މިވަގުތަކީ ސިޔާސީ ލީޑަރުންގެ އަމިއްލަ ވިސްނުންތަކަށްވުރެ ގައުމާއި ރައްޔިތުންގެ މަސްލަހަތު އިސްކުރަންވީ ވަގުތު ކަމަށް އަދާލަތު ޕާޓީގެ ރައީސް އިމްރާން އަބްދުﷲ މިރޭ ވިދާޅުވެއްޖެ އެވެ.
ރާއްޖެ އަށް ކުރިމަތިވި ބިރުވެރި، ސުނާމީ ހާދިސާއަށް 13 އަހަރު ފުރުމާއި، އެއްބައިވަންތަކަމުގެ ދުވަހާ ގުޅިގެން އިމްރާން ދެއްވި މެސެޖެއްގައި ވިދާޅުވީ، ސުނާމީ ކާރިސާއާ ގުޅިގެން ދިވެހީން ދެއްކި އެއްބައިވަންތަކަމާއި އެކުވެރިކަމަށް ތައުރީފާއި ޝުކުރު ހައްގުވާ ކަމަށެވެ. އަދި އެދުވަހަކީ، ކުރީގެ ރީތި އެއްބައިވަންތަކަމާއި އެކުވެރިކަން ފަހުގެ ތާރީހެއްގައި ދެއްކި ދުވަސް ކަމަށް އިމްރާން ވިދާޅުވި އެވެ.
ކުނޫޒުގައި މިރޭ އިއްވި މެސެޖްގައި އިމްރާން ވިދާޅުވީ، 2013 ވަނަ އަހަރު ގާއިމްކުރި ވެރިކަން ފަސާދަވެ ހަމައިންނެއްޓި، އަނިޔާވެރިކަން ހައްދުން ނެއްޓިފައިވާ ކަމަށެވެ. ސަރުކާރު ހިންގަން ތިބި ފަރާތްތަކުގެ އަނިޔާވެރިކަމާއި ވައްކަން ހުއްޓުވަން އޮތް ހަމައެކަނި މަގަކީ އެންމެ ގުޅިގެން އަންނަ ރިޔާސީ އިންތިހާބު ކަށަވަރުކޮށް އެ އިންތިހާބު ކާމިޔާބު ކުރުން ކަމަށެވެ.
"ކުރިއަށް އޮތް ދުވަސްތަކަކީ ދިވެހީންގެ ގައުމީ އެއްބައިވަންތަކަން ހާމަކޮށް ދެއްކުން މުހިންމު ދުވަސްތަކެއް، މިވަގުތަކީ ސިޔާސީ ލީޑަރުންގެ އަމިއްލަ ވިސްނުންތަކަށްވުރެ ގައުމާއި ރައްޔިތުންގެ މަސްލަހަތު އިސްކުރަންވީ ވަގުތު، މިފަަދަ ދަތި އުނދަގޫ ދަނޑިވަޅުތަކުގައި ރައްޔިތުންގެ މަސްލަހަތު އިސްކުރަނީ ކޮން ބައެއްކަން ރައްޔިތުން އަބަދުވެސް ފާހަގަ ކުރާނެ،" އިމްރާން ވިދާޅުވި އެވެ.
އިމްރާން ވިދާޅުވީ، ދިވެހި ގައުމަށް ބޭނުންވާ ތަރައްގީ އާއި ކުރިއެރުމުގެ އަސާސަކަށް ވާން ޖެހޭނީ، މަދުބަޔަކަށް މަންފާވާ ވިޔަފާރީގެ މުއާމަލާތްތަކާއި ދަރަނިވެރިވެފައިވާ އިގްތިސޯދަކާއި އަދުލު އިންސާފު ގެއްލި ނަހަމައިން ނޫން ގޮތަކަށް ކަންކަން ހިންގޭނެ އުސޫލުތަކެއް ނޫން ކަަމަށެވެ. އަދި ވިދާޅުވީ، ކުރިއެރުމަކީ ރައްޔިތުންގެ ވިސްނުމާއި ފިކުރު އަނިޔާގެ ކަސްދޮޅުގައި ޒަމީރު ބަންދު ކޮށްގެން ހޯދޭނެ އެއްޗެން ނޫން ކަމަށެވެ.
"ދިވެހި ގައުމަށް މިއަދު ދިމާވެފައިވާ ހާލަތަށް ވިސްނާ ފިކުރުކޮށް އަޅުގަނޑުމެންގެ މުސްތަގުބަލަށްޓަކައި އަދި އަންނާން އޮތް ޖީލްތަކަށް އަމާން އަލިމަގެއް ހޯދުމަކީ ކޮންމެ ދިވެހި ދަރިއެއްގެ ކޮނޑުގައި އެޅިފައިވާ ޒިންމާއެއް، 21 ގަރުނުގެ ދިވެހީންނަށް އެކަށީގެންވާ ދިރިއުޅުމެއް ކަށަވަރު ކުރުމަށްޓަކައި ގަދައަޅާ މަސައްކަތް ކުރުމަކީ ކޮންމެ ދިވެއްސެއްގެެވެސް ހައްގެއް އަދި ގައުމީ ވާޖިބެއް، 21 ވަނަ ގަރުނުގެ ދިވެހީންނަށް އެކަށީގެންވާ މިންވަރަކީ އިމެއްނެތް އަނިޔާވެރިކަމެއްވެސް ނޫން، ކޮންކުރިޓާއި ބޮޑުހިލަ އާއި ބޮޑު ދަގަނޑަކީ އަނިޔާވެރިކަމާއި ބޭއިންސާފާއި ވައްކަމާއި ފަސާދައިގެ ބޭރު ގިރިޓީކުރާ އެއްޗެއް ކަމުގައި ހެދުމަށް ފުރުސަތު ދީގެން ނުވާނެ،" އިމްރާން ވިދާޅުވި އެވެ.
އޭނާ ވިދާޅުވީ، ރައްޔިތުންނަށް ކަށަވަރުކޮށްދޭން ބޭނުންވަނީ ސަރުކާރުގެ ވައްކަމާއި ދެކޮޅަށް މަސައްކަތްކުރާ އެންމެހާ ފަރާތްތަކާއި ގުޅިގެން ކުރިއަށްއޮތް ރިޔާސީ އިންތިހާބު ކާމިޔާބުކޮށް ރައްްޔިތުން އެދޭފަދަ އަމާން އައްސޭރިއަކަށް ގެންގޮސްދޭނެ ކަމަށެވެ. އަދި ވިދާޅުވީ، ކުރިއަށް އޮތް މަދު ދުވަސްކޮޅެއްގެ ތެރޭގައި މިގައުމަށް ގެންނަން ޖެހޭ ބަދަލު ގަނައުމުގެ އެންމެ ފަހުގެ މަރުހަލާ ފެށިގެންދާނެ ކަމަށެވެ.
ޖަލު ހުކުމެއް ތަންފީޒުކުރެއްވުމަށް މިވަގުތު ޖަލުގައި ހުންނެވި އިމްރާން މިރޭ މެސެޖެއް ދެއްވިއިރު އިދިކޮޅު އަނެއް ތިން ލީޑަރުން ވެސް ވަނީ މެެސެޖެއް ދެއްވައި އިދިކޮޅު ކޯލިޝަން އޮތީ ބަދަހިކޮށްކަން ހާމަކުރައްވާފަ އެވެ. އަދި އެ ހަތަރު ބޭފުޅުންގެ އަމާޒާއި މަސައްކަތް ހުންނެވީ އެއް މިސްރާބަކަށްކަން ހާމަކުރައްވާފަ އެވެ.