އަންނަ ހަފުތާގެ ތެރޭގައި ރައްޔިތުންގެ މަޖިލީހުގެ ޖަލްސާތައް އަލުން ފަށާނެ ކަމަށް ޕީޕީއެމްގެ ޕީޖީ ގްރޫޕް ލީޑަރު އަދި ވިލިމާލޭ ދާއިރާގެ މެންބަރު އަހުމަދު ނިހާން ހުސެއިން މަނިކު ވިދާޅުވެއްޖެ އެވެ.
ޕީއެސްއެމްއަށް ދެއްވި އިންޓަވިއުއެއްގައި ނިހާން ވިދާޅުވީ މަޖިލީހުގެ ޖަލްސާތައް ހުއްޓިފައި އޮތީ ކުރާނެ މަސައްކަތެއް ނެތިގެން ނޫން ކަމަށާއި ގިނަ ބިލުތަކެއްގެ މަސައްކަތް މަޖިލީހުގައި ކުރަން އެބަ ހުރި ކަމަށެވެ. ނަމަވެސް އެ މަސައްކަތްތަކަކީ އިދިކޮޅު މެންބަރުންގެ ބައިވެރިވުން ވެސް ހިމެނޭ ގޮތަށް ކުރެވޭނެ މަސައްކަތްތައް ކަމަށާއި އަންނަ ހަފްތާގެ ތެރޭގައި ޖަލްސާތައް އަލުން ފަށާނެ ކަމަށެވެ.
"މަޖިލީހުގައި މިހާރު ހުރި މަސައްކަތްތައް ކުރެވޭނީ ހަމައެކަނި ޕީޕީއެމް ނުވަތަ ސަރުކާރު ފަޅީގެ މެންބަރުންނަށް އެކަންޏެއް ނޫން، އިދިކޮޅު މެންބަރުންގެ ހިޔާލާއި ލަފާ ވެސް ބޭނުންވޭ، މާނައަކީ އެ މަސައްކަތްތަކަކީ ހައްސާސް މަސައްކަތްތަކޭ،" ނިހާން ވިދާޅުވި އެވެ.
މި އަހަރުގެ މި ދައުރު ކުރިޔަށް ދިޔަ އިރު މިހާތަނަށް 11 ޖަލްސާއެއް ބާއްވާފައިވެ އެވެ. އެގޮތުން އެންމެ ފަހުން ޖަލްސާއެއް ބާއްވާފައި ވަނީ މި މަހުގެ 14 ވަނަ ދުވަހުގަ އެވެ. އޭގެ ފަހުން އެއްވެސް ޖަލްސާއެއް ނުވަތަ ކޮމިޓީ ބައްދަލުވުމެއް ވެސް ނުބާއްވަ އެވެ.
ނަމަވެސް ގަވައިދުގައިވާ ގޮތުން ޗުއްޓީ ނޫން ދުވަސްތަކުގައި ކޮންމެ ހަފުތާއެއްގެ ވެސް ހޯމަ އަންގާރަ އަދި ބުދަ ދުވަހު ޖަލްސާ ބާއްވާން ޖެހެ އެވެ.