މި އަހަރުގެ އޮކްޓޫބަރު ނޮވެމްބަރުގައި އޮންނަ ކެމްބްރިޖް އޯލެވެލްއާއި އައިޖީސީއެސްއީ، އެސްއެސްއީ އިމްތިހާނުގައި ބައިވެރިވާ ފަރާތްތަކުގެ ސްޓޭޓްމަންޓް އޮފް އެންޓްރީ އަންނަ ބުދަ ދުވަހު ދޫކުރަން ފަށާނެ ކަމަށް އެޑިއުކޭޝަން މިނިސްޓްރީން ބުނެފި އެވެ.
ޑީޕީއީ އިން މިއަދު ނެރުނު އިއުލާނެއްގައި ބުނީ، އޯލެވެލްގެ ޓެސްޓުތައް ކުރިއަށްދާނެ ގޮތުގެ ތާވަލު ހިމެނޭ ސްޓޭޓްމަންޓް އޮފް އެންޓްރީތައް މިމަހުގެ 18 ވަނަ ދުވަހުން ފެށިގެން އަންނަ މަހުގެ އަށް ވަނަ ދުވަހާ ހަމައަށް ރަސްމީ ގަޑިތަކުގައި އެ އިދާރާއިން ދޫކުރާނެ ކަމަށެވެ.
މިޑިޕާޓްމަންޓް މެދުވެރިކޮށް އަމިއްލަ ގޮތުން އިމްތިހާނުގައި ބައިވެރިވި ކެންޑިޑޭޓުންގެ ސްޓޭޓްމަންޓް އޮފް އެންޓްރީ ނަގަން އަންނަ އިރު އައިޑީ ކާޑު ގެންދަން ޖެހޭނެ އެވެ. ބަދަލުގައި މީހަކު ފޮނުއްވާނަމަ، ކެންޑިޑޭޓުގެ އައިޑީކާޑާއި ބަލައި ފުވާ މީހެއްގެ އައިޑީކާޑު ބޭނުންވާނެ އެވެ.
ޑީޕީއީ އިން ބުނީ ސްޓޭޓްމަންޓް އޮފް އެންޓްރީގައި އެއްވެސް މައްސަލައެއްވާނަމަ އޯގަސްޓް އަށް ވަނަ ދުވަހުގެ ރަސްމީ ގަޑި ނިމުމުގެ ކުރިން އެ ޑިޕާޓްމަންޓަށް ހުށަހަޅައިގެން މައްސަލަ އިސްލާހުކުރުމަށެވެ. އޭގެ ފަހުން ގެންނަ އިސްލާހުތައް ރަނގަޅުކުރަން ފީއެއް ނަގާނެ އެވެ.
ކޮންމެ އަހަރަކުވެސް އޯލެވެލް އިމްތިހާން އޮންނަނީ އޮކްޓޫބަރު މަހު އެވެ. އަދި ނިމޭނީ ނޮވެމްބަރު މަހުގެ ކުރީކޮޅު އެވެ.