އަބުރު ރައްކާތެރިކަމާއި ހިޔާލުފާޅުކުރުމުގެ މިނިވަންކަމުގެ ގާނޫނު އުވާލުމުގެ ބިލް ރައީސް އިބްރާހިމް މުހައްމަދު ސޯލިހު ތަސްދީގު ކުރައްވައިފި އެވެ. އެއާ އެކު އެ ގާނޫނު މިހާރު ވަނީ ގެޒެޓްގައި ޝާއިއުކޮށްފަ އެވެ.
އެ ބިލް މަޖިލީހުން ފާސްކުރީ މި މަހުގެ 14 ވަނަ ދުވަހު އެވެ. ހެންވޭރު އުތުރު ދާއިރާގެ ކުރީގެ މެންބަރު އަދި މިހާރުގެ ހާރިޖީ ވަޒީރު އަބްދުﷲ ޝާހިދު ހުށަހެޅުއްވި އަބުރުގެ ގާނޫނު ބާތިލް ކުރުމުގެ ބިލް ފާސްކުރީ، މަޖިލީހުގެ 38 މެންބަރުންގެ ވޯޓުން އެވެ. އެ ބިލާ ދެކޮޅު ހެއްދެވީ 13 މެންބަރުން އެވެ.
އަބުރުގެ ގާނޫނު އުވުމާ އެކު، ކުރިއެކޭ ވެސް އެއްގޮތަށް، "އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ގަވާއިދަށް" ވަނީ އަލުން އަމަލު ކުރަން ފަށައިފަ އެވެ. އެ ގަވާއިދަަށް ބާރުލިބިފައި ވަނީ، އާންމު ގަވާއިދުތަކާބެހޭ ގާނޫނު ގެ ދަށުން އެވެ.
އަބުރުގެ ގާނޫނު އުވާލުމަކީ ރައީސް، އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.