މިރޭގެ މުޒާހަރާ ކަވާ ކުރަމުން ދަނިކޮށް ހައްޔަރު ކުރި ރާއްޖެ ޓީވީގެ ނޫސްވެރިޔާ ހުސެއިން ހަސަންގެ ހާލު ސީރިއަސްވެ ފަރުވާ ދިނުމަށް އޭޑީކޭ އަށް ގެންގޮސްފި އެވެ.
ހުސެއިން ހައްޔަރުކޮށްގެން ގެންގޮސްފައިވަނީ ފުލުހުންގެ އިދާރާ އަށެވެ. އޭގެ ފަހުން ހުސެއިން ހާލު ސީރިއަސްވެ އޭނާ އޭޑީކޭއަށް ގެންގޮސްފައިވަނީ ފުލުހުންގެ ވެހިކަލެއްގަ އެވެ. އޭނާއަށް ލިބިފައިވަނީ ކިހާވަރެއްގެ އަނިޔާއެއް ކަމެއް ނޭނގެ އެވެ.
ހުސެެއިންގެ ވަކީލު މޫސާ ސިރާޖް ވިދާޅުވީ، ހުސެއިންގެ ހާލު ސީރިއަށް ކަމަށެވެ.
ހުސެއިންގެ އިތުރުން ވީޓީވީގެ ނޫސްވެރިޔާ ލީވާން ނަސީރުވެސް ވަނީ މިރޭ ހައްޔަރުކޮށްފަ އެވެ. އެ ދެ ނޫސްވެރިން ވެސް ހައްޔަރުކޮށްފައިވަނީ މަޖީދީމަގާއި ޗާންދަނިމަގު ގުޅޭ ސަރަހައްދުންނެވެ.
މިރޭގެ މުޒާހަރާގައި ނޫސްވެރިން ދުރަށް ޖެއްސުމަށް މަސައްކަތް ކުރި ވަގުތު ބައެއް ނޫސްވެރިންނަށް ވަނީ އަނިޔާވެފަ އެވެ. އަދި ބައެއް ނޫސްވެރިންގެ މޫނަށް ފުލުހުން ވަނީ ޕެޕާ ސުޕްރޭވެސް ޖަހާފަ އެވެ. އަނިޔާވި ބައެއް ނޫސްވެރިންނަށް މިހާރު ދަނީ އޭޑީކޭގައި ފަރުވާ ދެމުންނެވެ. އެގޮތުން ރާއްޖެ ޓީވީގެ ނޫސްވެރިޔަކާއި ސަންގް ޓީވީގެ ދެ ނޫސްވެރިޔަކަށް އަދި ވީޓީވީ ދެ ނޫސްވެރިޔަކަށް ދަނީ ފަރުވާދެމުންނެވެ.