ސުނާމީގައި ރާއްޖެއިން މަރުވި، އަދި ގެއްލުނު މީހުންގެ ހަނދާނުގައި ބަހައްޓާފައިވާ ސުނާމީ ބިނާ ހުރިތަނުން އެހެންތަކަނަށް ބަދަލުކުރަން ނިންމާފައިވާތީ އެ ބިނާ ތ. ވިލުފުއްޓަށް ބަދަލުކޮށްދޭން އެރަށު ކައުންސިލުން އެދެފި އެވެ.
ވިލުފުއްޓަކީ ސުނާމީގައި އެންމެ ބޮޑަށް ގެއްލުންވި ރަށްތަކުގެ ތެރޭގައި ހިމެނޭ ރަށެކެވެ. އެންމެ ގިނަ މީހުން މަރުވީ ވެސް އެރަށުންނެވެ.
ވިލުފުށީ ކައުންސިލުން ހައުސިން މިނިސްޓަރަށް ފޮނުވި ސިޓީގައި ބުނަނީ ސުނާމީގައި އެންމެ ގިނަ މީހުން މަރުވެ އެންމެ ބޮޑަށް ގެއްލުންވި ރަށް ކަމަށައި އެ ރަށުގައި ސުނާމީގެ ހަނދާނުގައި އެއްވެސް ބިނާއެއް ނެތް ކަމަށާއި އެހެން ކަމުން މާލޭގައި ހުރި ބިނާ ވިލުފުއްޓަށް ބަދަލު ކޮށްދޭން އެދޭ ކަމަށެވެ.
ލޮނުޒިޔާރަތްކޮޅުގައި ހުރި ސުނާމީ ބިނާ އެތަނުން އެހެން ތަނަކަށް ބަދަލު ކުރަނީ ހުޅުމާލެއާއި މާލެއާ ދޭތެރޭ އަޅާ ބްރިޖު މާލެއިން ފަށާ ހިސާބަކީ ބިނާ ހުރި ސަރަހައްދު ކަމަށްވާތީ އެވެ.
ސުނާމީ ބިނާގައި ފެންނަ ބޯޅަ ތަކަކީ ރާއްޖޭގެ ކޮން،މެ އަތޮޅަކަށް ބޯޅައެކެވެ. އަދި މަރުވި ކޮންމެ މީހަކަށް ހޮޅިއެކެވެ.