެއް ނޫން ކަމަށެވެ. އަދި ވިދާޅުވީ، ޕާޓީގެ އެންމެ މުހިންމު މަސްއޫލިއްޔަތު އުފުލާ މީހަކަށް ލީޑަރު ވެދާނެ ކަމަށާއި ނަމަވެސް އެއީ މަޝްވަރާ ނުކުރެވެންވީ ސަބަބެއް ކަމަށް ވެގެން ނުވާނެ ކަމަށެވެ.
ރައީސް ވިދާޅުވީ، ވަރަށް ގިނަ ފިކުރުގެ ބޭފުޅުންނާއެކު މަސައްކަތް ކުރެވިއްޖެ ކަމަށާއި ނަމަވެސް ހުރިހާ ފިކުރެއްގެ ބޭފުޅުންނާއެކުގައި މަސައްކަތް ނުކުރެވޭ ކަމަށް އެމަނިކުފާނާ ވަރަށް ގާތުގައި މަސައްކަތް ކުރެއްވި ބޭފުޅަކު ވިދާޅުވި ކަމަށެވެ. ނަމަވެސް ރައީސް ވިދާޅުވީ މިއަދު ވެސް ހުރިހާ ސިޔާސީ ފިކުރެއްގެ މީހުންނާއެކު މަސައްކަތް ކުރެވޭނެ ކަމަށެވެ. އެހެންނަމަވެސް ހުރިހާ ސިޔާސީ ބޭފުޅުން އެއްވެގެން އެމަނިކުފާނު ކަފުނަށް ތިރިކުރަންދެން ނުހުންނާނެ ކަމަށެވެ. އެއީ އެމަނިކުފާނުގެ ހިދުމަތަކީ ރައްޔިތުނަށް ފޯރުކޮށްދޭންޖެހޭ ހިދުމަތަކަށް ވާތީ ކަމަށް ރައީސް ވިދާޅުވި އެވެ.
"އަޅުގަނޑާއި ވަރަށް ގާތުން މަސައްކަތް ކުރެއްވި ބޭފުޅަކު ވިދާޅުވީ، ތިމަންނަމެން ރައީސް ޔާމިނާ ގުޅުނީ ނޫނީ ޔާމިނާ ގުޅިގެން ރައީސް ކަމަށް ގެންނަން މަސައްކަތް ކުރީ ހުރިހާ ފިކުރެއްގެ މީހުންނާއެކު މަސައްކަތް ކުރާނެ ކަމަށް، މިއަދުވެސް މިބުނަނީ ހުރިހާ ސިޔާސީ ފިކުރެއްގެ މީހުންނާއެކު މަސައްކަތް ކުރެވޭނެ،" ރައީސް ވިދާޅުވި އެވެ.