ކުއްލި ނުރައްކަލުގެ ހާލަތު އިއުލާންކުރުމާއި އެއާ ވިދިގެން އެއްވެ އުޅުމުގެ މިނިވަންކަން ހިފަހައްޓައި، ކުރީގެ ރައީސް މައުމޫން އަބްދުލް ގައްޔޫމްއާއި އުއްތަމަ ފަނޑިޔާރު އަބްދުﷲ ސައީދާއި ސުޕްރީމްކޯޓުގެ ފަނޑިޔާރު އަލީ ހަމީދު ހައްޔަރުކޮށްފައިވާތީ ފްރާންސުން ކަންބޮޑުވުން ފާޅުކޮށްފި އެވެ. އެގައުމުން ވަނީ ކުއްލި ނުރައްކަލުގެ ހާލަތު އުވާލައި ގާނޫނާ ގަވާއިދުތަކުގެ ތެރެއަށް އަލުން އައުމަށް ދިވެހި ސަރުކާރަށް ގޮވާލާފަ އެވެ.
ކުއްލި ނުރައްކަލުގެ ހާލަތާ ގުޅިގެން ހިޔާލުފާޅުކުރުމާއި އެއްވެ އުޅުމުގެ މިނިވަންކަން ހިފަހައްޓާފައިވާތީ ކަންބޮޑުވުން ފާޅުކޮށް ފްރާސް ސަރުކާރުން ނެރުނު ބަޔާނުގައި ބުނީ، ހިޔާލު ފާޅުކުރުމުގެ މިނިވަންކަމަކީ އަސާސީ ހައްގެއް ކަމަށާއި އެ ހައްގު އިދިކޮޅު ފަރާތްތަކަށް ވެސް ލިބިދޭންޖެހ ކަމަށް އެގައުމުން ދެކޭ ކަމަށެވެ.
"މުއައްސަސާތަކުގެ ހިންގުން އާންމު އުސޫލަށް ބަދަލުކޮށް ގާނޫނުތަކުން އަންގާ ގޮތަށް ކަންކަން ވީހާވެސް އަވަހަށް ރުޖޫއުކުރަން ގޮވާލަން،"
ހޯމަ ދުވަހުގެ ރޭ ރާއްޖޭގައި ކުއްލި ނުރައްކަލުގެ ހާލަތު އިއުލާންކޮށް، ކުރީގެ ރައީސް މައުމޫނާއި ދެ ފަނޑިޔާރުން ހައްޔަރުކޮށްފައިވާއިރު އެކަމާ ގުޅިގެން ދުނިޔޭގެ ބޮޑެތި ގައުމުތަކުން ދަނީ ކަންބޮޑުވުން ފާޅުކޮށް ކުއްލި ނުރައްކަލުގެ ހާލަތު އުވާލުމަށް ސަރުކާރަށް ގޮވާލަމުންނެވެ. އަދި ސުޕްރީމް ކޯޓުން ނެރުނު އަމުރަށް އަމަލު ނުކުރުމަށް ރާއްޖޭގައި ކުއްލި ނުރައްކަލުގެ ހާލަތު އިއުލާންކޮށް އުއްތަމަ ފަނޑިޔާރާއި ސުޕްރީމް ކޯޓްގެ އެހެން ފަނޑިޔާރަކާއި ކުރީގެ ރައީސް މައުމޫން އަބްދުލްގައްޔޫމް ހައްޔަރު ކުރުމުން، އެކަމާ ގުޅިގެން މަޝްވަރާކުރުމަށް އދ ގެ ސަލާމަތީ މަޖިލީހުގެ ރަސްމީ އެޖެންޑާގައި އެ މައްސަލަ ހިމަނަންވެސް ވަނީ ނިންމާފަ އެވެ.