އިދިކޮޅު އިސް މީހެއްގެ ފަރާތުން ރަނިން މޭޓަކަށް ވުމުގެ ދައުވަތު ދެއްވި ކަމަށާއި ނަމަވެސް އެ ހުށަހެޅުމަށް ވަގުތުން އިންކާރު ކުރިން ކަމަށް ރައީސް އަބްދުﷲ ޔާމީން އަބްދުލް ގައްޔޫމްގެ ރަނިން މޭޓް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މާލޭގައި ދިރިއުޅުއްވާ ހުވަދޫ ރައްޔިތުންނާ ބައްދަލު ކުރެއްވުމަށް ރޭ "ރުމާލު 2"ގައި ބޭއްވި ހަފްލާގައި ވާހަކަދައްކަވަމުން ޝަހީމް ވިދާޅުވީ ދާދި ފަހުން ސިޔާސީ ޕާޓީއަކުން ޓިކެޓު އިއުލާނު ކުރުމަށް ފަހު އިސް މީހަކު ކެބިނެޓަށް އައުމަށް އެމަނިކުފާނަށް ދައުވަތު ދެއްވި ކަމަށާއި ނަމަވެސް އެ ދައުވަތު އިންކާރު ކުރެއްވިން ކަމަށެވެ. އަދި އެއަށް ފަހު ރަނިން މޭޓަކަށް އައުމަށް ވެސް އެ ފަރާތްތަކުން އެއްސެވި ކަމަށާއި ނަމަވެސް އެއީ ދާން ހެޔޮވާ ވަރުގެ ތަނެއް ނޫން ކަމަށް ވެސް އެ ބޭފުޅުންނަށް ދެންނެވިން ކަމަށް ޝަހީމް ވިދާޅުވި އެވެ.
"އެންމެ ކުޑަމިނުން ރަނިންމޭޓަކަށް ވެސް އަހަރެން ކައިރީ އެހި. އިސް މީހުން. އަހަރެން ބުނިން ހޯ ހޯ އޭ އަހަރެން ތިތަނަކަށް ނުވަންނާނަމޭ. އެއީ މީހުން ވަންނަން ހެޔޮވާރު ތަންތަނެއް ނޫން،" ޝާހީމް ވިދާޅުވި އެވެ.
އޭގެ ބަދަލުގައި ރާއީސް ޔާމީންގެ ރަނިން މޭޓަކަށް ވުމަށް ދައުވަތު ލިބުމުން އެއްވެސް ޝަރުތަކާ ނުލާ ގަބޫލު ކުރެއްވި ކަމަށާއި އެއީ އިސްލާމް ދީން ކުރިއަރުވުމަށްޓަކައި ކަމަށް ޝަހީމް ވިދާޅުވި އެވެ. އަދި އިންތިހާބަށް ފަހު "ޝާހީމް ނަގާ އެއްލާލާނެ" ކަމަށް ބައެއް ފަރާތްތަކުން ބުނި ނަމަވެސް ރައީސް ޔާމީން އެގޮތަކަށް ނަހައްދަވާނެ ކަމަށް ވެސް ޝަހީމް ވިދާޅުވި އެވެ.
"އަހަރެން އެއްލާލަން ޖެހޭ ގޮތަކަށް އަހަރެން ކަމެއް ނުކުރާނަން. ރައީސް ޔާމީން އަކީ ވަފާތެރި މީހުންނަށް ވަފާތެރި މީހެއް. ތެދުވެރިންނަށް ތެދުވެރި މީހެއް. އޭނަ ގައިގަ ނުޖަހާ މީހެއްގެ ގައިގަ އޭނައެއް ނުޖަހާނެ،" ޝަހީމް ވިދާޅުވި އެވެ.
ޕީޕީއެމްގެ ކެންޑިޑޭޓުގެ ރަނިން މޭޓުކަން ޝަހީމް ގަބޫލު ކުރެއްވާ އެ މަގާމަށް އެމަނިކުފާނުގެ ނަން ފާސް ކުރީ މި މަހުގެ ހަތް ވަނަ ދުވަހުގަ އެވެ.