ރިޔާސީ އިންތިހާބާ ބެހޭ ގާނޫނަށާއި އާންމު އިންތިހާބާ ބެހޭ ގާނޫނަށް ހުށަހަޅާފައިވާ އިސްލާހުތައް ފާސް ކުރުމަށް ބޭނުންވާ ވަރަށް މެންބަރުން މަޖިލީހަށް ހާޒިރު ނުވުމުން އެ އިސްލާހުތަކަށް ވޯޓަށް ނާހާ މިއަދު ވެސް މަޖިލީސް ނިންމާލައިފި އެވެ.
އެ އިސްލާހުތައް ފާސް ކުރާ ވަރަށް މެންބަރުން ހަމަ ނުވާތީ މެންބަރުން މަޖިލީހަށް ހާޒިރުވެވަޑައިގަތުމަށް އިލްތިމާސް ކުރެއްވުމަށް ފަހު މަޖިލީހުގެ ރައީސް އަބްދުﷲ މަސީހު މުހައްމަދު އިއްޔެ ވަނީ އެ އިސްލާހުތަކަށް ވޯޓަށް ނާހާ ފަސްކޮށްލާފަ އެވެ. އެގޮތުން މިއަދު މަޖިލީހުގެ އެޖެންޑާގައި އޮތީ އެ އިސްލާހުތަކަށް އަލުން ވޯޓަށް އެހުން އެކަންޏެވެ. އެއީ ސަރުކާރު ފަރާތުން ވިލިމާލޭ ދާއިރާގެ މެންބަރު އަހުމަދު ނިހާން ހުސެއިން މަނިކު ހުށަހެޅުއްވި ބޭރުގެ އެކި ގައުމުތަކުގެ ސިޔާސީ ހިމާޔަތް ހޯދާފައިވާ މީހުންނަށް ރިޔާސީ އިންތިހާބުތަކުގައި ވާދަ ނުކުރެވޭ ގޮތަށް ހަދާ އިސްލާހާއި ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް ހުށަހެޅުއްވި ރިޔާސީ އިންތިހާބަށް ކުރިމަތިލާ މީހުން ދައްކަން ޖެހޭ އިދާރީ ފީ 100،000 ރުފިޔާއަށް ބޮޑު ކުރާ އިސްލާހު އަދި އިންތިހާބުތަކާ ބެހޭ އާންމު ގާނޫނަށް ހުށަހަޅާފައިވާ އިސްލާހެވެ.
ނަމަވެސް މިއަދުގެ ޖަލްސާއަށް ވެސް އެ އިސްލާހުތައް ފާސް ކުރަން ބޭނުންވާ މިންވަރަށް މެންބަރުން ހާޒިރެއް ނުވެ އެވެ. ވޯޓަށް އަހާ ގަޑި، 1:30 ގައި ޖަލްސާ ފެއްޓެވުމަށް ފަހު މަސީހު ވިދާޅުވީ މިއަދު ވެސް ވޯޓަށް އަހަން ހުރީ ކުރިޔަށް އޮތް ރިޔާސީ އިންތިހާބާ ވަރަށް ބޮޑަށް ގުޅުން ހުރި އިސްލާހުތަކަކަށް ކަމަށާއި އެއީ އަންނަ ފަސް އަހަރު ރައްޔިތުން ނިންމާ ނިންމުންތަކާ ވަރަށް ބޮޑަށް ގުޅޭ އިސްލާހުތަކެއް ކަމަށެވެ. އެހެންކަމުން މަޖިލީހުގެ ގަވައިދުގައިވާ ގޮތަށް ހުރިހާ މެންބަރުން މަޖިލީހަށް ހާޒިރުވެ ވޯޓު ދިނުމަށް އިލްތިމާސް ކުރައްވާ ކަމަށް މަސީހު ވިދާޅުވި އެވެ.
"ދެން މިކަމާ ގުޅޭ ގޮތުން ބާއްވާ ޖަލްސާއެއްގައި އިއްޒަތްތެރި މެންބަރުން މަޖިލީހުގެ ގަވައިދުގެ 158 ވަނަ މާއްދާގައިވާ ގޮތުގެ މަތިން މަސައްކަތްކޮށްދެއްވުން މުހިންމު ކަމެއް،" އެގޮތަށް ވިދާޅުވުމަށް ފަހު މަސީހު މަޖިލީހުގެ ޖަލްސާ ނިންމަވާލެއްވި އެވެ.
މެންބަރުން ހަމަ ނުވެގެން ދެވަނަ ފަހަރަށް ވޯޓަށް އެހުން ފަސްކޮށްލި އިރު ބައެއް މަޖިލީސް މެންބަރުން ވަނީ ރައީސް އަބްދުﷲ ޔާމީން ށ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ބައިވެރިވެވަޑައިގެނެވެ.