އަބުރު ރައްކާތެރި ކުރުމާއި ހިޔާލު ފާޅު ކުރުމުގެ މިނިވަން ކަމާ ބެހޭ ގާނޫނު އޮތީ ނޫސްވެރިންގެ ހައްގުތައް ހިފަހައްޓާފައި ކަމަށް ކުޅުދުއްފުށީ ދެކުނު ދާއިރާގެ މެންބަރު މުހައްމަދު ނަޝީދު ވިދާޅުވެއްޖެ އެވެ.
އަބުރުގެ ގާނޫނު އުވާލުމަށް ހުށަހަޅާފައިވާ މައްސަލައަށް ބަހުސް ކުރައްވަމުން ނަޝީދު ވަނީ އޭނާ އެ ގާނޫނަށް އެކުލަވާލުމަށް ވޯޓު ނުދިން ބައެއް ސަބަބުތައް ހާމަ ކުރައްވާފަ އެވެ. އެއް ސަބަބަކަށް ނަޝީދު ވިދާޅުވީ އެ ގާނޫނަކީ ޑިމޮކްރަސީއާ ބީރައްޓެހި ގާނޫނެއް ކަމަށާއި ޖިނާއީ ކުށެއްގެ ގޮތަށް ރާއްޖޭގައި އޮތް އަބުރުގެ ކުށް ގާނޫނުލްއުގޫބާތުން އުވާލާ ޖިނާއީ ކުށެއް ނޫން ކަމަށް ކަނޑައެޅާފައި އޮއްވާ އަލުން އެ ސިފަ ޖެހިފައިވާ ކަމަށް ނަޝީދު ވިދާޅުވި އެވެ.
އެ ގާނޫނު އޮތީ ސީދާ ނޫސްވެރިންނަށް އަމާޒުކޮށްފައި ކަމަށެވެ. ކިތަންމެ ހިތް ހަމަ ނުޖެހުނު ކަމުގައިވީ ނަމަވެސް މީހަކު ބުނަން ޖެހޭ އެއްވެސް ބުނުމުގެ ހައްގު ހިފެހެއްޓިގެން ނުވާނެ ކަމަށާއި ގާނޫނު އޮތީ އެ ހައްގަށް ހުރަސް އެޅޭ ގޮތަށް ކަމަށް ނަޝީދު ވިދާޅުވި އެވެ.
"މިނިވަން މީޑިއާ އުޅޭ އިރު އަޅުގަނޑުމެން ވިސްނަން ޖެހޭ އެއް ޕާޓީއަށް ވުރެ ގިނަ ޕާޓީ އުޅޭ އިރު އެއް ވިސްނުމަށް ވުރެ ގިނަ ވިސްނުން ހުންނަ މީޑިއާ ހުންނާނެ، އެކި ޗެނަލްތައް ހުންނާނީ އެކި ވިސްނުންތަކަށް ލެނބިފައި، އެކަން ބެލެންސް ކުރަން ވެގެން ދައުލަތުން ހަރަދުކޮށްގެން ދައުލަަތުގެ މީޑިއާއެއް މި ގެންނަނީ، ވަކި މީހަކަށް އިންނަ ޕޮލިޓިކަލް ޑައިރީއެއް ގޮތުގައި ނުބާއްވާ، އެންމެނަށް ލިބިދޭ ބެލެންސްއެއް ހިފެހެއްޓޭ ކަހަލަ ނިޒާމެއް ގާއިމްކޮށްދޭން ޕަބްލިސް ސާވިސް ބްރޯޑްކާސްޓެއް ހެދުނީ،" ނަޝީދު ވިދާޅުވި އެވެ.
ނަޝީދު ވިދާޅުވީ އަބުރުގެ ގާނޫނު އޮތީ ވަރަށް މަނާ ކަންތަކާއި ކުށްތައް ގިނަކޮށް ކަމަށާއި މަނާކަންކަމުގެ އިންތައް އެހާ ބޮޑު ކަމަށެވެ. އޭގެ ސަބަބުން ކުޑަ ކުޑަ ކަމެއްގެ ސަބަބުން ވެސް އެ ގާނޫނުގެ ތެރެއަށް ވަދެ އަދަބަކާ ކުރިމަަތިލާން ޖެހުމަކީ އެކަށީގެންވާ ކަމެއް ކަމަށް ނަޝީދު ވިދާޅުވި އެވެ. އޭގެ އިތުރުން އަބުރާ ބެހިގެން ދައްކަން ޖެހޭ ފައިސާ ނުދައްކައިފި ނަމަ އެކަން ފުލުހުން ބަލާ ޖަލަު ހުކުމަކަށް ވެސް ބަދަލުވާ ގޮތަށް ގާނޫނުގައި ބުނެފައިވާ ކަމަށް ނަޝީދު ވިދާޅުވި އެވެ. އެހެންކަމުން އެއީ މަދަނީ ގާނޫނަކަށް ވިޔަސް ޖިނާއީ ސިފައެއް ވެސް އެކުލެވޭ ކަމަށް ނަޝީދު ވިދާޅުވި އެވެ.
"މިހާތަނަށް ރާއްޖޭގައި ވެސް އަދި ބައެއް އެހެން ގައުމުތަކުގައި ވެސް ޖޫރިމަނާ ކުރީމަ ޖޫރިމަނާ ދައްކާފައި ނޫނީ އިސްތިއުނާފް ނުކުރެވޭ ގޮތަށް މި އޮންނަނީ ޓެކުހާ ރެވެނިއުއާ ބެހޭ އެއްޗެހި، މިސާލަކަށް ކަސްޓަމްސް ޑިއުޓީ އާއި ޓެކްސް، ޓެކްސް ނުދައްކާ މައްސަލައެއް އިސްތިއުނާފްކޮށްފި ނަމަ ދައުލަތް ހިންގުމަށް ބޭނުންވާ ފައިސާ ނުލިބި ދާނެތީ ދައުލަތް ހިންގުން ހުއްޓިދާނެތީ އޮންނަ އުސޫލެއް ފުރަތަމަ ފައިސާ ދައްކަން އޮންނަ އުސޫލެއް މިއީ، ނަމަވެސް އަބުރުގެ ގާނޫނު ތަންފީޒު ކުރުމުގައި ވެސް ވަނީ އެ އުސޫލު ގެނެސްފައި،" ނަޝީދު ވިދާޅުވި އެވެ.
އެ ގާނޫނު އުވާލުމަށް ސަރުކާރަށް ތާއީދު ކުރާ އެހެން މެންބަރުން ވެސް ދެކޮޅު ހައްދަވަ އެވެ. ނަމަވެސް އިދިކޮޅު މެންބަރުން ތިބީ އެ ގާނޫނު އުވާލުމަށް ވޯޓު ދިނުމަށް ތައްޔާރަށެވެ. އެ ބިލު ބަލައިގަތުމާ ބެހޭ ގޮތުން މިއަދު ގޮތެއް ނިންމާނެ އެވެ.