ރައްޔިތުން މަޖިލީހުގެ އަމީންއާންމުގެ މަގާމަށް ކުރިމަތިލުމުގެ ފުރުސަތު އެ އިދާރާއިން މިއަދު ހުޅުވާލައިފި އެވެ.
އަމީންއާންމަކު ހޯދަން މަޖިލީހުން އިއުލާން ކުރީ، ސުޕްރީމް ކޯޓުން 1 ފެބްރުއަރީގައި ނެރުނު އަމުރާ ގުޅިގެން މަޖިލީހުގެ އަމީންއާންމުގެ މަގާމުގައި މިހާތަނަށް ހުންނެވި އަހުމަދު މުހައްމަދު އެ މަހު ހަތަރު ވަނަ ދުވަހު އިސްތިއުފާ ދެއްވުމާ ގުޅިގެނެވެ. އޭގެ ފަހުން އެ މަގާމް އަދާ ކުރަމުން އައީ އަމީންއާންމުގެ ނައިބެވެ.
މަޖިލީހުން މިއަދު ކުރި އިއުލަނެއްގައި ބުނެފައި ވަނީ އަމީންއާންމުގެ މަގާމަށް ކުރިމަތިލުމަށް ބޭނުންވާ ފަރާތްތަކުން އަންނަ ހޯމަ ދުވަހުގެ ކުރިން އެ އިދާރާއަށް ހުށަހެޅުމަށް ހުޅުވާލާ ކަމަށެވެ. އަދި އަމީންއާންމްގެ މަގާމަށް ކުރިމަތިލާ މީހުންގެ ޝަރުތުތަކުގެ ތެރޭގައި ގާނޫނީ ދާއިރާއިން މަތީ ތަމްރީން ހާސިލްކޮށްފައިވުމާއި މަޖިލީހަށް ގާނޫނީ ލަފަޔާއި މަޝްވަރާ ދެވޭ ފެންވަރުގެ މީހަކަށް ވުމެވެ. އުމުރުން 25 އަހަރަށް ވުރެ މަތިވެފައިވާން ޖެހޭ ކަމަށާއި އެ މީހަކީ ޖިނާއީ ކުށެއް ކުރިކަން ސާބިތުވެގެން އަހަރަކަށް ވުރެ ގިނަ ދުވަސް ހުކުމްކޮށްފައި ނުވާ މީހަކަށް ވުމާއި އަދި އެ ހުކުމްކޮށް ނިމުން ނުވަތަ މާފް ކުރިތާ ތިން އަހަރުވެފައިވާ މީހަކަށް ވާން ޖެހޭ ކަމަށް ވެސް އެ އިއުލާނުގައި ބުނެފައިވެ އެވެ.
އަމީންއާންމުގެ މުސާރައާއި އިނާަޔަތްތަކާއެކު މަހަކު 55،000 ރުފިޔާ ލިބޭނެ ކަމަށް ވެސް އި އިއުލާނުގައި ބުނެފައިވެ އެވެ. އަދި އެނާގެ މައްސޫލިއްޔަތަކަށް ވާނީ މަޖިލީހުގެ ޖަލްސާތަކާއި ބެހޭ ކަންކަން ހަމަޖައްސާ، ލިޔެކިޔުންތައް ބަލަހައްޓައި އަދި އިދާރީ މަސައްކަތްތައް ރާވާ ހިންގުމާއި މަޖިލީހުގެ ރައީސްއަށާއި މެންބަރުންނަށް އެހީތެރިވުމެވެ.